ଶନିବାର ବିସିସିଆଇର ବାର୍ଷିକ ବୈଠକରେ କେତେକ ଗୁରୁତ୍ୱପୂର୍ଣ୍ଣ ନିଷ୍ପତ୍ତି ନିଆଯାଇଛି । ଭାରତର ଦକ୍ଷିଣ ଆଫ୍ରିକା ଗସ୍ତ ସହ ଆଇପିଏଲରେ ମେଗା ନିଲାମୀ ନେଇ ଆଲୋଚନା କରାଯାଇ ଆଇପିଏଲ ଗଭର୍ଣ୍ଣିଂ କାଉନସିଲ ମେମ୍ବର ଭାବେ ଓଡିଆ ପୁଅ ପ୍ରଜ୍ଞାନ ଓଝାଙ୍କୁ ପୁନଃ ମନୋନୀତ କରାଯାଇଛ । ଏହା ସହ ଗତକାଲି ବସିଥିବା ବୈଠକରେ ଅଫିସିଆଲ ଷ୍ଟାଫ୍ ମାନଙ୍କ ବୟସ ସୀମା ୬୦ରୁ ୬୫କୁ ବୃଦ୍ଧି କରାଯାଇଛି । ଅର୍ଥାତ ଫିଟ ରହିଲେ ୬୫ ବର୍ଷରେ ଅବସର ନେବେ ।
ତେବେ ବୟସ ସୀମା ୬୦ରୁ ୬୫ ବର୍ଷ ବଢିବା ପଛର କାରଣ ମଧ୍ୟ ରହିଛି । ସୂତ୍ରରୁ ଜଣାପଡିଛି ଯେ, ଅମ୍ପାୟାର ମାନଙ୍କ ପାଇଁ ଏହି ନିୟମ ଘୋଷଣା ହୋଇଛି । ଜାଣିଥିବେ ଭାରତ-ନ୍ୟୁଜିଲାଣ୍ଡ ମଧ୍ୟରେ ଚାଲିଥିବା ଦ୍ୱିତୀୟ ଟେଷ୍ଟରେ ବିରାଟଙ୍କ ଆଉଟ ପାଇଁ ଥାର୍ଡ ଅମ୍ପାୟାରଙ୍କୁ ଟ୍ରୋଲ କରାଯାଉଛି । ଅମ୍ପାୟାରଙ୍କ କାମ ଉପରେ ପ୍ରଶ୍ନ କରାଯାଉଛି । ବିସିସିଆଇ ପାଖରେ ଏବେ ୧୪୩ ଜଣ ଅମ୍ପାୟାର ଅଛନ୍ତି । ବିସିସିଆଇ ଜଣେ ଅଭିଜ୍ଞ ଅମ୍ପାୟାରଙ୍କୁ ଖୋଜୁଛି । ସେଥିପାଇଁ ବିସିସିଆଇ ପାଖରେ ଥିବା କିଛି ପୁରୁଣା ଓ ଅଭିଜ୍ଞ ଅମ୍ପାୟାରଙ୍କ ବୟସ ସୀମା ବଢାଯାଇଛି ।
ମିଳିଥିବା ସୂଚନା ଅନୁସାରେ ବିସିସିଆଇରେ ଥିବା ୧୬ ଜଣ ଅମ୍ପାୟାରଙ୍କ ବୟସ ୫୫ରୁ ୬୦ ମଧ୍ୟରେ । ପ୍ରଥମେ ଏହା ୫୫ରୁ ୬୦ ଥିବା ବେଳେ ଏବେ ୬୦ରୁ ୬୫କୁ ବୃଦ୍ଧି କରାଯାଇଛି । ତେବେ ଅମ୍ପାୟାରଙ୍କ ସହ ଏହି ନିୟମ କୋଚିଂ ଷ୍ଟାଫ୍ଙ୍କ ପାଇଁ ମଧ୍ୟ ଲାଗୁ ହୋଇଛି । ତେବେ ବିସିସିଆଇକୁ ଆଗକୁ ଭଲ ଅମ୍ପାୟାର ପାଇବାକୁ ହେଲେ ଏବେଠୁ କିଛି କରିବାକୁ ପଡିବ ।
ତେବେ ଅମ୍ପାୟାରିଂ ଲାଇନରେ ଆସିବାକୁ ଯୁବପୀଢି ମନ ବଳାଉନାହାଁନ୍ତି । ଏବେ ବିସିସିଆଇର ଅନ୍ତର୍ଜାତୀୟ ପ୍ୟାନେଲରେ ୪ ଜଣ ଅମ୍ପାୟାର ଅଛନ୍ତି । ବିରେନ୍ଦ୍ର ଶର୍ମା,ଅନୀଲ ଚୌଧୁରୀ, ସମ୍ସମୁଦ୍ଦିନ ଓ ଅନନ୍ତ ପଦ୍ମନାଭନ । ଏବଂ ଆଇସିସିର ଏଲିଟ ପ୍ୟାନେଲରେ ଭାରତୀୟ ଭାବେ କେବଳ ନୀତିନ ମେନନ ରହିଛନ୍ତି ।