- ମେ’ ୨୩ରେ ଶୀର୍ଷ ଛୁଇଁଥିଲା କରୋନା
- ଏବେ ବି ପାଞ୍ଚ ଜିଲ୍ଲାରେ ଶତକ ମାରୁଛି
- ଖୋର୍ଧାକୁ ଆୟତ୍ତକୁ ଆଣିପାରୁନାହାନ୍ତି
ଭୁବନେଶ୍ବର: କରୋନାର ଦ୍ୱିତୀୟ ଲହର ଏହା ମଧ୍ୟରେ ଶୀର୍ଷକୁ ଛୁଇଁବାକୁ ଦୁଇ ମାସ ବିତିିଗଲାଣି। ଗତ ମେ’ ୨୩ରେ ଶୀର୍ଷରେ ପହଞ୍ଚିଥିଲା ସଂକ୍ରମଣ। ଏହି ଦିନ ୧୨ ହଜାର ୮୫୨ ଆକ୍ରାନ୍ତ ଚିହ୍ନଟ ହୋଇଥିଲେ। ହେଲେ ଦୁଇ ମାସ ପରେ ବି କରୋନା ସଂକ୍ରମଣ ସଂପୂର୍ଣ୍ଣ ନିୟନ୍ତ୍ରଣକୁ ଆସିନାହିଁ। ଏବେ ବି ସଂକମଣ ୨ ହଜାର ପାଖାପାଖି ରହୁଛି। ସଂକ୍ରମଣ ହାର ମଧ୍ୟ ୨.୫ ପ୍ରତିଶତ ଉପରେ।
ଗତ ୨୪ ଘଣ୍ଟାରେ ରାଜ୍ୟରେ ୭୧ ହଜାର ୩୯ ନମୁନା ପରୀକ୍ଷା କରାଯାଇଥିଲା। ୧୮ ଶହ ୩୩ ଆକ୍ରାନ୍ତ ଦିନକରେ ଚିହ୍ନଟ ହୋଇଛନ୍ତି। ସଂକ୍ରମଣ ହାର ରହିଛି ୨.୫୮%। ଖୋର୍ଦ୍ଧାରୁ ସର୍ବାଧିକ ୪୯୦ ସଂକ୍ରମିତ ଚିହ୍ନଟ ହୋଇଛନ୍ତି । ସେହିପରି କଟକରୁ ୨୪୩, ଅନୁଗୁଳରୁ ୭୭, ବାଲେଶ୍ୱରରୁ ୧୨୯, ଭଦ୍ରକରୁ ୮୯, ଜଗତସିଂହପୁରୁ ୬୧, ଯାଜପୁରରୁ ୧୧୦, କେନ୍ଦ୍ରାପଡାରୁ ୮୭,ମୟୂରଭଞ୍ଜରୁ ୫୯ ଏବଂ ପୁରୀରୁ ୧୩୯ ଆକ୍ରାନ୍ତ ଚିହ୍ନଟ ହୋଇଛନ୍ତି। ୫ଟି ଜିଲ୍ଲାରେ ଆକ୍ରାନ୍ତଙ୍କ ସଂଖ୍ୟା ଶହେ ଉପରେ ରହିଛି। ନୂଆ ଆକ୍ରାନ୍ତଙ୍କୁ ମିଶାଇ ମୋଟ ଆକ୍ରାନ୍ତଙ୍କ ସଂଖ୍ୟା ୯ ଲକ୍ଷ ୬୭ ହଜାର ୫୪୮ରେ ପହଞ୍ଚିଛି।
ଆଜି ଆଉ ୬୭ ମୃତ୍ୟୁର ହିସାବ ଦେଇଛନ୍ତି ସରକାର। ଖୋର୍ଦ୍ଧା ଜିଲ୍ଲାରୁ ସର୍ବାଧିକ ୨୬ ଜଣଙ୍କ ମୃତ୍ୟୁ ହୋଇଛି । ଅନୁଗୁଳ, କେନ୍ଦୁଝରରୁ ୧୦ ଜଣ ଲେଖାଏଁ ଆଖି ବୁଜିଛନ୍ତି। ସୁନ୍ଦରଗଡରୁ ୬ ଜଣ, ପୁରୀରୁ ୫ ଜଣ, ଗଂଜାମ, ମୟୂରଭଂଜ ଜିଲ୍ଲାରୁ ୨ ଜଣ ଲେଖାଁଏ ମୃତ୍ୟୁ ହୋଇଥିବା ବେଳେ ଦେବଗଡ,ଢେଙ୍କାନାଳ, ଯାଜପୁର, ଝାରସୁଗୁଡା, କନ୍ଧମାଳ, କେନ୍ଦ୍ରାପଡା ଓ ମାଲିକାନଗିରି ଜିଲ୍ଲାରୁ କରୋନାରେ ଜଣେ ଲେଖାଁଏ ଆଖି ବୁଜିଛନ୍ତି । ୫ ହଜାର ୫୧୨ରେ ମୋଟ ମୃତ୍ୟୁ ସଂଖ୍ୟା ପହଞ୍ଚିଛି।