ଦିଲ୍ଲୀରେ କରୋନା ଓ ଓମିକ୍ରନ ସଂକ୍ରମିତଙ୍କ ମାମଲା ଦ୍ରୁତ ଗତିରେ ବଢୁଥିବାରୁ କୋଭିଡ଼ କଟକଣା ଆହୁରି ବଢାଇଦିଆଯାଇଛି । କରୋନା ମାମଲା ହଠାତ ବୃଦ୍ଧି ପରେ ଦିଲ୍ଲୀରେ ଲକଡାଉନ ଭଳି କଟକଣା ଜାରି କରାଯାଇଛି । ଦିଲ୍ଲୀ ବିପର୍ଯ୍ୟୟ ପରିଚାଳନା ପ୍ରାଧିକରଣ ଏହାର ନିର୍ଦ୍ଦେଶ ଜାରି କରିଛନ୍ତି । ଦିଲ୍ଲୀରେ ଲକଡାଉନ ଲାଗୁ କରାଯାଇନାହିଁ କିନ୍ତୁ ଲକଡାଉନ ଭଳି କଟକଣା ଲାଗୁ କରାଯାଇଛି । ସମସ୍ତ ଘରୋଇ ଅଫିସ ବନ୍ଦ କରିବା ପାଇଁ ନିର୍ଦ୍ଦେଶ ଜାରି ରହିଛି । ସ୍କୁଲ ,କଲେଜ ପ୍ରଥମରୁ ହିଁ ବନ୍ଦ ରହିଛି । କୌଣସି ପ୍ରକାର ଭିଡ ଜମାଇବାକୁ ବାରଣ କରାଯାଇଛି । ଆବଶ୍ୟକ ନଥିଲେ ଘରୁ ବାହାରିବାକୁ ମନା କରାଯାଇଛି।
ଘରୋଇ ଅଫିସ ବନ୍ଦ
ଦିଲ୍ଲୀରେ ସବୁ ଘରୋଇ ଅଫିସ ବନ୍ଦ କରିବା ପାଇଁ ନିର୍ଦ୍ଦେଶ ରହିଛି ।ସମସ୍ତ କର୍ମଚାରୀ ୱାର୍କ ଫ୍ରମ ହୋମରେ କାମ କରିବେ । କେବେଳ ଜରୁରୀ ସେବା ସହ ଜଡିଓ ଘରୋଇ ଅଫିସ ଖୋଲିବା ପାଇଁ କୁହାଯାଇଛି ।ପୂର୍ବରୁ ଦିଲ୍ଲୀର ଘରୋଇ ଅଫିସ ୫୦ ପ୍ରତିଶତ କର୍ମଚାରୀଙ୍କୁ ନେଇ ଚାଲିଥିଲା । ୫୦ ପ୍ରତିଶତ କର୍ମଚାରୀ ଘରୁ ଓ ୫୦ କର୍ମଚାରୀ ଅଫିସରେ କାମ କରିବେ ବୋଲି ନିର୍ଦ୍ଦେଶ ଜାରି କରାଯାଇଥିଲା ।
ରେଷ୍ଟୁରାଣ୍ଟ , ବାର ବନ୍ଦ
ଏବେ ରାଜ୍ୟରେ ସମସ୍ତ ହୋଟେଲ ଓ ରେଷ୍ଟୁରାଣ୍ଟ ମଧ୍ୟ ବନ୍ଦ ରହିବ । ରେଷ୍ଟୁରାଣ୍ଟ ଗୁଡିକ ଖାଦ୍ୟ ହୋମ ଡେଲିଭରି କରିବେ ବୋଲି କୁହାଯାଇଛି । ରେଷ୍ଟୁରାଣ୍ଟ ରେ ବସିକି ଖାଦ୍ୟ ଖାଇବାକୁ ଅନୁମତି ନାହିଁ । ପୂର୍ବରୁ ୫୦ ପ୍ରତିଶତ କ୍ଷମତାରେ ସବୁ ରେଷ୍ଟୁରାଣ୍ଟ ଓ ହୋଟେଲ ଖୋଲିବାକୁ ଅନୁମତି ଥିଲା ।
କେଉଁମାନଙ୍କ କୋହଳ କଟକଣା?
ସୁପ୍ରିମକୋର୍ଟ,ହାଇକୋର୍ଟ, ଜିଲ୍ଲା କୋର୍ଟ ଜଜ୍,ଓକିଲଙ୍କ ପାଇଁ କଟକଣା କୋହଳ ରହିବ । କୌଣସି ମାମଲାର ଶୁଣାଣୀ ସହ ଜଡିତ ଲୋକ ଘରୁ ବାହାରକୁ ବାହାରିପାରିବେ । ତେବେ ଆଇଡି କାର୍ଡ ଦେଖାଇବା ଜରୁରୀ ଅଟେ । ଦୂତବାସରେ କାମ କରୁଥିବା କର୍ମଚାରୀ ଆଇଡି କାର୍ଡ ଦେଖାଇ ଯାତାୟାତ କରିପାରିବେ ।ଘରୋଇ ଡାକ୍ତର, ନର୍ସିଂ ଷ୍ଟାଫ,ପାରାମେଡିକାଲ ଷ୍ଟାଫ,ସ୍ୱାସ୍ଥ୍ୟ ସେବା ସହିତ ଜଡିତ ଲୋକ ଘରୁ ବାହାରକୁ ବାହାରିପାରିବେ । ଟିକାକରଣ ପାଇଁ ମଧ୍ୟ ଘରୁ ବାହାରିପାରିବେ । ସେହିପରି ବିମାନବନ୍ଦର,ରେଳଷ୍ଟେସନ, ବସ ଷ୍ଟାଣ୍ଡରୁ ଯାତ୍ରୀ ଯିବା ଆସିବା କରିପାରିବେ । ଗଣମାଧ୍ୟମ ପ୍ରତିନିଧିଙ୍କ ପାଇଁ ମଧ୍ୟ କଟକଣା କୋହଳ ରହିଛି ।
ମେଟ୍ରୋ ଓ ବସ ପାଇଁ କଣ ନିୟମ?
ମେଟ୍ରୋ ଓ ବସ ପୁରା କ୍ଷମତାରେ ଚାଲିବ । ମେଟ୍ରୋରେ ଯାତ୍ରୀ ଛିଡା ହୋଇ ଯାତ୍ରା କରିପାରିବେ ନାହିଁ । ଡିଟିସି ବସରେ ମଧ୍ୟ ୧୦୦ ପ୍ରତିଶତ ଯାତ୍ରୀ ଯିବା ନେଇ ଅନୁମତି ରହିଛି । କିନ୍ତୁ ବସରେ ବି ଯାତ୍ରୀ ଛିଡା ହୋଇ ଯାଇପାରିବେ ନାହିଁ । ଦିଲ୍ଲୀରେ ଗତ ୨୪ ଘଣ୍ଟା ରେ ୧୯ ହଜାର ୧୬୬ ନୂଆ ମାମଲା ଆସିଛି । ୧୭ ଜଣଙ୍କ ଜୀବନ ଯାଇଛି କରୋନାରେ । ଦିଲ୍ଲୀରେ ସକ୍ରିୟ ସଂକ୍ରମିତଙ୍କ ସଂଖ୍ୟା ୨୫ ହଜାରରେ ପହଁଞ୍ଚି ଯାଇଛି। ଯାହା ଚିନ୍ତାଜନକ ।