ରାଜ୍ୟରେ କରୋନା ସଂକ୍ରମଣ ଉପରମୁହାଁ । ଧୀରେ ଧୀରେ ଅଣାୟତ୍ତ ହେଉଛି ସ୍ଥିତି ଗତକାଲି ୧୨୧୬ ଆକ୍ରାନ୍ତ ଚିହ୍ନଟ ହୋଇଥିବା ବେଳେ ଆଜି ୧୮୯୭ ଆକ୍ରାନ୍ତ ଚିହ୍ନଟ ହୋଇଛନ୍ତି । ଓମିକ୍ରନ ଭ୍ୟାରିଆଣ୍ଟ ଯୋଗୁ ସଂକ୍ରମଣ ଲମ୍ବା ଡିଆଁ ମାରୁଛି । ରାଜ୍ୟର ୪ ଜିଲ୍ଲାରେ କରୋନା ସ୍ଥିତି ଚିନ୍ତା ବଢାଇଛି । ମୋଟ ସଂକ୍ରମିତଙ୍କ ମଧ୍ୟରୁ ଖୋର୍ଦ୍ଧା, ସୁନ୍ଦରଗଡ, ସମ୍ବଲପୁର,କଟକରେ ଅଧିକ ସଂକ୍ରମିତ ଚିହ୍ନଟ ହେଉଛନ୍ତି । ଗତ ୨୪ ଘଣ୍ଟା ରେ ଖୋର୍ଦ୍ଧାରେ ସର୍ବାଧିକ ୬୬୯ ଆକ୍ରାନ୍ତ ଚିହ୍ନଟ ହୋଇଛନ୍ତି । ସେହିପରି ତା ପଛକୁ ରହିଛି ସୁନ୍ଦରଗଡ । ସୁନ୍ଦରଗଡରେ ୨୬୨ ସଂକ୍ରମିତ ମାମଲା ସାମନାକୁ ଆସିଛି । ସମ୍ବଲପୁରରେ ବି ୧୨୫ ଜଣ, କଟକରୁ ୧୪୮ ଜଣ ଆକ୍ରାନ୍ତ ଚିହ୍ନଟ ହୋଇଛନ୍ତି । ବାଲେଶ୍ୱରେ ମଧ୍ୟ ସଂକ୍ରମିତଙ୍କ ସଂଖ୍ୟା ୧୦୦ରେ ପହଞ୍ଚିଛି।
ସେହିପରି ମୋଟ ଆକ୍ରାନ୍ତଙ୍କ ମଧ୍ୟରୁ ୦-୧୮ ବର୍ଷ ମଧ୍ୟରେ ୨୫୮ ଜଣ ଅଛନ୍ତି । ରାଜ୍ୟରେ ଏବେ ମୋଟ ଆକ୍ରାନ୍ତଙ୍କ ସଂଖ୍ୟା ୧୦ ଲକ୍ଷ ୫୯ ହଜାର ୭୭୩କୁ ବୃଦ୍ଧି ପାଇଛି । ଏବେ ସକ୍ରିୟ ସଂକ୍ରମିତଙ୍କ ସଂଖ୍ୟା ରହିଛି ୫ ହଜାର ୭୩୯ । ରାଜ୍ୟରେ ଗତ ୬ ଦିନରେ ୫ହଜାରରୁ ଅଧିକ ମାମଲା ସାମ୍ନାକୁ ଆସିଲାଣି ।
କିଛି ଦିନ ହେବ ରାଜ୍ୟରେ କରୋନା ସଂକ୍ରମଣରେ ଲଗାତର ବୃଦ୍ଧି ପାଉଛି । ଏହାକୁ ନଜରରେ ରଖି ରାଜ୍ୟରେ କଟକଣା ମଧ୍ୟ ଲାଗୁ କରାଯାଇଛି । ସମସ୍ତ ସହରାଞ୍ଚଳରେ ରାତି ୯ରୁ ନାଇଟ କର୍ଫ୍ୟୁ ଲାଗୁ କରାଯାଇଛି । ସ୍କୁଲ, କଲେଜରେ ଦ୍ୱାଦଶ ଶ୍ରେଣୀ ପର୍ଯ୍ୟନ୍ତ ପାଠପଢା ବନ୍ଦ ରହିଛି । ବିବାହ,ବ୍ରତଘର,ଅନ୍ତେଷ୍ଟି କ୍ରିୟାରେ ମଧ୍ୟ କମ ଲୋକଙ୍କ ସାମିଲ ନେଇ ପ୍ରତିବନ୍ଧକ ଲଗାଯାଇଛି । ମାର୍କେଟରେ ଯେଭଳି ଅଧିକ ଗହଳି ନହେବ ସେ ନେଇ ଦୋକାନ ଓ ମଲ ମାଲିକଙ୍କୁ ପରାମର୍ଶ ଦିଆଯାଇଛି ।