ମହାରାଷ୍ଟ୍ର: କରୋନାର ତିନୋଟି ଲହରରେ ସବୁଠୁ ଅଧିକ ପ୍ରଭାବିତ ରାଜ୍ୟ ଭିତରେ ମହାରାଷ୍ଟ୍ର ଥିଲା । ବିଶେଷକରି ମୁମ୍ବାଇ ସହରର ସଂକ୍ରମଣ ସବୁଠୁ ଚିନ୍ତାର କାରଣ ପାଲଟିଥିଲା । ଏବେ ପୁଣି ସେଠାରେ ସଂକ୍ରମଣ ବଢ଼ିଛି । ଗତ ୨୪ ଘଣ୍ଟାରେ ମହାରାଷ୍ଟ୍ରରେ ୧୦୪୫ ନୂଆ ମାମଲା ଚିହ୍ନଟ ହୋଇଥିବା ବେଳେ ରାଜ୍ୟରେ ଏବେ ସକ୍ରିୟ ଆକ୍ରାନ୍ତଙ୍କ ସଂଖ୍ୟା ୪୫୦୦ ଛୁଇଁଛି । ମୁମ୍ବାଇରେ ଏବେ ସଂକ୍ରମଣ ହାର ୬ ପ୍ରତିଶତ ଥିବା ବେଳେ ମହାରାଷ୍ଟ୍ରରେ ୩ ପ୍ରତିଶତ ରହିଛି ।
ସଂକ୍ରମଣ ବଢ଼ିବାକୁ ନେଇ ସତର୍କ ହୋଇପଡ଼ିଛନ୍ତି ମହାରାଷ୍ଟ୍ର ସରକାର । ମୁଖ୍ୟମନ୍ତ୍ରୀ ଉଦ୍ଧବ ଠାକରେ କହିଛନ୍ତି ଯେ, ଲୋକମାନେ କୋଭିଡ ନିୟମକୁ କଡ଼ାକଡ଼ି ଭାବେ ପାଳନ କରନ୍ତୁ, ନଚେତ ପୁଣି କଟକଣା ଲାଗୁ କରାଯିବ । ଅନ୍ୟପଟେ ଓଡ଼ିଶାର ବିଶେଷଜ୍ଞ ଡାକ୍ତରଙ୍କ କହିବା କଥା ହେଲା, ଓମିକ୍ରନ ଭୂତାଣୁର ଭାରିଆଣ୍ଟ ଯୋଗୁଁ ମହାରାଷ୍ଟ୍ରରେ ସଂକ୍ରମଣ ବଢ଼ୁଥିବା ଅନୁମାନ କରାଯାଉଛି । ସଂକ୍ରମଣ ହାର ଅଧିକ ଥିଲେ ବି ଗୁରୁତର ସଂଖ୍ୟା କମ୍ ରହୁଛନ୍ତି ।
ସେପଟେ କୋଭିଡ ଗାଇଡଲାଇନ ପାଳନ ଉପରେ ଗୁରୁତ୍ୱଆରୋପ କରିଛନ୍ତି ଦିଲ୍ଲୀ ହାଇକୋର୍ଟ । ବିମାନ ବନ୍ଦର ଓ ବିମାନ ଭିତରେ କୋଭିଡ ନିୟମ ମାନୁନଥିବା ବ୍ୟକ୍ତିଙ୍କ ବିରୋଧରେ କାର୍ଯ୍ୟାନୁଷ୍ଠାନ ପାଇଁ କୋର୍ଟ ନିର୍ଦ୍ଦେଶ ଦେଇଛନ୍ତି । ବିଚାରପତି କହିଛନ୍ତି ଯେ, ନିୟମ ଉଲ୍ଲଂଘନକାରୀଙ୍କ ଉପରେ ଜରିମାନା ଲଗାଯାଉ, ଏହାସହ ସେମାନଙ୍କ ବିମାନ ଯାତ୍ରା ଉପରେ ମଧ୍ୟ କଟକଣା ଲଗାଯାଉ । ଏସବୁ ଭିତରେ ଦେଶରେ ସଂକ୍ରମଣ ବଢ଼ିଥିବା ଲକ୍ଷ୍ୟ କରାଯାଉଛି । ଗୋଟିଏ ଦିନରେ ଦେଶରେ ୪ ହଜାରରୁ ଅଧିକ ମାମଲା ଚିହ୍ନଟ ହୋଇଛି।