କେନ୍ଦ୍ର ମନ୍ତ୍ରୀଙ୍କ ପୁଅ ଆଶିଷ ମିଶ୍ରା ଫେରାର । ଉତ୍ତରପ୍ରଦେଶ ଲଖିମପୁର ଖେରି ହିଂସାକାଣ୍ଡ ମାମଲାରେ ସମନ ପରେ ବି ଆଜି ସେ ହାଜର ହୋଇନାହାନ୍ତି । ଆଶିଷଙ୍କ ଘର ଆଗରେ ନୋଟିସ ଲଗାଇ ଆଜି ଦିନ ୧୦ଟା ସୁ୍ଦ୍ଧା ହାଜର ପାଇଁ କହିଥିଲା । ହେଲେ ସେ ହାଜର ହୋଇନାହାନ୍ତି । ଆଶିଷ ମିଶ୍ରା କୁଆଡେ ଫେରାର ଅଛନ୍ତି କାହାକୁ ଜଣାନଥିବା ବେଳେ ତାଙ୍କ ସଂର୍ପକୀୟ ଭାଇ ଅମିତ ମିଶ୍ରାଙ୍କ ପ୍ରତିକ୍ରୟା ମିଳିଛି । ଅମିତ ମିଶ୍ରା କହିଛନ୍ତି, ଆଶିଷ ଖୁବ ଶୀଘ୍ର ତଦନ୍ତରେ ସାମିଲ ହେବେ । ତେବେ ଆଶିଷ ନେପାଳ ଚାଲିଯାଇଥିବା ନେଇ ଜାତୀୟ ଗଣମାଧ୍ୟମରେ ଚର୍ଚ୍ଚା ହେଉଛି ।
ଜାତୀୟ ଗଣମାଧ୍ୟମରେ ଆଶିଷଙ୍କ ଭାଇ ଅମିତ ମିଶ୍ରା କହିଛନ୍ତି ଯେ, ଆଶିଷ ମିଶ୍ରା ଫେରାର ହେବାର କୌଣସି କାରଣ ନାହିଁ । ଆଶିଷ ଏସଆଇଟି ପାଖରେ ହାଜର ହେବେ । ଏବେ ନହେଲେ ବି ସନ୍ଧ୍ୟା ସୁଦ୍ଧା ଆଶିଷ ଏସଆଇଟି ପାଖରେ ପହଞ୍ଚିବେ ବୋଲି ସେ ଦାବି କରିଛନ୍ତି । ଅମିତ କହିଛନ୍ତି ଯେ ଏହା କଂଗ୍ରେସ ଦ୍ୱାରା ପ୍ରସାରିତ ପ୍ରଚାର । ଆଶିଷ ହିଂସାକାଣ୍ଡ ଦିନ ବନଭେରପୁର ଥିଲେ । ଅର୍ଥାତ ଘଟଣା ସ୍ଥଳରେ ନଥିଲେ ।
ସେ ଏହା ବି କହିଛନ୍ତି ଯେ,, ଆଶିଷଙ୍କ ବିଷୟରେ ସମସ୍ତ ମନଗଢା କଥା କୁହାଯାଇଛି । ସେ କୌଣସି ଦୌଡି ପଳାଇଥିବା ଅପରାଧୀ ନୁହଁନ୍ତି । ସେହିପରି ଭାଇରାଲ ହେଉଥିବା ଭିଡିଓରେ କିଛି ଦୃଶ୍ୟମାନ ହେଉନାହିଁ । ଡ୍ରାଇଭର ହିଁ ଗାଡି ଚଲାଉଥିବାର ଭିଡିଓରେ ଦେଖିବାକୁ ମିଳିଛି । ଆଶିଷଙ୍କୁ ଯାହା ପ୍ରମାଣ ଦେବାର ଥିଲା ଦେଇସାରିଛନ୍ତି । ପୁଲିସ ଗତକାଲି ରାତିରେ ସମନ ଜାରି କଲା । ତେଣୁ ଆଶିଷଙ୍କ ସହ ଯୋଗାଯୋଗ ହୋଇପାରିନାହିଁ । ତେବେ ସନ୍ଧ୍ୟା ସୁଦ୍ଧା ସେ ହାଜର ହେବେ ବୋଲି ଅମିତ ମିଶ୍ରା କହିଛନ୍ତି ।
ଆଶିଷ ମିଶ୍ରାଙ୍କ ସହ ସୁମିତ ଜେଶୱାଲାଙ୍କୁ ମଧ୍ୟ ପୁଲିସ ଖୋଜୁଛି । ଗିରଫ ହୋଇଥିବା ୨ ଜଣ ଆଶିଷ ପାଣ୍ଡେ ଓ ଲବ କୁଶଙ୍କ ବୟାନ ଆଧାରରେ ହିଁ ସୁମିତ ଜେଶୱାଲାଙ୍କୁ ପୁଲିସ ଖୋଜୁଛି । ଲଖିମପୁର ଖେରି କୃଷକ ଆନ୍ଦୋଳନ ଚାଲୁଥିବା ସମୟରେ ୪ ଜଣ କୃଷକଙ୍କ ଉପରେ କାର ଚଢିଯାଇଥିଲା । ଏଥିରେ ୪ ଜଣ କୃଷକଙ୍କ ମୃତ୍ୟୁ ହୋଇଥିବା ବେଳେ ଏହାକୁ ନେଇ ହିଂସାକାଣ୍ଡରେ ଆଉ ୪ ଜଣଙ୍କ ମୃତ୍ୟୁ ହୋଇଥିଲା । ମୋଟ ୮ ଜଣଙ୍କ ମୃତ୍ୟୁ ହୋଇଥିଲା । ଘଟଣାର ମୁଖ୍ୟ ଅଭିଯୁକ୍ତ କୁହାଯାଉଥିବା କେନ୍ଦ୍ର ଗୃହ ରାଜ୍ୟ ମନ୍ତ୍ରୀ ଅଜୟ ମିଶ୍ରାଙ୍କ ପୁଅ ଆଶିଷ ମିଶ୍ରାଙ୍କୁ ପୁଲିସ ଖୋଜୁଛି । ସେ କୃଷକଙ୍କ ଉପରେ କାର ଚଢାଇ ହତ୍ୟା କରାଯାଇଥିବା ଅଭିଯୋଗ ହୋଇଥିବା ବେଳେ ତାଙ୍କ ନାଁରେ ମାମଲା ରୁଜୁ କରାଯାଇଛି ।