ଦିଲ୍ଲୀରେ ସୀମା ଟପିଲାଣି ପ୍ରଦୂଷଣ । ପ୍ରଦୂଷଣକୁ ନିୟନ୍ତ୍ରଣ କରିବା ଏବେ ବଡ଼ ଚ୍ୟାଲେଞ୍ଜ ହୋଇଥିବା ବେଳେ ସମସ୍ତ ସ୍କୁଲ,କଲେଜ ବନ୍ଦ ନେଇ ଘୋଷଣା କରାଯାଇଛି । ପରବର୍ତ୍ତି ନିର୍ଦ୍ଦେଶ ପର୍ଯ୍ୟନ୍ତ ସ୍କୁଲ, କଲେଜ ବନ୍ଦ ରହିବ । ଛାତ୍ରଛାତ୍ରୀଙ୍କ ପୁଣି ଥରେ ଅନଲାଇନ କ୍ଲାସ ଆରମ୍ଭ ହେବ । କରୋନା ସଂକ୍ରମଣ ହ୍ରାସ ପାଇବା ପରେ ସ୍କୁଲ ,କଲେଜ ଖୋଲିଥିଲା । କିନ୍ତୁ ପ୍ରଦୂଷଣ ଯୋଗୁଁ ଏବେ ପୁଣି ଥରେ ପାଠପଢା ବନ୍ଦ କରିବାକୁ ପଡିଛି । କେନ୍ଦ୍ରୀୟ ପ୍ରଦୂଷଣ ନିୟନ୍ତ୍ରଣ ବୋର୍ଡ ପକ୍ଷରୁ ଏନେଇ ନିର୍ଦ୍ଦେଶ ଜାରି କରାଯାଇଛି । ଏପରିକି ପଡୋଶୀ ସହରରେ ବି ଏହି ନିର୍ଦ୍ଦେଶ ଲାଗୁ ହେବ ।
ସେହିପରି ନଭେମ୍ବର ୨୧ ଯାଏଁ ଟ୍ରକ ଚଳାଚଳ ଉପରେ କଟକଣା ଲାଗୁ କରାଯାଇଛି ।୫୦ ପ୍ରତିଶତ ଲୋକରେ କାମ କରିବାକୁ ନିର୍ଦ୍ଦେଶ ଦିଆଯାଇଛି । ୧୦ ଏବଂ ୧୫ ବର୍ଷରୁ ଅଧିକ ପୁରୁଣା ଗାଡ଼ି ଚଳାଚଳ ଉପରେ କଟକଣା ଲାଗୁ କରାଯାଇଛି । ଏପଟେ ଦିଲ୍ଲୀ ଓ ଏହାର ଆଖାପାଖ ଅ ଳରେ ଲଗାତର ବଢୁଥିବା ପ୍ରଦୂଷଣକୁ ନେଇ ଆଜି ସୁପ୍ରିମକୋର୍ଟରେ ଶୁଣାଣି ଅଛି । ଶୁଣାଣି ସକାଳ ପ୍ରାୟ ସାଢେ ୧୦ଟା ପାଖାପାଖି ହେବ । ଏହା ପୂର୍ବରୁ କେନ୍ଦ୍ର ଓ ରାଜ୍ୟକୁ ଚେତାବନୀ ଦେବା ସହ ପ୍ରଦୂଷଣ କମ କରିବା ନେଇ ତୁରନ୍ତ ପଦକ୍ଷେପ ନେବାକୁ କୋର୍ଟ କହିଥିଲେ ।
ଏପଟେ, ବାୟୁ ଗୁଣବତ୍ତା ପରିଚାଳନା ଆୟୋଗର ଭର୍ଚୁଆଲ ବୈଠକରେ କେନ୍ଦ୍ର ସରକାରଙ୍କ ପରିବେଶ ମନ୍ତ୍ରାଳୟର ସଚିବ ଆର.ପି ଗୁପ୍ତା, ଆୟୋଗର ଅଧ୍ୟକ୍ଷ ଏମ.ଏମ କୁଟି, ହରିୟାଣାର ମୁଖ୍ୟ ଶାସନ ସଚିବ, ଡିଜିପି ପ୍ରଶାନ୍ତ ଅଗ୍ରୱାଲ, ରାଜସ୍ଥାନର ମୁଖ୍ୟ ସଚିବ,ଦିଲ୍ଲୀ ସରକାରଙ୍କ ପିଡବ୍ଲୁଡ଼ି,ୟୁଡି, ପରିବହନ ଓ ଶିଳ୍ପ ଅଧିକାରୀମାନେ ଉପସ୍ଥିତ ଥିଲେ । ବୈଠକରେ ଶିଳ୍ପ ପ୍ରଦୂଷଣ, ଯାନାବାହାନ ପ୍ରଦୂଷଣ, ନିର୍ମାଣ କାର୍ଯ୍ୟ ଯୋଗୁ ପ୍ରଦୂଷଣ ଓ ବିଦ୍ୟୁତ ଉତ୍ପାଦନ କେନ୍ଦ୍ରର ନିର୍ଗତ ଧୂଆଁ ଉପରେ ଆଲୋଚନା ହୋଇଥିଲା । ଏହା ସହିତ ବୈଠକରେ ଜାରି କରାଯାଇଥିବା ଗାଇଡଲାଇନ କଡ଼ାକଡି ଭାବେ ପାଳନ ହେଉଥିବା ନେଇ ମଧ୍ୟ ଚର୍ଚ୍ଚା ହୋଇଥିଲା ।
ଦିଲ୍ଲୀରେ ମଙ୍ଗଳବାର ବାୟୁର ଗୁଣବତ୍ତା ର(ଏକ୍ୟୁଆଇ)୩୯୬ ରହିଥିଲା । ଲଗାତର ତୃତୀୟ ଦିନ ପାଇଁ ବାୟୁ ଗୁଣବତ୍ତା ବହୁ ଖରାପ ସ୍ତରରେ ରହିଥିବା ରେକର୍ଡ କରାଯାଇଥିଲା । ଏକ୍ୟୁଆଇ ସକାଳ ସମୟରେ ଗାଜିଆବାଦରେ ୩୪୯, ଗ୍ରେଟର ନୋଏଡାରେ ୩୫୯, ଗୁରଗାଓଁରେ ୩୬୩, ନୋଏଡାରେ ୩୮୨ ଥିଲା। ଦ୍ୱାରକା ସେକ୍ଟର ୮,ପଟପଡ଼ଗଞ୍ଜ,ଅଲିପୁର, ସାଦିପୁର, ପଞ୍ଜାବୀ ବାଗ ପରି କିଛି ସ୍ଥାନରେ ଏକ୍ୟୁଆଇ ୪୦୦ ଅତିକ୍ରମ କରିବା ସହିତ ଗୁରୁତର ବର୍ଗ ଥିଲା।