ଋଷର ଆକ୍ରମଣ ପରେ ୟୁକ୍ରେନରେ ଜଳୁଛି ନିଆଁ । ୟୁକ୍ରେନର ରାଜଧାନୀ କିବ୍ରେ ପ୍ରବେଶ କରିଛି ଋଷ ସେନା । ଆଜି ବି କିବ୍ରେ ଭୟ୍ଙ୍କର ବିସ୍ଫୋରଣର ଶଦ୍ଦ ଶୁଣିବାକୁ ମିଳିଛି । ୟୁକ୍ରେନର ଦକ୍ଷିଣ ପୂର୍ବ ଅଞ୍ଚଳରେ ୬ଟି ମିସାଇଲ ମାଡ଼ କରିଛନ୍ତି ଋଷ ସେନା । ୟୁକ୍ରେନର ବିଭିନ୍ନ ବିମାନବନ୍ଦରରେ ମଧ୍ୟ ମିସାଇଲ ମାଡ଼ ହୋଇଛି । ଅର୍ନ୍ତଜାତୀୟ ଗଣମାଧ୍ୟମର ସୂଚନା ଅନୁସାରେ ଆଜି କିବର ମଧ୍ୟଭାଗରେ ୨ଟି ବିସ୍ଫୋରଣ ଓ ପୂର୍ବଭାଗରେ ଗୋଟିଏ ବିସ୍ଫୋରଣ ହୋଇଥିବା ନେଇ ସୂଚନା ରହିଛି । ଋଷ ସେନା କିବ୍ ଅଭିମୁଖେ ଅଗ୍ରସର ହେଉଥିବା ୟୁକ୍ରେନ ଦାବି କରିଛିା ସେପଟେ ଋଷର ୨ଟି ଯୁଦ୍ଧ ବିମାନକୁ ୟୁକ୍ରେନ ଖସାଇଥିବା ଦାବି କରିଛି ।
ୟୁକ୍ରେନ ସେନାର କମାଣ୍ଡର ଇନ୍ ଚିଫ ବାଲେରି ଜାଏଜୁନି ଦାବି କରିଛନ୍ତି ଯେ, ସେମାନେ ଋଷ ସେନାର ୩୦ ଟ୍ୟାଙ୍କକୁ ନଷ୍ଟ କରିଦେଇଛନ୍ତି । ୭ ଏୟାରକ୍ରାଫ୍ଟ ଓ ୬ ହେଲିକପ୍ଟରକୁ ମାରି ଖସାଇଛନ୍ତି । ଯାହା ମଧ୍ୟରେ ରହିଛି ଅତ୍ୟାଧୁନିକ ସୁଖୋଇ ଏସ ୩୦ ଯୁଦ୍ଧ ବିମାନ । ଏପରିକି ୨୫ ଋଷ ସେନା ୟୁକ୍ରେନ ସେନା ଆଗରେ ଆତ୍ମସମର୍ପଣ କରିଥିବା ମଧ୍ୟ ଦାବି କରିଛନ୍ତି । ସେହିପରି ଋଷିଆର ମୁକାବିଲା କରିବା ପାଇଁ ସାଧାରଣ ନାଗରିକଙ୍କୁ ଅସ୍ତ୍ରଶସ୍ତ୍ର ଦେଲା ୟୁକ୍ରେନ। ଲୋକଙ୍କୁ ପ୍ରାୟ ୧୦ ହଜାର ଆସଲ୍ଟ ରାଇଫଲ ଦେଇଥିବା କିବ ମିଡିଆରେ ପ୍ରକାଶ ପାଇଛି । ଋଷିଆ ପ୍ରାୟ ୨୦୩ଟି ରକେଟ ମାଡ଼ କରିଥିବା ୟୁକ୍ରେନ ସୂଚନା ଦେଇଛି । ଋଷିଆ ସେନାର ଆକ୍ରମଣରେ ୧୩୭ ୟୁକ୍ରେନ ସେନା ଓ ନାଗରିକଙ୍କ ମୃତ୍ୟୁ ହୋଇଛି ।