• ଗୀତ ବାଜିଲେ, ଭୋଟ ବଢିବ ପଞ୍ଚାୟତ ନିର୍ବାଚନରେ ଏହି ଫର୍ମୁଲା ବିଜେଡିକୁ କେତେ ସୁହାଇବ?
• ଗୀତ ବାଜୁଛି ମୋବାଇଲରେ, ନବୀନ ପହଞ୍ଚିଲେଣି ଘରେ ଘରେ

ଭୁବନେଶ୍ୱର: ପଞ୍ଚାୟତ ନିର୍ବାଚନ ହେଉଥିଲେ ମଧ୍ୟ ଏବେ ଗାଁ ଦାଣ୍ଡ ପୂରା ଶାନ୍ତ ପଡିଛି । କରୋନା କଟକଣା ପାଇଁ ବଡ ଧରଣର ରାଲି ହେଉନି କି ଗାଁ ଦାଣ୍ଡରେ କୋଳାହଳ ନାହିଁ । ପ୍ରାର୍ଥୀ ମାତ୍ର ହାତଗଣତି କେଇ ଜଣଙ୍କୁ ଧରି ପ୍ରଚାର ମୈଦାନକୁ ଓହ୍ଲାଉଛନ୍ତି, ଯାହା ପଞ୍ଚାୟତ ନିର୍ବାଚନର ଉଷ୍ମତାକୁ କିଛି ମାତ୍ରାରେ ଶିଥିଳ କରିଛି । କଟକଣା ପାଇଁ ପ୍ରାର୍ଥୀ ସିନା ଭୋଟରଙ୍କ ପାଖେ ପହଞ୍ଚି ପାରୁନାହାନ୍ତି କିନ୍ତୁ ବିଜେଡି ସୁପ୍ରିମୋ ନବୀନ ପଟ୍ଟନାୟକ ଗାଁ ଗହଳିରେ ଘରେ ଘରେ ପହଞ୍ଚିଲେଣି । ଆଉ ତାହା ବି ପୁଣି ମୋବାଇଲ ମାଧ୍ୟମରେ । ଗାଁ ଗହଳିରେ ପିଲାଠୁ ବୟସ୍କଙ୍କ ନଜରରେ ଏବେ ନବୀନ ହେଉଛନ୍ତି ରଜା । ଏକଥା ଆମେ କହୁନାହୁଁ, ବରଂ ପିଲାଠୁ ବୁଢା ଏମିତି କିଛି ଗୁଣୁଗୁଣୁ ହେଉଥିବାର ଶୁଣିବାକୁ ପାଇଲୁ । ଆଉ ବୁଝୁ ବୁଝୁ ଜାଣିବାକୁ ପାଇଲୁ ନବୀନଙ୍କ ନାଁରେ କିଛି ଏଭଳି ଗୀତ ଏବେ ସୋସିଆଲ ମିଡ଼ିଆରେ ଭାଇରାଲ ହେବାରେ ଲାଗିଛି । ଅଥାର୍ତ ଗୀତ ମାଧ୍ୟମରେ ଏବେ ନବୀନ ଘରେ ଘରେ । ତେବେ ଗୀତରେ ଏମିତି କଣ ଅଛି ତାହା ଜାଣିବାକୁ ପୂରା ଗୀତ ଶୁଣିଲୁ । ଆଉ ଗୀତ ଶୁଣିବା ପରେ ଲାଗିଲା, କରୋନା କଟକଣା ଭିତରେ ବିରୋଧୀଙ୍କୁ ନିର୍ବାଚନରେ ମାତ୍ ଦେବାକୁ ଏହା ଠାରୁ ବଡ ଅସ୍ତ୍ର ବିଜେଡି ପାଇଁ ଆଉ ବୋଧହୁଏ କିଛି ହୋଇନଥାନ୍ତା ।

