ନୂଆଦିଲ୍ଲୀ: ପଞ୍ଜାବରେ ଆସନ୍ତାବର୍ଷ ହେବାକୁ ଥିବା ନିର୍ବାଚନ ପୂର୍ବରୁ ବଡ଼ ପରିବର୍ତ୍ତନ ହୋଇଛି। ମୁଖ୍ୟମନ୍ତ୍ରୀ ଭାବେ ଆଜି ଚରଣଚିତ ସିଂ ଚନ୍ନୀ ଶପଥ ନେଇଛନ୍ତି। ସକାଳ ୧୧ଟାରେ ରାଜଭବନରେ ଆୟୋଜିତ ଶପଥ ଗ୍ରହଣ ସମାରୋହରେ ପଞ୍ଜାବର ରାଜ୍ୟପାଳ ବନୱାରିଲାଲା ପୁରୋହିତ ତାଙ୍କୁ ପଦ ଓ ଗୋପନୀୟତାର ଶପଥ ପାଠ କରାଇଛନ୍ତି। ସେହିପରି ଉପମୁଖ୍ୟମନ୍ତ୍ରୀ ଭାବେ ସୁଖଜିନ୍ଦର ସିଂ ରନ୍ଧାୱା ଓ ଓପି ସୋନୀ ଶପଥ ନେଇଛନ୍ତି ।କ୍ୟାପଟେନ ଅମରିନ୍ଦର ସିଂହ ଶନିବାର ମୁଖ୍ୟମନ୍ତ୍ରୀ ପଦରୁ ଇସ୍ତଫା ଦେଇଥିଲେ ।ପଞ୍ଜାବ କଂଗ୍ରେସରେ ଜାରି କନ୍ଦଳ ଭିତରେ କଂଗ୍ରେସ ଦଳ ଚେହେରା ପରିବର୍ତ୍ତନ କରିଛି।
ଆଜି ମୁଖ୍ୟମନ୍ତ୍ରୀ ଭାବେ ଶପଥ ନେବା ପୂର୍ବରୁ ଚରଣଜିତ ରୂପନଗରସ୍ଥିତ ଗୁରୁଦ୍ୱାରକୁ ଯାଇ ପ୍ରାର୍ଥନା କରିଥିଲେ। ଏହା ପରେ ହରିଶ ରାୱତଙ୍କୁ ଭେଟିବା ପରେ ସେ ରାଜଭବନ ଅଭିମୁଖେ ଯାତ୍ରା ଆରମ୍ଭ କରିଥିଲେ। ଆଜି ଅପରାହ୍ନରେ ସେ କ୍ୟାପଟେନ ଅମରିନ୍ଦର ସିଂହଙ୍କୁ ମଧ୍ୟ ଭେଟିବାର କାର୍ଯ୍ୟକ୍ରମ ରହିଛି। ଚରଣଚିତ ସିଂ ଚନ୍ନୀ ଦଳିତ ସଂପ୍ରଦାୟରୁ ରାଜ୍ୟର ପ୍ରଥମ ମୁଖ୍ୟମନ୍ତ୍ରୀ ଭାବେ ଶପଥ ନେଇଛନ୍ତି। ଚରଣଜିତ ପଞ୍ଜାବର ଜଣେ ପ୍ରମୁଖ ଦଳିତ ଶିଖ ନେତା ଭାବେ ବେଶ୍ ପରିଚିତ।
ଚମକୌର ସାହି ନିର୍ବାଚନ ମଣ୍ଡଳୀରୁ ସେ ତିନି ଥର ବିଧାୟକ ଭାବେ ନିର୍ବାଚିତ ହୋଇଛନ୍ତି । କ୍ୟାପଟେନ ଅମରିନ୍ଦର ସିଂହଙ୍କ କ୍ୟାବିନେଟରେ ସେ ବୈଷୟିକ ଶିକ୍ଷା ଓ ଉଦ୍ୟୋଗ ତାଲିମ ମନ୍ତ୍ରୀ ଥିଲେ। ୨୦୦୭ରେ ଚରଣଜିତ ପ୍ରଥମେ ରାଜ୍ୟ ବିଧାନସଭାକୁ ନିର୍ବାଚିତ ହୋଇଥିଲେ । ଗତ ବିଧାନସଭା ନିର୍ବାଚନରେ ସେ ଆମ ଆଦମୀ ପାର୍ଟିର ପ୍ରାର୍ଥୀଙ୍କୁ ୧୨ ହଜାରରୁ ଅଧିକ ଭୋଟରେ ହରାଇଥଲୋ। ଚରଣଜିତଙ୍କ ଶପଥ ଗ୍ରହଣ ଉତ୍ସବରେ କଂଗ୍ରେସ ନେତା ରାହୁଲ ଗାନ୍ଧୀ ଉପସ୍ଥିତ ଥିଲେ । ମୁଖ୍ୟମନ୍ତ୍ରୀ ଭାବେ ଶପଥ ନେବା ପରେ ରାହୁଲ ଗାନ୍ଧୀ ଓ ନବଜୋତ ସିଂହ ସିଦ୍ଧୁ ତାଙ୍କୁ ଶୁଭେଚ୍ଛା ଜଣାଇଛନ୍ତି । ଆଗାମୀ ବିଧାନସଭା ନିର୍ବାଚନକୁ ନଜରରେ ରଖି ଚରଣଜିତଙ୍କୁ ଟପ ପୋଷ୍ଟରେ ବସାଇବାକୁ ସହମତି ପ୍ରକାଶ ପାଇଛି ।