ଭାରତରେ ଗତ କିଛି ଦିନ ହେବ ଦେଶରେ ୩ଲକ୍ଷ ଉପରେ ସଂକ୍ରମିତ ଚିହ୍ନଟ ହେଉଛନ୍ତି । ଅଧିକାଂଶ ବିଶେଷଜ୍ଞଙ୍କ କହିବା ଅନୁସାରେ ଭାରତରେ କରୋନାର ତୃତୀୟ ଲହର ଆସିସାରିଛି । ଏହାରି ଭିତରେ ଆଇଆଇଟି ମାଦ୍ରାସ ପକ୍ଷରୁ ଆଶ୍ୱସ୍ତି ଖବର ଆସିଛି । ଆଇଆଇଟି ମାଡ୍ରାସର ବିଶେଷଜ୍ଞଙ୍କ ଅନୁଯାୟୀ, କ୍ରମାଗତ ଦ୍ୱିତୀୟ ସପ୍ତାହ ପାଇଁ ଭାରତର ଆର ଭାଲ୍ୟୁ ମୂଲ୍ୟ ହ୍ରାସ ପାଇଛି । ଭାରତରେ କରୋନା ସଂକ୍ରମଣ ବ୍ୟାପିବା ପରେ ଜାନୁଆରୀ ୧୪ରୁ ଜାନୁଆରୀ ୨୧ ମଧ୍ୟରେ ଆର ଭାଲ୍ୟୁ ୧.୫୭ ପ୍ରତିଶତକୁ ହ୍ରାସ ପାଇଛି ।
ଅନୁସନ୍ଧାନକାରୀ ବିଶେଷଜ୍ଞଙ୍କ ଅନୁଯାୟୀ, ଆସନ୍ତା ୧୪ ଦିନ ମଧ୍ୟରେ ଫେବୃଆରୀ ୬ ଭିତରେ କରୋନା ସଂକ୍ରମଣ ପିକ୍ ଛୁଇଁବାର ସମ୍ଭାବନା ଅଧିକ ରହିଛି । ଏହା ପୂର୍ବରୁ ପୂର୍ବାନୁମାନ କରାଯାଇଥିଲା ଯେ, ଫେବୃଆରୀ ୧ରୁ ୧୫ ଫେବୃଆରୀ ଭିତରେ ତୃତୀୟ ଲହର ଶୀର୍ଷ ଛୁଇଁବ । ଆର ଭାଲ୍ୟୁରୁ ଜଣାପଡେ ଯେ, ଜଣେ ବ୍ୟକ୍ତି କେତେଜଣଙ୍କୁ ସଂକ୍ରମିତ କରିପାରେ । ଯଦି କିଛି କରୋନା ସଂକ୍ରମିତଙ୍କ ଆର ଭାଲ୍ୟୁ ଏକ ରହିଛି, ତାପାଖରୁ ଆଉ ଜଣେ ବ୍ୟକ୍ତିକୁ ସଂକ୍ରମିତ କରିବାର ବିପଦ ରହିଛି । ସେହିପରି ଯେଉଁ ବ୍ୟକ୍ତିର ଆର ଭାଲ୍ୟୁ ୩ ରହିଛି, ସେ ୩ ଜଣଙ୍କୁ ସଂକ୍ରମିତ କରିପାରିବ ।
ଆଇଆଇଟି ମାଦ୍ରାସ ବିଶେଷଜ୍ଞଙ୍କ ଅନୁସାରେ, ଜାନୁଆରୀ ୧୪ରୁ ୨୧ ଜାନୁଆରୀ ମଧ୍ୟରେ ଆର ଭାଲ୍ୟୁ ୧.୫୭ ରେକର୍ଡ କରାଯାଇଛି । ଜାନୁଆରୀ ୭ରୁ ୧୩ ମଧ୍ୟରେ ୨.୨, ଓ ୧ରୁ ୬ ଜାନୁଆରୀ ମଧ୍ୟରେ ୪ ଏବଂ ଡିସେମ୍ବର ୩୧ ମଧ୍ୟରେ ୨.୯ ଆର ଭାଲ୍ୟୁ ଥିଲା । । ଆଇଆଇଟି ମାଦ୍ରାସର ଗଣିତ ବିଭାଗର ସହାୟକ ପ୍ରଫେସର ଡାକ୍ତର ଜୟନ୍ତ ଝା କହିଛନ୍ତି ଯେ, ମୁମ୍ବାଇ ଏବଂ କୋଲକତାର ଆର ଭାଲ୍ୟୁରୁ ଜଣାପଡୁଛି ଯେ, ସେଠାରେ ସଂକ୍ରମଣ ଶୀର୍ଷରେ ପହଞ୍ଚି ସାରିଛି । ସେହିପରି ଦିଲ୍ଲୀ ଏବଂ ଚେନ୍ନାଇରେ ଏବେ ଶୀର୍ଷ ଛୁଇଁବା ପାଖାପାଖି ରହିଛି ।