ପଞ୍ଚାୟତ ନିର୍ବାଚନ ପୂର୍ବରୁ ନବୀନଙ୍କ ନାଁରେ ଯେଉଁ ଗୀତ ବାହାରିଛି ତାହା କେବଳ ବିଜେଡିର ପ୍ରଚାରକୁ ସହଜ କରିନି ବରଂ ରାଜ୍ୟ ସରକାରଙ୍କ ସଫଳତାକୁ ଲୋକଙ୍କ ସାମ୍ନାକୁ ଆଣିଛି । ଗୀତର ପ୍ରତିଟି ଧାଡିରେ ଶିକ୍ଷା ଠାରୁ ସ୍ୱାସ୍ଥ୍ୟ, କୃଷି ଠାରୁ କ୍ରୀଡା, ଜନ୍ମ ଠାରୁ ଆରମ୍ଭ କରି ମୃତ୍ୟୁ ପର୍ଯ୍ୟନ୍ତ ସରକାରଙ୍କ ବିଭିନ୍ନ ବିକାଶମୂଳକ କାର୍ଯ୍ୟର ଝଲକ ଦେଖିବାକୁ ମିଳିଛି । ଗରିବ ଓ ଅସହାୟଙ୍କ ପାଇଁ ନବୀନ କିଭଳି ସହାୟତାର ହାତ ବଢାଇଛନ୍ତି, ମହିଳାଙ୍କୁ ସଶକ୍ତ ଓ ସ୍ୱାବଲମ୍ବୀ କରିବାକୁ ପ୍ରୟାସ କରିଛନ୍ତି ତାହା ଦର୍ଶାଯାଇଛି । ବିପର୍ଯ୍ୟୟ ମାଡରେ ଧ୍ୱସ୍ତବିଧ୍ୱସ୍ତ ହୋଇପଡିଥିବା ଓଡ଼ିଶାକୁ ବିକଶିତ କରିବାକୁ ନବୀନ କିଭଳି ବିଶ୍ୱକର୍ମା ସାଜିଛନ୍ତି ସେ ବାବଦରେ ଉଲ୍ଲେଖ କରାଯାଇଛି । ଯାହାଦ୍ୱାରା ନବୀନଙ୍କୁ ନେଇ ଲୋକଙ୍କ ମନରେ କେବଳ କ୍ରେଜ ବଢୁନି ବରଂ ବିଜେଡିର ଭୋଟବ୍ୟାଙ୍କରେ ଅଧିକରୁ ଅଧିକ ଭୋଟରଙ୍କ ସଂଖ୍ୟା ଯୋଡି ହୋଇ ଯାଉଛି । ଆଉ ଗୀତ ମାଧ୍ୟମରେ ଭୋଟରଙ୍କ ପାଖରେ ପହଞ୍ଚିବାର ଏହି ଷ୍ଟ୍ରାଟେଜି ବିରୋଧୀଙ୍କ ଠାରୁ ବିଜେଡିକୁ ପଞ୍ଚାୟତ ନିର୍ବାଚନରେ ଦୁଇ ପାଦ ଆଗରେ ରଖିଛି ।

ସାଧାରଣତଃ ମଣିଷର ପ୍ରବୃତ୍ତି ହେଉଛି ଯେଉଁ ସଙ୍ଗୀତ ଭଲ ଲାଗିଥାଏ ତାହାକୁ ବେଶ କିଛି ଦିନ ପର୍ଯ୍ୟନ୍ତ ଗୁଣୁଗୁଣାଉ ଥାଏ । ନବୀନଙ୍କୁ ନେଇ ତିଆରି ହୋଇଥିବା ଗୀତକୁ ନେଇ ମଧ୍ୟ କିଛି ସେଭଳି ଦେଖିବାକୁ ମିଳୁଛି । ଗୀତ ମାଧ୍ୟମରେ ଗାଁ ଗହଳିର ପ୍ରତିଟି ଘରେ ପହଞ୍ଚିବାକୁ ଯେଉଁ ଅଙ୍କ କଷା ହୋଇଥିଲା ତାହା ଏକପ୍ରକାର ସଫଳ ହୋଇଛି । କାରଣ ପଞ୍ଚାୟତ ନିର୍ବାଚନ ପୂର୍ବରୁ ହିଁ ଏହି ଗୀତକୁ ରିଲିଜ କରାଯାଇଥିଲା । ଆଉ ଏହି ଗୀତକୁ ଲୋକେ ଏତେ ଶୀଘ୍ର ମନରୁ ପାଶୋରିବାର ପ୍ରଶ୍ନ ମଧ୍ୟ ଉଠୁନାହିଁ । କାରଣ ସୋସିଆଲ ମିଡ଼ିଆ ଖୋଲିବା କ୍ଷଣି କେଉଁ ନା କେଉଁ ବାଟରେ ଏହା ୟୁଜର୍ସଙ୍କ ପ୍ରୋଫାଇଲରେ ଆପଣାଛାଏଁ ଆସୁଛି । ଯାହା ଲୋକଙ୍କ ମନରେ ବିଜେଡି ଓ ନବୀନଙ୍କ ପ୍ରତି ଏକ ପଜିଟିଭ୍ ଇମେଜ୍ ତିଆରି କରି ସାରିଲାଣି । ତେଣୁ ପଞ୍ଚାୟତ ନିର୍ବାଚନରେ ଭୋଟରଙ୍କୁ ପ୍ରଭାବିତ କରିବାରେ ଗୀତ ଫର୍ମୁଲା ବିଜେଡିକୁ ବେଶ ସୁହାଇବ ବୋଲି କୁହାଯାଉଛି । ଯେଉଁଥିପାଇଁ ପଞ୍ଚାୟତ ନିର୍ବାଚନ ପୂର୍ବରୁ ନବୀନଙ୍କୁ ନେଇ ବ୍ୟାକ୍ ଟୁ ବ୍ୟାକ୍ ଗୀତ ରିଲିଜ୍ କରାଯାଉଛି । କାରଣ ଗୀତ ବାଜିଲେ ହିଁ ଭୋଟ ବଢୁଛି । ଗୀତ ମାଧ୍ୟମରେ କିଭଳି ଭୋଟରଙ୍କ ଭରସା ଜିତିହୁଏ ତାହାର ଉଦାହରଣ ପୂର୍ବରୁ ମଧ୍ୟ ଦେଖିବାକୁ ମିଳିଛି ।

୨୦୧୯ ନିର୍ବାଚନର ଠିକ୍ ପୂର୍ବରୁ ହିଁ ନବୀନଙ୍କୁ ନେଇ ଏମିତି ଏକ ଜୋରଦାର ଭାଇରାଲ ହୋଇଥିଲା । ଗାଁରୁ ସହର, ସଭାରୁ ପ୍ରଚାର ସବୁଠି ଶୁଭିଥିଲା ହେ ନବୀନ ବାବୁ ଆମେ ତମ ଫ୍ୟାନ୍ । ଆଉ ଏହି ଗୀତରେ ମଧ୍ୟ ନବୀନଙ୍କ ବିକାଶମୂଳକ କାର୍ଯ୍ୟକୁ ସ୍ଥାନ ଦିଆଯାଇଥିଲା । ଏହି ଗୀତକୁ ସେତେବେଳେ ଲୋକେ ବେଶ ପସନ୍ଦ କରିଥିଲେ, ଆଉ ଏହାର ପ୍ରଭାବ ଭୋଟରେ ଦେଖିବାକୁ ମିଳିଥିଲା । ଆଉ ସତରେ ମଧ୍ୟ ନବୀନଙ୍କ ଫ୍ୟାନ୍ ହୋଇ ଯାଇଥିଲେ ଓଡ଼ିଶାବାସୀ, ପଞ୍ଚମଥର ପାଇଁ ବିଜେଡିକୁ ଶାସନ କ୍ଷମତାକୁ ଆଣି ନବୀନଙ୍କୁ ମୁଖ୍ୟମନ୍ତ୍ରୀ ଆସନରେ ବସାଇଥିଲେ । ଆଉ ଏବେ ପଞ୍ଚାୟତ ନିର୍ବାଚନ ପୂର୍ବରୁ ସେହି ସମାନ ଫର୍ମୁଲା ଆପଣାଇଛି ବିଜେଡି କ୍ୟାମ୍ପ । ଯେହେତୁ କରୋନା କଟକଣା ପାଇଁ ନବୀନ ପ୍ରଚାର ମୈଦାନକୁ ଓହ୍ଲାଇବେ ନାହିଁ ତେଣୁ ଲୋକଙ୍କ ପାଖରେ ପହଞ୍ଚିବାକୁ ମୋବାଇଲ ମାଧ୍ୟମ ସାଜିଛି । ଭାଷଣ ଶୁଣିବାକୁ ଲୋକେ ବିରକ୍ତ ହୁଅନ୍ତି ତେଣୁ ଗୀତ ମାଧ୍ୟମରେ ଲୋକଙ୍କ ପାଖରେ ପହଞ୍ଚିବାକୁ ଉଦ୍ୟମ କରୁଛି ସବୁଜ ଶିବିର । ତେବେ ଭୋଟ ହାତେଇବାକୁ ବିଜେଡିର ଏହି ପ୍ରୟାସ କେତେ ଦୂର ସଫଳ ହେବ ତାହା ନିର୍ବାଚନର ଫଳାଫଳ ହିଁ କହିବ ।