‘ଆତଙ୍କବାଦୀଙ୍କ ପାଇଁ ବ୍ୟବହାର ନହେଉ ଆଫଗାନିସ୍ତାନ ମାଟି’
ଆଫଗାନିସ୍ତାନର ସ୍ଥି୍ତି ଉପରେ ପୁଣି ଥରେ ଚିନ୍ତା ପ୍ରକଟ କରିଛି ଭାରତ। ଆଫଗାନିସ୍ତାନକୁ ତାଲିବାନ କବଜା କରିବା ପରେ ବର୍ତମାନର ସ୍ଥିତି ନେଇ ମିଳିତ
ଜାତିସଂଘ ସୁରକ୍ଷା ପରିଷଦ ପକ୍ଷରୁ ଜରୁରୀକାଳୀନ ବୈଠକ ବସିଥିଲା। ମିଳିତ ଜାତିସଂଘ ସୁରକ୍ଷା ପରିଷଦରେ ଭାରତର ସ୍ଥାୟୀ ପ୍ରତିନିଧି ଟିଏସ ତ୍ରିମୂର୍ତ୍ତି କହିଛନ୍ତି ଯେ, ଆଫଗାନିସ୍ତାନର ସ୍ଥିତି ଏବେ ବି ଗମ୍ଭୀର ରହିଛି । ଏକ ପଡୋଶୀ ଭାବେ ଆଫଗାନିସ୍ତାରେ ଦେଖାଦେଇଥିବା ସ୍ଥିତିକୁ ନେଇ ଆମେ ଚିନ୍ତିତ।
ଟିଏସ ତ୍ରିମୂର୍ତ୍ତି କହିଛନ୍ତି , ଆଫଗାନିସ୍ତାନରେ ପୁରୁଷ, ମହିଳା ଓ ପିଲାଙ୍କ ମଧ୍ୟରେ ଭୟର ବାତାବରଣ ରହିଛି। ସେମାନେ ନିଜର ଭବିଷ୍ୟତକୁ ନେଇ ଅନିଶ୍ଚିତତାରେ ଅଛନ୍ତି। ଆଫଗାନ ନାଗରିକଙ୍କ ମନରେ ଏବେ ପ୍ରଶ୍ନ ରହିଛି , ସେମାନେ ସେଠାରେ ନିଜ ଅଧିକାର ଓ ସମ୍ମାନର ସହ ରହିପାରିବେ ତ? ଆଫଗାନରେ ସ୍ଥିତି ଖୁବଶ୍ରୀଘ୍ର ସୁଧାର ଆସିବା ସହ ସେଠାକାର ପୁରୁଷ, ମହିଳା ଓ ପିଲାଙ୍କୁ ସେମାନଙ୍କ ଅଧିକାର ମିଳୁ ବୋଲି ଟିଏସ କହିଛନ୍ତି।
ଟିଏସ ତ୍ରିମୂର୍ତ୍ତି ମିଳିତ ଜାତିସଂଘରେ ଆତଙ୍କବିରୋଧରେ ମଧ୍ୟ ବର୍ଷିଛନ୍ତି। ସେ କହିଛନ୍ତି, କାବୁଲ ବିମାନ ବନ୍ଦରରେ ଗତମାସରେ ଆତଙ୍କବାଦୀ ଆକ୍ରମଣ ହୋଇଥିଲା । ଏଥିରୁ ଜଣାପଡୁଛି, ଆତଙ୍କବାଦୀ ମାନେ ଆଫଗାନିସ୍ତାନ ପାଇଁ ବଡ଼ ବିପଦ ସାଜିଛନ୍ତି। ତେଣୁ ଆତଙ୍କବାଦ ବିରୋଧରେ ତାଲିବାନ ଯେଉଁ ପ୍ରତିଶ୍ରୁତି ଦେଇଛି, ତାର ସମ୍ମାନ ରଖୁ ଓ ପାଳନ କରୁ।
ଗତ ମାସକ ମଧ୍ୟରେ ଆଫଗାନିସ୍ତାନରେ ନାଟକୀୟ ପରିବର୍ତ୍ତନ ଦେଖାଦେଇଛି। ଅଗଷ୍ଟରେ ଆଫଗାନସ୍ତାନର ସ୍ଥିତି ନେଇ ତିନି ଥର ବୈଠକ ବସିଥିଲା।ସେଥିରେ ଆତଙ୍କବାଦ ବିରୋଧରେ ଭାରତ କିଛି ଚିନ୍ତା ପ୍ରକଟ କରିଥିଲା । ତାଲିବାନ ପ୍ରତିଶ୍ରୁତି ଦେଇଛି ଯେ, ଆତଙ୍କବାଦୀଙ୍କ ପାଇଁ ଆଫଗାନ ମାଟି ବ୍ୟବହାର ହେବାକୁ ଦେବନି।
ତାଲିବାନ ଏହା ବି କହିଛି ଯେ, ଅନ୍ୟ ଦେଶ ବିରୋଧରେ ଷଡଯନ୍ତ୍ର ରଚିବା, ଧମକାଇବା ଓ ଆତଙ୍କବାଦୀଙ୍କୁ ଟ୍ରେନିଂ ଦେବା ନେଇ ଆଫଗାନିସ୍ତାନ ମାଟିରେ ପ୍ରଶୟ ଦିଆଯିବନି । ତେଣୁ ତାଲିବାନ ଦେଇଥିବା ପ୍ରତିଶ୍ରୁତି ରକ୍ଷା କରିବାକୁ ଟିଏସ ତ୍ରିମୂର୍ତ୍ତି ମିଳିତ ଜାତିସଂଘରେ କହିଥିଲେ। ଏହା ସହ ସେ କହିଛନ୍ତି, ଆଫଗାନ ନାଗରିକ ବିନା କୌଣସି ପ୍ରତିବନ୍ଧକରେ ବିଦେଶ ଯାତ୍ରା କରିପାରିବେ ବୋଲି ତାଲିବାନ କହିଥିଲା। ଆଫଗାନ ନାଗରିକଙ୍କ ସମେତ ଅନ୍ୟ ବିଦେଶୀ ନାଗରିକ ଯେପରି ସୁରକ୍ଷିତ ଯାତ୍ରା କରିପାରିବେ ସେନେଇ ତାଲିବାନ ଦେଇଥିବା ପ୍ରତିଶ୍ରୁତି ପାଳନ କରିବ ବୋଲି ଆଶା ରହିଛି।