ଜମ୍ମୁ କାଶ୍ମୀର: ପୁଲୱାମାରେ ସୁରକ୍ଷାକର୍ମୀ ଓ ଆତଙ୍କବାଦୀ ମୁହାଁମୁହିଁ। ପୁଲୱାମା ପମ୍ପୋରରେ ଆତଙ୍କବାଦୀ ଓ ସୁରକ୍ଷାକର୍ମୀଙ୍କ ମଧ୍ୟରେ ଗୁଳିବିନିମୟ ଜାରି ରହିଛି। ସୂଚନା ରହିଛି ଯେ, ସୁରକ୍ଷା କର୍ମୀ ମାନେ ଲସ୍କର କମାଣ୍ଡର ଉମର ମୁସ୍ତାକ ଖାଣ୍ଡେକୁ ଘେରାବନ୍ଦୀ କରିଦେଇଛନ୍ତି। ଉମର ମୁସ୍ତାକ ଟପ ଟେନ ଆତଙ୍କୀଙ୍କ ମଧ୍ୟରୁ ଜଣେ।
କାଶ୍ମୀର ଆଇଜି ବିଜୟ କୁମାରଙ୍କ ସୂଚନା ଅନୁସାରେ, ପମ୍ପୋରର ଦଙ୍ଗବଲରେ ସୁରକ୍ଷାକର୍ମୀ ଓ ଆତଙ୍କବାଦୀ ମୁହାଁମୁହିଁ ହୋଇଛନ୍ତି। ଲସ୍କର କମାଣ୍ଡର ଉମର ମୁସ୍ତାକ ଖାଣ୍ଡେକୁ ଜମ୍ମୁ କାଶ୍ମୀର ପୁଲିସ ଘେରିଯାଇଛନ୍ତି। ମୁସ୍ତାକ କାଶ୍ମୀର ଭଗତରେ ୨ ପୁଲିସ କର୍ମଚାରୀଙ୍କ ମୃତ୍ୟୁ ସମେତ ଅନେକ ଆତଙ୍କୀ ଆକ୍ରମଣରେ ସମ୍ପୃକ୍ତ ଅଛି।
ଚଳିତ ବର୍ଷ ଫେବ୍ରୁଆରିରେ ମୁସ୍ତାକ ସାକିବ ସହ ସାକ୍ଷାତ ପରେ ପୁଲିସ କର୍ମୀଙ୍କୁ ଟାର୍ଗେଟ କରିଥିଲା। ଏହି ଆତଙ୍କବାଦୀ ମାନେ ବାରାଜୁଲ୍ଲା ଅଞ୍ଚଳର ଭଗତରେ ପୁଲିସ ପାର୍ଟି ଉପରେ ଗୁଳିଚାଳନା କରିଥିଲେ। ଏଥିରେ ୨ ପୁଲିସ କର୍ମୀ ସହିଦ ହୋଇଥିଲେ। ତେବେ ଏହି ଆତଙ୍କୀ ଆକ୍ରମଣ ସିସିଟିଭିରେ କଏଦ ହୋଇଥିଲା। ଗୁଳିମାଡ଼ କରି ଆତଙ୍କୀ ଫେରାର ହୋଇଯାଇଥିଲେ। ସାକିବ ମଂଜୁର ‘ଦି ରେଜିଷ୍ଟାନ୍ସ ଫ୍ରି ’ ସହିତ ଜଡିତ। ସେ ଶ୍ରୀନଗର ବାରଜୁଲ୍ଲାର ବାଗହାଟ ଅଞ୍ଚଳର ବାସିନ୍ଦା।
ଗତ କିଛି ଦିନ ହେବ ଜମ୍ମୁ କାଶ୍ମୀରରେ ଆତଙ୍କୀ ଆକ୍ରମଣ ବଢିଯାଇଛି। ନିକଟରେ ପୁଞ୍ଝ ଜିଲ୍ଲାରେ ସେନା ଓ ଜମ୍ମୁ କାଶ୍ମୀର ପୁଲିସ ମିଶି ଆତଙ୍କବାଦ ବିରୋଧୀ ଅପରେସନ କରିଥିଲେ। ଯେଉଁଥିରେ ୫ ଜଣ ଯବାନ ସହିଦ ହୋଇଥିଲେ। ଯବାନଙ୍କ ବଳିଦାନର ପ୍ରତିଶ୍ରୋଧ ନେବାକୁ ଯାଇ ୨୪ ଘଣ୍ଟା ମଧ୍ୟରେ ୬ ଜଣ ଆତଙ୍କବାଦୀଙ୍କୁ ଏନକାଉଣ୍ଟର କରିଥିଲେ ସେନା। ଏହି ଆତଙ୍କବାଦୀ ମାନେ ସାଧାରଣ ନାଗରିକଙ୍କୁ ଟାର୍ଗେଟ କରିବାକୁ ଷଡଯନ୍ତ୍ର କରିଥିଲେ।
ଅନନ୍ତନାଗରେ ସେନା ଦ୍ୱାରା ଜଣେ ଆତଙ୍କବାଦୀ ନିହତ ହୋଇଥିବା ବେଳେ ବାନ୍ଦିପୋରାରେ ଜଣେ ଓ ସୋପିଆନରେ ୪ ଜଣ ଆତଙ୍କବାଦୀଙ୍କୁ ନିହତ କରାଯାଇଥିଲା।