ଭୁବନେଶ୍ବର: ଅପହରଣ ପଛର ମାଷ୍ଟରମାଇଣ୍ଡ ଥିଲା ଡ୍ରାଇଭର। ଆସିକା ରୋଡରେ ଥିବା ଏକ୍ସିକ୍ସ ବ୍ୟାଙ୍କ ସାମନାରୁ ଏଟିଏମ ଟଙ୍କା ଲୋଡିଂ ଭ୍ୟାନ ଅପହରଣ ଘଟଣା ଉପରୁ ପରଦା ହଟାଇଛି ପୁଲିସ। ଅପହରଣ ଓ ଲୁଟ ପଛରେ ଆଉ କେହି ନୁହେଁ ନିଜେ ଭ୍ୟାନ ଡ୍ରାଇଭର ହିଁ ମୁଖ୍ୟ କାର୍ପଟଦାର ବୋଲି ଜଣାପଡିଛି।
ଡ୍ରାଇଭର ହିଁ ରଚିଥିଲା ଅପହରଣ ନାଟକ । ଗତ ୧୮ ତାରିଖ ଦିନ ଏକ୍ସିକ୍ସ ବ୍ୟାଙ୍କ ସାମନାରୁ ୨୪ ଲକ୍ଷ ଟଙ୍କା ଥିବା ଏଟିଏମ ଭ୍ୟାନ ସହ ଡ୍ରାଇଭରକୁ ଅପହରଣ
କରାଯାଇଥିଲା। ୨ ଜଣ ଦୁର୍ବୃତ୍ତ ବନ୍ଧୁକ ଦେଖାଇ ଟଙ୍କା ଭର୍ତି ଗାଡି ସହ ଡ୍ରାଇଭରକୁ ନେଇଯାଇଥିଲେ । ଏହା ପରେ ଡ୍ରାଇଭର ଆଶିଷଙ୍କୁ ନିଶାଶକ୍ତ ଅବସ୍ଥାରେ ଆନ୍ଧ୍ର ସୀମାନ୍ତ ଗିରିସୋଲା ନିକଟରୁ ଉଦ୍ଧାର କରିଥିଲା। ଭ୍ୟାନ ସହିତ ଅଚେତ ଅବସ୍ଥାରେ ଡ୍ରାଇଭରକୁ ଉଦ୍ଧାର କରିଥିଲା ପୁଲିସ । ହେଲେ ଡ୍ରାଇଭର ଜଣକ ତାଙ୍କୁ ଦୃର୍ବୁତ ଅପହରଣ କରିନେଇ ଟଙ୍କା ସବୁ ନେଇଯାଇଥିବା ଅଭିଯୋଗ କରିଥିଲେ।
ପୁଲିସ ତାଙ୍କୁ ପଚରାଉଚରା ପରେ ତାଙ୍କ କଥାରେ ତାଳମେଳ ରହୁନଥିଲା। ଯାହାକୁ ନେଇ ପୁଲିସର ସନ୍ଦେହ ବଢିଥିଲା। ଏହା ପରେ ସିସିଟିଭି ଫୁଟେଜ ଓ
କଲ ଯାଞ୍ଚ କରିଥିଲା ପୁଲିସ। ଏଥିରୁ ଡ୍ରାଇଭର ହିଁ ଅପହରଣ ପଛର ମାଷ୍ଟରମାଇଣ୍ଡ ବୋଲି ଜାଣିବାକୁ ପାଇଥିଲା। ଏହି ଘଟଣାରେ ପୁଲିସ ଡ୍ରାଇଭର ଆଶିଷ ସହ ଅନ୍ୟ ଦୁଇ ଜଣଙ୍କୁ ଗିରଫ କରିଛି। ଏହା ସହ ତାଙ୍କ ନିକଟରୁ ୨୧ ଲକ୍ଷ ଟଙ୍କା ମଧ୍ୟ ଜବତ କରାଯାଇଛି । ଆଜି ବ୍ରହ୍ମପୁର ଏସପି ଏନେଇ ସୂଚନା ଦେଇଛନ୍ତି ।