- ଉଭୟ ପୁରୁଷ ଏବଂ ମହିଳା ଟିମ୍କୁ ସମ୍ବର୍ଧିତ କଲେ ଓଡ଼ିଶା ସରକାର
- ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ କହିଲେ, ଦେଶକୁ ଗୌରବ ଫେରିବ
- ନବୀନଙ୍କ ପ୍ରଶଂସାରେ ସବୁ ଖେଳାଳି ଓ ହକି ଆସୋସିଏସନ୍ ଶତମୁଖ
ଭୁବନେଶ୍ବର: ଭାରତୀୟ ହକି ଦଳ ଓଡ଼ିଶା ଆଉ ୧୦ ବର୍ଷ ପ୍ରାୟୋଜକ ଭାବେ କାର୍ଯ୍ୟ କରିବ। ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଆଜି ଏଭଳି ଏକ ବଡ଼ ଘୋଷଣା କରିଛନ୍ତି। ଭୁବନେଶ୍ବରରେ ଭାରତର ଉଭୟ ପୁରୁଷ ଏବଂ ମହିଳା ହକି ଦଳକୁ ସମ୍ମାନୀତ କରିବା ଅବସରରେ ନବୀନ ଆଜି ପୂରା ଦେଶ ସାମ୍ନାରେ ଏ କଥା ରଖିଥିଲେ। ଅନ୍ୟପକ୍ଷରେ ଓଡିଶାର ଲୋକମାନେ ଆମ ପାଇଁ ନିରନ୍ତର ଉତ୍ସାହର ଉତ୍ସ ହୋଇଆସୁଛନ୍ତି ବୋଲି ମହିଳା ହକି ଦଳର କ୍ୟାପଟେନ ରାନୀ ରାମପାଲ କହିଛନ୍ତି। ସେହିଭଳି ପୁରୁଷ ହକି ଦଳର କ୍ୟାପଟେନ୍ ମନପ୍ରୀତ ସିଂହ କହିଛନ୍ତି ଯେ ଆମେ ପଦକ ଜିତିଲୁ .କିନ୍ତୁ ବାସ୍ତବରେ ଜାତିକୁ ନବୀନ ପଟ୍ଟନାୟକଙ୍କର ହିଁ ଏକ ଅବଦାନ ବୋଲି କୁହାଯିବ।
ଓଡ଼ିଶାର ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଆଜି ଅଲିମ୍ପିକ୍ ହକି ହିରୋମାନଙ୍କ ପାଇଁ ଅନୁଷ୍ଠିତ ଏକ ସମାରୋହରେ ଟୋକିଓ ଅଲିମ୍ପିକ୍ସରେ ନିଜର ଚମତ୍କାର ପ୍ରଦର୍ଶନ ସହିତ ଇତିହାସ ରଚନା କରିଥିବା ଭାରତୀୟ ଜାତୀୟ ହକି ଦଳକୁ ଅଭିନନ୍ଦନ ଜଣାଇଥିଲେ। ସେମାନଙ୍କର ସଫଳତା ଏବଂ ବିଶ୍ବର ଶ୍ରେଷ୍ଠ ଦଳ ହେବାର ସମ୍ଭାବନାକୁ ସ୍ୱୀକୃତି ଦେଇ ମୁଖ୍ୟମନ୍ତ୍ରୀ ଘୋଷଣା କରିଥିଲେ ଯେ ଓଡିଶା ଆଉ ୧୦ ବର୍ଷ ପର୍ଯ୍ୟନ୍ତ ଭାରତୀୟ ହକି ଦଳକୁ ପ୍ରାୟୋଜିତ କରିବ।
ମୁଖ୍ୟମନ୍ତ୍ରୀ କ୍ୟାପଟେନ ରାନୀ ରାମପାଲ ଏବଂ ମହିଳା ଦଳକୁ ଅଭିନନ୍ଦନ ଜଣାଇ ମୁଖ୍ୟମନ୍ତ୍ରୀ କହିଥିଲେ ଯେ ଏହା ପ୍ରେରଣାଦାୟକ। ସେହିଭଳି ମନପ୍ରୀତ ସିଂ ଏବଂ ତାଙ୍କ ପୁରୁଷ ଦଳ ହାସଲ କରିଥିବା ବ୍ରୋଞ୍ଜ ଭାରତ ପାଇଁ ଏକ ସୁନାଠାରୁ କମ୍ ନୁହେଁ। ଏହି ଅବସରରେ ମୁଖ୍ୟମନ୍ତ୍ରୀ ପ୍ରତ୍ୟେକ ଖେଳାଳିଙ୍କୁ ୧୦ ଲକ୍ଷ ଟଙ୍କା ଏବଂ ପ୍ରତ୍ୟେକ ସହାୟକ କର୍ମଚାରୀଙ୍କୁ ୫ଲକ୍ଷ ଟଙ୍କା ପ୍ରଦାନ କରିଥିଲେ।
