ଦେଶରେ କରୋନା ସଂକ୍ରମଣ ଏବେ ନିୟନ୍ତ୍ରଣକୁ ଆସିଛି । କିନ୍ତୁ ବିପଦ ସଂପୂର୍ଣ୍ଣ ଟଳିନି । କରୋନାକୁ ମାତ୍ ଦେବା ପାଇଁ ଟିକାକରଣ ଜୋରଦାର କରାଯାଉଛି । ଏବେ କରୋନା ବିରୋଧୀ ଲଢେଇ ପାଇଁ ଆଉ ଏକ ଅସ୍ତ୍ର ମିଳିଯାଇଛି । ସ୍ୱଦେଶୀ କରୋନା ଟିକା କୋର୍ବେଭାକ୍ସକୁ ଜରୁରୀକାଳିନ ଅନୁମତି ମିଳିଛି । ୧୨ରୁ ୧୮ ବର୍ଷ ପିଲାଙ୍କ କ୍ଷେତ୍ରରେ ଏହା ପ୍ରଥମେ ବ୍ୟବହାର କରାଯିବ । ହାଇଦ୍ରାବାଦର ଫାର୍ମା କମ୍ପାନୀ ‘ବାୟୋଲୋଜିକାଲ-ଇ’ର କରୋନା ଟିକା କୋର୍ବେଭାକ୍ସର ଜରୁରୀକାଳିନ ବ୍ୟବହାରୀ ପାଇଁ ଡିସିଜିଆଇ ପକ୍ଷରୁ ମଞ୍ଜୁରୀ ମିଳିଯାଇଛି । ଭାରତରେ ନିର୍ମିତ ଏହା ତୃତୀୟ ସ୍ୱଦେଶୀ କରୋନା ଟିକା । ଶୁଳ୍କକୁ ହଟେଇ ଭ୍ୟାକସିନର ମୂଲ୍ୟ ପ୍ରାୟ ୧୪୫ ଟଙ୍କା ହେବ ବୋଲି ଜଣାପଡିଛି ।
ଭାରତ ସରକାର କୋର୍ବେଭାକ୍ସର ୫ କୋଟି ଡୋଜ କିଣିବାକୁ ଆଦେଶ ଦେଇଥିଲେ । ଜାନୁଆରୀ ଶେଷ ସୁଦ୍ଧା ଟିକା ଉପଲବ୍ଧ କରିବା ପାଇଁ ଅର୍ଡର ଜାରି କରାଯାଇଥିଲା । ସୂଚନା ଅନୁସାରେ ୨୦୨୧, ଜୁନ ୨ରେ ବାୟାଲୋଜିକାଲ ଇ ଠାରୁ କୋର୍ବେଭାକ୍ସ କିଣିବା ପାଇଁ ସରକାର ଅଗ୍ରୀମ ଆକାରରେ ୧୫୦୦ କୋଟି ଟଙ୍କା ଦେଇଛନ୍ତି । କରୋନା ବିରୋଧୀ ଲଢେଇରେ ଏହି ଟିକା ଅଧିକ ସହାୟକ ବୋଲି ଆଶା ରହିଛି ।