ମୁମ୍ବାଇ: ବଲିଉଡ଼ ବାଦଶାହା ଶାହାରୁଖ ଖାନଙ୍କ ପୁଅ ଆର୍ୟନ ଖାନଙ୍କ ସମସ୍ୟା ବଢିବାରେ ଲାଗିଛି। ‘ମନ୍ନତ’ର ଅଏସ ଆରାମରେ ବଡ଼ ହୋଇଥିବା ଆର୍ୟନଙ୍କୁ ଏବେ ଜେଲରେ ଦିନ କାଟିବାକୁ ପଡୁଛି। ଆର୍ୟନ ଦିନ ଗଣୁଛନ୍ତି, ତାଙ୍କୁ କେବେ ଜାମିନ ମିଳିବ ଓ ସେ ମନ୍ନତ ଯିବେ।
ଗୁରୁବାର ମୁମ୍ବାଇ ସେସନ୍ସ କୋର୍ଟ ଜାମିନ ଆବେଦନ ମାମଲାର ଶୁଣାଣି କରି ରାୟ ସଂରକ୍ଷିତ ରଖିଛନ୍ତି। ତେବେ ୫ ଦିନ ପର୍ଯ୍ୟନ୍ତ କୋର୍ଟ ବନ୍ଦ ରହିବା କାରଣରୁ ଅକ୍ଟୋବର ୨୦ରେ ରାୟ ଆସିବ। ଆର୍ୟନ ଖାନଙ୍କୁ ଏବେ ଆର୍ଥର ରୋଡ ଜେଲରେ ରଖାଯାଇଛି। ଜେଲରେ ସେ ବହୁତ ଅବସାଦରେ ରହୁଥିବା ଜେଲ ସୂତ୍ରରୁ ଜଣାପଡିଛି। ବିଳାସପୂର୍ଣ୍ଣ ଜୀବନ ଯାପନ କରୁଥିବା ଆର୍ୟନଙ୍କୁ ଜେଲରେ ଦିନ ରାତି କାଟିବା କଷ୍ଟକର ହୋଇପଡିଛି। ଯାହା ପାଇଁ ସେ ବହୁ ଚିନ୍ତାରେ ଥିବା ନଜର ଆସୁଛନ୍ତି। ଜେଲ ଭିତରେ ତାଙ୍କୁ ଖାପଖୁଆଇବା ପାଇଁ ସମୟ ଲାଗିବ ବୋଲି ଜେଲ ଅଧିକାରୀ ମାନେ କହିଛନ୍ତି।
ଜେଲ ଭିତରେ ଦୁନିଆ ସଂପୂର୍ଣ୍ଣ ଅଲଗା। ତେବେ ସୁରକ୍ଷା କାରଣରୁ ଆର୍ୟନ ଓ ଅନ୍ୟ ଅଭିଯୁକ୍ତ ମାନଙ୍କୁ ଅଲଗା ଅଲଗା ବାରାକରେ ରଖାଯାଇଛି। କ୍ରୁଜ ଡ୍ରଗ୍ସ ମାମଲାରେ ଗିରଫ ହୋଇଥିବା ଅଭିଯୁକ୍ତଙ୍କ ସହ ତାଙ୍କୁ ରଖାଯାଇନି। ଜେଲରେ ଅନ୍ୟ କଏଦୀଙ୍କ ପରି ସେ ସମାନ ଖାଦ୍ୟ ଖାଉଛନ୍ତି; ଯାହା ତାଙ୍କୁ ବିଲକୁଲ ବି ପସନ୍ଦ ଆସୁନାହିଁ।ବାହାର ଖାଇବା କି ଘର ଖାଇବା ଆର୍ୟନଙ୍କୁ ଦିଆଯିବା ନେଇ ଅନୁମତି ନାହିଁ। ଜେଲ ଭିତରେ ଥିବା କ୍ୟାଣ୍ଟିନରୁ ସେ ଯାହା ବି କିଣୁଛନ୍ତି ତାହା ତାଙ୍କ ମନି ଅର୍ଡର ଟଙ୍କାରୁ କଟାଯାଉଛି। ତେବେ ଆର୍ୟନ ଏବେ ଘରୁ ଆସିଥିବା ପୋଷାକ ହିଁ ପିନ୍ଧୁଛନ୍ତି। ତାଙ୍କୁ ଜେଲର କପଡା ପିନ୍ଧିବାକୁ ଦିଆଯାଇନି।
ସେ ସକାଳ ୬ରୁ ଉଠୁଛନ୍ତି। ଠିକ ୭ଟା ବେଳେ ଜଳିଖିଆ ଖାଇବାକୁ ମିଳୁଛି। ଆଉ ୧୧ ଟା ରେ ମଧ୍ୟାହ୍ନ ଭୋଜନ। ସେହିପରି ସନ୍ଧ୍ୟା ଠିକ ୬ଟାରେ ରାତ୍ରି ଖାଇବା ମିଳୁଛିା ଏବଂ ସବୁ ବାରାକ ୬ଟାରେ ବନ୍ଦ ହୋଇଯାଇଥାଏ। ବାହାରୁ କାହାକୁ ବି ଭିତରକୁ ଆସିବାକୁ ଅନୁମତି ଦିଆଯାଏ ନାହିଁ। କଏଦୀ ମାନେ ଦ୍ୱିପହରରେ ଜେଲ ଭିତରେ ବୁଲାବୁଲି କରିପାରିବେ। ତେବେ ଆର୍ୟନ ଖାନଙ୍କ ଉପରେ ଜେଲ ଅଧିକାରୀ ମାନେ ପୂରା ନଜର ରଖିଛନ୍ତି।
ଅକ୍ଟୋବର ୩ରେ ମୁମ୍ବାଇରୁ ଗୋଆ ଯାଉଥିବା କ୍ରୁଜରେ ଏନସିବି ଛାପା ମାରିଥିଲା। ସମୁଦ୍ର ମଝିରେ କ୍ରୁଜରେ ଡ୍ରଗ୍ସ ପାର୍ଟି ଚାଲିଥିବା ବେଳେ ଚଢାଉ କରିଏନସିବି ଆର୍ୟନଙ୍କ ସମେତ ୮ଜଣଙ୍କୁ ଗିରଫ କରିଥିଲା। ଏହା ପରେ ସମସ୍ତଙ୍କୁ ପଚରାଉଚରା ପରେ ଗିରଫ କରାଯାଇଥିଲା। ଏନସିବି ହେପାଜତ ଶେଷ ହେବା ପରେ ଆର୍ୟନଙ୍କ ଜାମିନ ଆବେଦନ ମୁମ୍ବାଇ କୋର୍ଟ ଖାରଜ କରିଥିଲେ।ଏହା ପରେ ତାଙ୍କୁ ଆର୍ଥର ରୋଡ ଜେଲକୁ ପଠାଇଦିଆଯାଇଛି।