କୋରାପୁଟ: କୋଲାବ ଜଳଭଣ୍ଡାରରେ ଗାଧୋଇବା ବେଳେ ବୁଡ଼ି ଗଲେ ତିନି ଦଶମ ଶ୍ରେଣୀ ଛାତ୍ର। ଆଜି କୋଲାବ ଜଳଭଣ୍ଡାରରେ ଗାଧୋଇବାକୁ ଯାଇ ପାଣିରେ ବୁଡ଼ି ଜବାହର ନବୋଦୟ ବିଦ୍ୟାଳୟର ୩ ଜଣ ଦଶମ ଶ୍ରେଣୀ ଛାତ୍ରଙ୍କର ଅକାଳ ବିୟୋଗ ଘଟିଛି। ମୃତକ ତିନି ଜଣ ହେଲେ ଓମ୍ ପ୍ରକାଶ, ଲିଙ୍ଗରାଜ ଏବଂ ସ୍ୱସ୍ତିକ। ସେମାନଙ୍କୁ ସ୍ଥାନୀୟ ଲୋକେ ଉଦ୍ଧାର କରି ଶହୀଦ ଲକ୍ଷ୍ମଣ ନାୟକ ମେଡିକାଲ କଲେଜ ହସ୍ପିଟାଲରେ ଭର୍ତ୍ତି କରିଥିବା ବେଳେ ସେଠାରେ ଡ଼ାକ୍ତର ତାଙ୍କୁ ମୃତ୍ୟୁ ଘୋଷଣା କରିଥିଲେ।
ଦଶମ ବୋର୍ଡ ପରୀକ୍ଷା ସମାପ୍ତ ହେବା ପରେ ଛାତ୍ରାବାସରେ ରହୁଥିବା ଏହି ତିନି ଜଣ ଛାତ୍ର ଘରକୁ ଯିବା ପାଇଁ ଅଭିଭାବକଙ୍କ ଆସିବା ବାଟକୁ ଅପେକ୍ଷା କରିଥିଲେ । ଏହି ସମୟରେ ସେମାନେ ବିଦ୍ୟାଳୟ ପାଚେରୀ ପାଖେରେ ଥିବା କୋଲାବ ଜଳଭଣ୍ଡାରକୁ ଯାଇ ଗାଧୋଇବା ପାଇଁ ଯାଇଥିଲେ । ସେଠାରେ ଅସାବଧାନତା ବଶତଃ ସେମାନେ ଗଭୀର ପାଣିରେ ବୁଡ଼ି ଯାଇଥିଲେ। ସ୍ଥାନୀୟ ବାସିନ୍ଦାମାନେ ଏହା ଦେଖି ତୁରନ୍ତ ତିନି ଛାତ୍ରଙ୍କୁ ଉଦ୍ଧାର କରିଥିଲେ ଏବଂ ଚିକିତ୍ସା ପାଇଁ କୋରାପୁଟ ସ୍ଥିତ ଶହୀଦ ଲକ୍ଷ୍ମଣ ନାୟକ ମେଡିକାଲ କଲେଜ ଓ ହସ୍ପିଟାଲରେ ଭର୍ତ୍ତି କରିଥିଲେ। ମାତ୍ର ସେଠାରେ ଡାକ୍ତର ସେମାନଙ୍କୁ ମୃତ ଘୋଷଣା କରିଥିଲେ।