ପାକିସ୍ତାନ ପ୍ରଧାନମନ୍ତ୍ରୀ ଇମ୍ରାନ ଖାନ୍ଙ୍କ ଭବିଷ୍ୟତ କଣ ହେବ ତାହା ଏବେ ସନ୍ଦେହ ଘେରରେ । କୋର୍ଟଙ୍କ ରାୟ ପରେ ବିରୋଧୀ ଉତ୍ସବ ମନାଉଥିବା ବେଳେ କ୍ଷମତା ବଜାୟ ରଖିବାକୁ ଆଜି ଇମ୍ରାନ ଖାନ୍ କ୍ୟାବିନେଟ ବୈଠକ ଡାକିଛନ୍ତି । ସେପଟେ ଆସନ୍ତାକାଲି ଆସ୍ଥା ଭୋଟର ସମ୍ମୁଖୀନ ହେବେ ଇମ୍ରାନ ଖାନ୍ । ପାକ ସୁପ୍ରିମୋକର୍ଟ ଆସନ୍ତାକାଲି ଦିନ ୧୦ଟା ବେଳେ ଇମ୍ରାନ ଖାନ ସରକାର ବିରୋଧରେ ଆସ୍ଥା ଭୋଟ ପାଇଁ ନିର୍ଦ୍ଦେଶ ଦେଇଛନ୍ତି ।
ଗତକାଲି ପାକିସ୍ତାନ ସୁପ୍ରିମକୋର୍ଟ ଇମ୍ରାନ ଖାନ୍ଙ୍କୁ ଝଟକା ଦେଇଥିଲେ । ବିଦେଶୀ ଷଡଯନ୍ତ୍ର ନାମରେ ନ୍ୟାସନାଲ ଆସେମ୍ଲିରେ ଅବିଶ୍ୱାସ ପ୍ରସ୍ତାବ ଉପରେ ଭୋଟିଂ ରୋକିବାକୁ କୋର୍ଟ ଅସାମ୍ବିଧାନିକ କହିଥିଲେ । ଏହା ସହ ୨୪ ଘଂଟା ମଧ୍ୟରେ ଭୋଟିଂ କରିବାକୁ ନିର୍ଦ୍ଦେଶ ଦେଇଥିଲେ । ସୁପ୍ରିମକୋର୍ଟ ପ୍ରଧାନବିଚାରପତି ଉମର ଆଟା ବାନ୍ଦିଆଲଙ୍କ ଅଧ୍ୟକ୍ଷତାରେ ଥିବା ବୃହତ ୫ ଜଣିଆ ବେଂଚ ଏହି ରାୟ ଦେଇଥିଲେ । କୋର୍ଟ ଆହୁରି ମଧ୍ୟ କହିଥିଲେ ଇମ୍ରାନ ଖାନ୍ଙ୍କ ପ୍ରସ୍ତାବ ଉପରେ ମୋହର ମାରି ପାକ ରାଷ୍ଟ୍ରପତି ପାକିସ୍ତାନ ସଂସଦକୁ ଭଙ୍ଗ କରିବାକୁ ଯେଉଁ ନିଷ୍ପତ୍ତି ନେଇଥିଲେ ତାହା ବେଆଇନ ।