ଅନ୍ୟପକ୍ଷରେ ସମ୍ମାନ ଏବଂ କୃତଜ୍ଞତାର ଏକ ଟୋକନ୍ ଭାବରେ ପ୍ରତ୍ୟେକ ଦଳ ଖେଳାଳିଙ୍କ ଦ୍ୱାରା ଅଟୋଗ୍ରାଫ୍ ହୋଇଥିବା ଏକ ଫ୍ରେମ୍ ହୋଇଥିବା ଜର୍ସିକୁ ମୁଖ୍ୟମନ୍ତ୍ରୀଙ୍କୁ ଉପହାର ଦେଇଥିଲେ।
ଏହି ସମାବେଶକୁ ସମ୍ବୋଧିତ କରି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ କହିଥିଲେ, “ଟୋକିଓରେ ତୁମର ସଂଗ୍ରାମ ଦ୍ୱାରା ତୁମେ ଆମ ସମସ୍ତଙ୍କୁ ଗର୍ବିତ କରିଛ।
ଭାରତୀୟ ହକିର ପୁନର୍ଜୀବନର ସାକ୍ଷୀ ହେବା ଲାଗି ଭାରତ ପାଇଁ ଏହା ଗଭୀର ଭାବପ୍ରବଣ ମୁହୂର୍ତ୍ତ।”
ପ୍ରାୟ ଚାରି ଦଶନ୍ଧି ଧରି ହକି ପ୍ରଶଂସକମାନେ ଅଲିମ୍ପିକ୍ସରେ ଭାରତ ପଦକ ହାସଲ କରିବାକୁ ଆଗ୍ରହ ସହ ଅପେକ୍ଷା କରି ରହିଥିଲେ। ହକି ଦଳର ମ୍ୟାଚ୍ ଦେଖିବା ପାଇଁ ସମଗ୍ର ଦେଶ ଯେପରି ପରଦାରେ ଲାଗିଥିଲା, ଏଥିରୁ ସ୍ପଷ୍ଟ ଯେ ହକିରେ ଦେଶ ଆଉ କିଛି ଅଧିକ ଅପେକ୍ଷା ରଖୁଛି। କୋଭିଡ ମହାମାରୀର ପୃଷ୍ଠଭୂମିରେ, ଏହା ଉଲ୍ଲେଖନୀୟ ଯେ ଆମ ଦଳ ସବୁ ଚ୍ୟାଲେଞ୍ଜ ସତ୍ତ୍ବେ ଏତେ ପରିଶ୍ରମ କରିଛନ୍ତି ଏବଂ ବିଜୟୀ ହୋଇଛନ୍ତି ବୋଲି ମୁଖ୍ୟମନ୍ତ୍ରୀ କହିଥିଲେ।
ମୁଖ୍ୟମନ୍ତ୍ରୀ ଆହୁରି କହିଥିଲେ ଯେ ଏହି ସଙ୍କଟ ସମୟରେ ଦଳ କୋଟି କୋଟି ଭାରତୀୟଙ୍କ ମୁହଁରେ ହସ ଆଣିଛି। ଆମ ପୁଅ ଏବଂ ଝିଅମାନଙ୍କୁ ଆମେ ସମସ୍ତେ ଧନ୍ୟବାଦ ଦେବା ଉଚିତ୍। ଆମେ ଓଡିଶାବାସୀ ଆନନ୍ଦିତ ଯେ ହକି ଇଣ୍ଡିଆ ସହ ଆମର ସହଭାଗିତା ଦେଶ ପାଇଁ ଏହି ମହତ୍ ସଫଳତା ହାସଲ କରିଛି। ଆମେ ହକି ଇଣ୍ଡିଆ ସହିତ ଆମର ସହଭାଗିତା ଜାରି ରଖିବୁ। ଆଉ ୧୦ ବର୍ଷ ପାଇଁ ଓଡିଶା ଭାରତୀୟ ହକି ଦଳକୁ ସମର୍ଥନ କରିବ। ଏହା ଭାରତୀୟ ହକିର ଏକ ନୂତନ ଯୁଗର ପ୍ରଚାର କରିବ ଏବଂ ଦେଶକୁ ଗୌରବ ଫେରାଇ ଆଣିବ।
ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଏହି ଅବସରରେ ୧୩ଟି ପୁରସ୍କାର ପ୍ରଦାନ କରିଥିଲେ।
