- ‘ବାବିୟା’ ଥିଲା ବିଶ୍ୱର ଏକମାତ୍ର ଶାକାହାରୀ କୁମ୍ଭୀର
- ନା ମାଂସ ଖାଉଥିଲା, ନା କାହାକୁ କରୁଥିଲା ଆକ୍ରମଣ
- ଭଗବାନଙ୍କ ପ୍ରସାଦ ଖାଏ, ମନ୍ଦିରକୁ ଦେଉଥିଲା ସୁରକ୍ଷା
କେରଳ: ବିଶ୍ୱର ଏକମାତ୍ର ଶାକାହାରୀ କୁମ୍ଭୀର ‘ବାବିୟା’କୁ ପ୍ରାୟ ସମସ୍ତେ ଜାଣିଥିବେ । ଆଜି ‘ବାବିୟା’ ଶେଷ ନିଶ୍ୱାସ ତ୍ୟାଗ କରିଛି । ଲୋକ ମାନ୍ୟତା ଅନୁଯାୟୀ, ବାବିୟା ଅନନ୍ତ ପଦ୍ମନାଭ ସ୍ୱାମୀ ମନ୍ଦିରର ସୁରକ୍ଷା କରୁଥିଲା । ଶ୍ରଦ୍ଧାଳୁ ମାନେ ଉଭୟ ଭଗବାନ କୁମ୍ଭୀରକୁ ଏଠାରେ ପୂଜା କରୁଥିବାର କୁହାଯାଇଥାଏ । ଏତଦବ୍ୟତୀତ ମନ୍ଦିରକୁ ଆସୁଥିବା ଶ୍ରଦ୍ଧାଳୁଙ୍କ ପାଇଁ ବାବିୟା ଆକର୍ଷଣର କେନ୍ଦ୍ରବିନ୍ଦୁ ପାଲଟିଥିଲା ।
ଜାତୀୟ ଗଣମାଧ୍ୟମରେ ପ୍ରକାଶିତ ରିପୋର୍ଟ ଅନୁଯାୟୀ, ବାବିୟା ଗତ କିଛି ଦିନ ହେବ ଅସୁସ୍ଥ ଥିଲା । ଏପରିକି ପଶୁ ଚିକିତ୍ସିକ ବାବିୟାର ସ୍ୱାସ୍ଥ୍ୟ ପରୀକ୍ଷା ମଧ୍ୟ କରିଥିଲେ । ମନ୍ଦିରର ପୂଜାରୀଙ୍କ କହିବା ଅନୁଯାୟୀ, ଏହି ଦିବ୍ୟ କୁମ୍ଭୀର ଅଧିକାଂଶ ସମୟ ମନ୍ଦିରର ପୋଖରୀ ଭିତରେ ରହୁଥିବା ବେଳେ ଦ୍ୱିପ୍ରହରରେ ବାହାରକୁ ବାହାରୁଥିଲା ।
ଗତ ୨ ଦିନ ହେବ ଖାଇବାକୁ ଡକାଯାଉଥିଲେ ମଧ୍ୟ କୂଳକୁ ଖାଇବାକୁ ଆସୁନଥିଲା ବାବିୟା । ପ୍ରତ୍ୟେକ ଦିନ ୨ ଥର ମନ୍ଦିର ପୂଜକ ବାବିୟାଙ୍କୁ ଭଗବାନଙ୍କ ପ୍ରସାଦ ଖାଇବାକୁ ଦେଉଥିଲେ । ଆଉ ଏହାକୁ ବେଶ ଆନନ୍ଦ ସହକାରେ ଖାଉଥିଲା ବାବିୟା । ସବୁଠୁ ବଡ କଥା ହେଉଛି ବାବିୟା ନା କେବେ ମାଂସ ଖାଉଥିଲା ନା କେବେ ପୋଖରୀରେ ଥିବା ମାଛ ଉପରେ ଆକ୍ରମଣ କରିଥିଲା । ଯେହେତୁ କେବଳ ଭଗବାନଙ୍କ ପ୍ରସାଦ ଖାଉଥିଲା ତେଣୁ ବାବିୟାକୁ ବିଶ୍ୱର ଶାକାହାରୀ କୁମ୍ଭୀର ଭାବେ ପରିଗଣିତ କରାଯାଉଥିଲା । କିନ୍ତୁ ଆଜି କେରଳର କାସରଗୋଡରେ ଥିବା ଶ୍ରୀ ଆନନ୍ଦପଦ୍ମନାଭ ମନ୍ଦିରରେ ଆଖି ବୁଜିଛି ଦିବ୍ୟ ବାବିୟା ।