ପୌର ନିର୍ବଚାନ ପାଇଁ ରାଜନୀତି ସରଗରମ ଥିବା ବେଳେ ଏବେ କିଏ ହେବ ୩ ମହାନଗର ନିଗମର ମେୟର ତାକୁ ନେଇ ଆରମ୍ଭ ହୋଇଗଲାଣି ରାଜନୀତି । ପ୍ରଥମ ଥର ପାଇଁ ରାଜ୍ୟରେ ମେୟର ପଦବୀ ପାଇଁ ପ୍ରତ୍ୟକ୍ଷ ନିର୍ବାଚନ ହେବାକୁ ଯାଉଛି । ଭୁବନେଶ୍ୱର,କଟକ,ବ୍ରହ୍ମପୁର ପାଇଁ ଅନୁଷ୍ଠିତ ହେବାକୁ ଯାଉଛି ନିର୍ବାଚନ । ଏହାରି ଭିତରେ ୩ ରାଜନୈତିକ ଦଳର ପ୍ରାର୍ଥୀଙ୍କ ଚେହେରା ସାମନାକୁ ଆସିଛି । ତେବେ ରାଜଧାନୀର ନୂଆ ମେୟର କିଏ ହେବେ ଏବଂ ଭୁବନେଶ୍ୱରବାସୀଙ୍କ ଭରସା କିଏ ଜିତିବେ ତାଉପରେ ସମସ୍ତଙ୍କ ନଜର ରହିଛି ।
ଭୁବନେଶ୍ୱର ପାଇଁ ମେୟର ପ୍ରାର୍ଥୀ ଭାବେ ସୁଲୋଚନା ଦାସଙ୍କ ନାଁ ବିଜୁ ଜନତା ଦଳ ଘୋଷଣା କରିଛି । ସାମ୍ବାଦିକାରୁ ରାଜନେତା ପାଲଟିଥିବା ସୁଲୋଚନାଙ୍କୁ ବଡ଼ ଦାୟିତ୍ୱ ମିଳିଛି । ଭୁବନେଶ୍ୱରରୁ ଜିତି ଦଳର ସମ୍ମାନ ରକ୍ଷା କରିବା ତାଙ୍କ ପାଇଁ ଏବେ ବଡ଼ ଚ୍ୟାଲେଞ୍ଜ ହେବ । ୧୪ ବର୍ଷ ଧରି ସାମ୍ବାଦିକତା କରିବା ପରେ ରାଜନୀତିରେ ପାଦ ଥାପିଥିବା ସୁଲୋଚନା ପ୍ରଥମେ କଂଗ୍ରେସରେ ସାମିଲ ହୋଇଥିଲେ । ଏହା ପରେ ୨୦୧୭ରେ ବିଜେଡିରେ ସାମିଲ ହେବା ପରେ ବିଜେଡି ମୁଖପାତ୍ର ଭାବେ ଦାୟିତ୍ୱ ଦିଆଯାଇଥିଲା । ପରେ ଭିନ୍ନକ୍ଷମ କମିଶନ ଅଧ୍ୟକ୍ଷା ଭାବେ ତାଙ୍କୁ ନିଯୁକ୍ତି ମିଳିଥିଲା ।
ସେହିପରି ଶାସକ ଦଳକୁ କଡ଼ା ଟକ୍କର ଦେବାକୁ ବିଜେପି ନୂଆ ଚେହେରା ଡକ୍ଟର ସୁନୀତି ମୁଣ୍ଡଙ୍କୁ ମୈଦାନକୁ ଓହ୍ଲାଇଛି । ଜଣେ ଲେଖିକା ଭାବେ ସ୍ୱତନ୍ତ୍ର ପରିଚୟ ସୃଷ୍ଟି କରିଥିବା ସୁନୀତି୍ଙ୍କୁ ଭୁବନେଶ୍ୱର ପାଇଁ ମେୟର ପ୍ରାର୍ଥୀ କରିଛି ବିଜେପି । ତେବେ ଟିକେଟ ପାଇବା ପରେ ସେ ଏବେ ରାଜନୀତି ମୈଦାନକୁ ଓହ୍ଲାଇ ସିଧାସଳଖ ଲୋକଙ୍କ ଭରସା ଜିତିବାକୁ ଆଶା ରଖିଥିବା କହିଛନ୍ତି । କଥା ନୁହେଁ ଏବେ କାମ ହେବ ବୋଲି ସେ କହିଛନ୍ତି ।
କଂଗ୍ରେସ ମଧ୍ୟ ଭୁବନେଶ୍ୱର ମେୟର ପ୍ରାର୍ଥୀ ପାଇଁ ମଧୁସ୍ମିତା ଆଚାର୍ଯ୍ୟଙ୍କ ନାଁ ଘୋଷଣା କରିଛି । ମଧୁସ୍ମିତା ହେଉଛନ୍ତି ପୂର୍ବତନ କଂଗ୍ରେସ ବିଧାୟକ ସ୍ୱର୍ଗତ କାଙ୍ଗାଳି ପଣ୍ଡାଙ୍କ ବୋହୂ । ଦଳକୁ ନୁହେଁ ପ୍ରାର୍ଥୀକୁ ଦେଖି ଭୋଟ ଦେବାକୁ ଅପିଲ କରିଛନ୍ତି ମଧୁସ୍ମିତା ।
ସେହିପରି କଟକ ମେୟର ପ୍ରାର୍ଥୀ ଭାବେ ସୁବାଷ ସିଂହଙ୍କ ନାଁ ଘୋଷଣା କରିଛି ବିଜେଡି । କଟକ ପାଇଁ ଗୁରୁଦାୟିତ୍ୱ ଦିଆଯାଇଥିବାରୁ ଧନ୍ୟବାଦ ଜଣାଇବା ସହ କଟକବାସୀଙ୍କ ଠାରୁ ଆର୍ଶୀବାଦ ପାଇବା ଆଶା ଅଛି ବୋଲି କହିଛନ୍ତି ସୁବାଷ ସିଂହ । ସେହିପରି ବ୍ରହ୍ମପୁର ମେୟର ପ୍ରାର୍ଥୀ ପାଇଁ ସଂଘମିତ୍ରା ଦଳେଇଙ୍କ ନାଁ ବିଜେଡି ଘୋଷଣା କରିବା ପରେ ସେ କହିଛନ୍ତି, ବ୍ରହ୍ମପୁରର ବିକାଶ ତାଙ୍କର ଲକ୍ଷ୍ୟ । ବ୍ରହ୍ମପୁରରେ ବିଜେଡି ତାର ସଫଳତା ବଜାୟ ରଖିବା ଓ ବଳକା ଥିବା ଉନ୍ନୟନ୍ନ ମୂଳକ କାର୍ଯ୍ୟକୁ ତ୍ୱରାନିତ କରାଯିବ ।