ଏହି ଅବସରରେ ହକି ଇଣ୍ଡିଆ ସଭାପତିଙ୍କୁ ୫୦ ଲକ୍ଷ ଟଙ୍କାର ପୁରସ୍କାର ପ୍ରଦାନ କରାଯାଇଥିଲା।
ସେହିଭଳି ଓଡିଶାର ଦୀପଗ୍ରେସ ଏକ୍କାଙ୍କୁ ଶ୍ରେଷ୍ଠ ଡିଫେଣ୍ଡର ଭାବେ ପୁରସ୍କୃତ କରାଯାଇଛି। କ୍ୟାପଟେନ ରାନୀ ରାମପାଲ ଓ ନଭନୀତ କୌରଙ୍କୁ ଶ୍ରେଷ୍ଠ ପ୍ରଦର୍ଶନ ପାଇଁ, ସବିତା ପୁନିଆଙ୍କୁ ଶ୍ରେଷ୍ଠ ଗୋଲକିପର ଭାବେ, ବନ୍ଦନା କଟାରିଆ ଓ ଗୁରୁଜିତ କୌରଙ୍କୁ ସର୍ବାଧିକ ଗୋଲ ପାଇଁ ପୁରସ୍କୃତ କରାଯାଇଛି । ପ୍ରତ୍ୟେକଙ୍କୁ ୫ ଲକ୍ଷ ଟଙ୍କାର ଚେକ ପ୍ରଦାନ କରାଯାଇଥିଲା। ଏହା ସହ ମହିଳା ହକି ଦଳର ପ୍ରତ୍ୟେକଙ୍କୁ ୧୦ ଲକ୍ଷ ଟଙ୍କା ଲେଖାଁଏ ପ୍ରଦାନ କରିଥିଲେ ମୁଖ୍ୟମନ୍ତ୍ରୀ। ଓଡିଶା ଆମର ଘର । ଓଡିଶାର ଲୋକେ ଆମ ପରିବାର ବୋଲି କହିଥିଲେ ରାନୀ ରାମପାଲ।
ସେହିପରି ପୁରୁଷ ହକି ଦଳରେ ଗୋଲ ରକ୍ଷଣ ପାଇଁ ଗୋଲ କିପର ଶ୍ରୀଜେସଙ୍କୁ ପୁରସ୍କୃତ କରାଯାଇଥିଲା। ରୂପିନ୍ଦର ପାଲ ସିଂଙ୍କୁ ଡିଫେଣ୍ଡର ପାଇଁ, ନୀଳକଣ୍ଠ ଶର୍ମାଙ୍କୁ ଗୋଲ ସହାୟତା, ଅମିତ ରୋହିତଦାସଙ୍କୁ ଶ୍ରେଷ୍ଠ ମିଡ ଫିଲଡର ଭାବେ ପୁରସ୍କାର ପ୍ରଦାନ କରାଯାଇଥିଲା। ସର୍ବାଧିକ ଗୋଲ ପାଇଁ ହରମନପ୍ରିତ
ସିଂଙ୍କୁ ପୁରସ୍କୃତ କରିଥିଲେ ମୁଖ୍ୟମନ୍ତ୍ରୀ । ପ୍ରତ୍ୟେକଙ୍କୁ ୫ ଲକ୍ଷ ଟଙ୍କାର ପୁରସ୍କାର ପ୍ରଦାନ କରାଯାଇଥିଲା। ଏହା ସହ ସମସ୍ତ ଖେଳାଳିଙ୍କୁ ୧୦ ଲକ୍ଷ ଟଙ୍କା ପୁରସ୍କାର ପ୍ରଦାନ କରିଥିଲେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ। ଓଡିଶା ଭଲପାଇବା ଓ ସହଯୋଗରେ ହକି ବହୁତ ଆଗକୁ ଯାଇଛି ବୋଲି ପୁରୁଷ ହକି ଟିମ୍ କହିଥିଲା।
ରାଜ୍ୟ କ୍ରୀଡା ମନ୍ତ୍ରୀ ତୁଷାରକାନ୍ତି ବେହେରା ପ୍ରାରମ୍ଭିକ ବକ୍ତବ୍ୟ ରଖିଥିଲେ, ଦିଲ୍ଲୀପ ତିର୍କୀ ଧନ୍ୟବାଦ ଦେଇଥିଲେ। ଭାରତର ଅଲମ୍ଫିକ୍ ଆସୋସିଏସନ୍ ସଭାପତି ନରିନ୍ଦର ଧ୍ରୁବ ବାତ୍ରା ବି ବକ୍ତବ୍ୟରେ ଓଡ଼ିଶାକୁ ପ୍ରଶଂସାରେ ପୋତି ପକାଇଥିଲେ।
୨୦୧୮ରୁ ଓଡ଼ିଶା ହକିର ପୃଷ୍ଠପୋଷକ ଦାୟିତ୍ବ ନେଇଛି।