- ମନ ଭାଙ୍ଗିଗଲା, ଚିହ୍ନ ବଦଳିଲା
- ଉଦ୍ଧବ-ସିନ୍ଦେଙ୍କ ବିବାଦରେ ECଙ୍କ ବଡ଼ ନିଷ୍ପତ୍ତି
- ଶିବସେନା ଓ ସିନ୍ଦେ ଦଳର ବଦଳିଲା ନାମ
- ଉଦ୍ଧବଙ୍କୁ ମଶାଲ ଚିହ୍ନ, ସିନ୍ଦେ ପୁନଶ୍ଚ କରିବେ ଆବେଦନ
ମହାରାଷ୍ଟ୍ର: ମହାରାଷ୍ଟ୍ରରେ ନିର୍ବାଚନୀ ଚିହ୍ନକୁ ନେଇ ହେଉଥିବା କନ୍ଦଳ ଟିକେ ଥମି ଯାଇଛି। ଉଦ୍ଧବ ଠାକରେ ଓ ଏକନାଥ ସିନ୍ଦେଙ୍କ ମଧ୍ୟରେ ଚାଲିଥିବା ବିବାଦରେ ନିର୍ବାଚନ କମିଶନ ବଡ଼ ନିଷ୍ପତ୍ତି ନେଇଛନ୍ତି । ନିର୍ବାଚନ କମିଶନ ଉଦ୍ଧବ ଠାକରେଙ୍କୁ ମଶାଲ ଚିହ୍ନ ଦେଇଥିବା ବେଳେ ତାଙ୍କ ରାଜନୀତିକ ପାର୍ଟିର ନାଁ ମଧ୍ୟ ବଦଳାଇ ଦେଇଛନ୍ତି। । ତାଙ୍କ ଦଳର ନାଁରେ ଶିବସେନା ଉଦ୍ଧବ ବାଲାସାହେବ ଠାକରେ କରାଯାଇଛି।
ଅନ୍ୟପଟେ ଏକନାଥ ସିନ୍ଦେ ଗୋଷ୍ଠୀ ଚିହ୍ନ ପାଇଁ କରିଥିବା ଆବେଦନକୁ ନିର୍ବାଚନ କମିଶନ ଅଗ୍ରାହ୍ୟ କରିଛନ୍ତି। ତ୍ରିଶୁଳ, ଉଦୟ ସୂର୍ଯ୍ୟ ଓ ଗଦା ଚିହ୍ନ ପାଇଁ ସିନ୍ଦେ ଗୋଷ୍ଠୀ ଆବେଦନ କରିଥିଲା। ହେଲେ ଏହା ତାଲିକାରେ ନଥିବାରୁ ଇସି କୌଣସି ଚିହ୍ନ ଦେଇ ନାହାନ୍ତି। ଏହି ଗୋଷ୍ଠୀଙ୍କୁ ପୁଣିଥରେ ଉପଲବ୍ଧ ଥିବା ଚିହ୍ନ ପାଇଁ ଆବେଦନ କରିବାକୁ କୁହାଯାଇଛି। ଏଥିସହିତ ନିର୍ବାଚନ କମିଶନ ସିନ୍ଦେ ଗୋଷ୍ଠୀଙ୍କ ନାଁ ‘ବାଲସାହେବଚି ଶିବସେନା’ ବା ବାଲାସାହେବଙ୍କ ଶିବସେନା ରଖାଯାଇଛି।
ସୂଚନା ଅନୁସାରେ, ଉଭୟ ଉଦ୍ଧବ ଓ ସିନ୍ଦେ ଗୋଷ୍ଠୀ ଶିବସେନା ଉପରେ ନିଜର ହକ ଜାହିର କରୁଥିଲେ। ହେଲେ ନିର୍ବାଚନ କମିଶନ ପ୍ରଥମେ ଶିବସେନାର ଦଳୀୟ ଚିହ୍ନ ‘ଧନୁ ଓ ତୀର’ର ବ୍ୟବହାର ଉପରେ ରୋକ ଲଗାଇଥିଲେ । ଏହାପରେ ଦୁଇ ଗୋଷ୍ଠୀଙ୍କୁ ଉପଲବ୍ଧ ଥିବା ଦଳୀୟ ଚିହ୍ନ ପାଇଁ ଆବେଦନ କରିବାକୁ କହିଥିଲେ। ଏହାପରେ ଆଜି ଉଦ୍ଧବଙ୍କୁ ମଶାଲ ଚିହ୍ନ ମିଳିଥିବା ବେଳେ ସିନ୍ଦେଙ୍କୁ ନିର୍ବାଚନୀ ଚିହ୍ନର ୩ଟି ବିକଳ୍ପ ମାଗିଛନ୍ତି କମିଶନ।