ଚୀନରେ କରୋନା ପୁଣି କାୟା ମେଲାଇବା ଆରମ୍ଭ କରିଛି । ଧୀରେ ଧୀରେ ସ୍ଥିତି ସଙ୍ଗୀନ ହେଉଛି । ଗତ ୨୪ ଘଂଟାରେ ଚୀନରେ ୫ ହଜାରରୁ ଅଧିକ ନୂଆ ମାମଲା ଚିହ୍ନଟ ହୋଇଛି । ୫ ହଜାର ୨୮୦ ନୂଆ ଆକ୍ରାନ୍ତ ଚିହ୍ନଟ ନେଇ ଚୀନ ଜାତୀୟ ସ୍ୱାସ୍ଥ୍ୟ ଆୟୋଗ ପକ୍ଷରୁ ସୂଚନା ଦିଆଯାଇଛି । କୋଭିଡ-୧୯ ଆରମ୍ଭ ହେବା ଦିନରୁ ଗୋଟିଏ ଦିନରେ ଚିହ୍ନଟ ଏହା ହେଉଛି ସର୍ବାଧିକ ମାମଲା ।
ବଢୁଥିବା ସଂକ୍ରମଣକୁ ଦୃଷ୍ଟିରେ ରଖି ଚୀନରେ କଟକଣା କଡାକଡି କରାଯାଇଛି । ଚୀନର ୧୦ ସହରରେ ଲକଡାଉନ ଘୋଷଣା କରାଯାଇଛିା କରୋନାର ଏହି ଲହରରେ ଚୀନର ଜିଲିନ ପ୍ରଦେଶ ସବୁଠୁ ଅଧିକ ପ୍ରଭାବିତ ହୋଇଛି । ୫ କୋଟିରୁ ଅଧିକ ଲୋକ ଘରେ ବନ୍ଦୀ ହୋଇ ରହିଛନ୍ତି ।ସବୁଠୁ ଅଧିକ ୨ କୋଟି ୪୦ ଲକ୍ଷ ଲୋକ ଜିଲିନ ପ୍ରଦେଶର । ଏହା ସହ ଶେନଜନରେ କୋଟିଏ ୭୫ ଳକ୍ଷ ଲୋକ ଓ ଡେଙ୍ଗୁଆନରେ ୧ କୋଟି ଲୋକ ଲକଡାଉନରେ ଅଛନ୍ତି । ଚୀନର ଏବେ ଯାଏଁ ବହୁତ ଲହର ଆସି ସାରିଛି । କିନ୍ତୁ ଫେବୃଆରୀ ୨୦୨୦ ପରେ କେବେ ଏତେ ମାମଲା ଗୋଟିଏ ଦିନରେ ଚିହ୍ନଟ ହୋଇନଥିଲା । ତେବେ ଏହି ଲହରରେ ଏଯାଏ କାହାର ଜୀବନ ଯାଇଥିବା ଖବର ମିଳିନାହିଁ ।