ମୁମ୍ବାଇ; ଯୌନ ଉତ୍ପୀଡନକୁ ନେଇ ମୁମ୍ବାଇ କୋର୍ଟ ଏକ ରାୟ ଦେଇଛନ୍ତି । ମୁମ୍ବାଇର ଏକ ସ୍ୱତନ୍ତ୍ର କୋର୍ଟ ଜଣେ ୨୫ବର୍ଷିୟ ବ୍ୟବସାୟୀଙ୍କୁ ଦୋଷୀ ସାବ୍ୟସ୍ତ କରି ଦେଢବର୍ଷ ଜେଲ ଦଣ୍ଡାଦେଶ ଶୁଣାଇଛନ୍ତି । ତେବେ ସେହି ବ୍ୟକ୍ତି ଜଣକ ଏକ ନାବାଳିକାକୁ ‘ଆଇଟମ୍’ କହିବା ସହିତ ନାବାଳିକାର କେଶ ଟାଣିଥିଲେ । ଯାହାକୁ ନେଇ ସ୍ୱତନ୍ତ୍ର କୋର୍ଟ ଧାରା ୩୫୪ ଅନୁଯାୟୀ ବ୍ୟକ୍ତିଙ୍କୁ ଦଣ୍ଡିତ କରିଛନ୍ତି ।
ସୁଚନା ଅନୁଯାୟୀ ସ୍ୱତନ୍ତ୍ର ଜଜ୍ ଏସ.ଜେ ଅନସାରୀ କହିଛନ୍ତି ଯେ କୌଣସି ବ୍ୟକ୍ତି ଯୁବତୀଙ୍କୁ ଆଇଟମ୍ ଶବ୍ଦ କହି ସମ୍ବୋଧନ କରିବା ଏକ ଅପରାଧ । ସାଧାରଣତଃ ଏହି ଶବ୍ଦକୁ ଯୁବକମାନେ ଝିଅମାନଙ୍କୁ ଅପମାନଜନକ ଢଙ୍ଗରେ ସମ୍ବୋଧନ କରିବା ପାଇଁ ବ୍ୟବହାର କରିଥାନ୍ତି । ତେବେ ଝିଅମାନଙ୍କୁ ଅବାଞ୍ଛିତ ଆଚରଣରୁ ରକ୍ଷା କରିବା ନିମନ୍ତେ ଏଭଳି ରୋଡ ସାଇଟ ରୋମିଓଙ୍କୁ ଦଣ୍ଡ ଦେବା ଆବଶ୍ୟକ । ଏହି ଅପରାଧ ପାଇଁ ଦୋଷୀଙ୍କ ପାଇଁ କୌଣସି ସହନଶୀଳତା ଦେଖାଇ ଦିଆଯାଇପାରିବ ନାହିଁ ଏବଂ କଠୋର ଦଣ୍ଡ ଦିଆଯିବ ବୋଲି କୋର୍ଟ କହିଛନ୍ତି ।
ଉଲ୍ଲେଖଯୋଗ୍ୟ; ପୀଡିତା ଜଣକ ଏକ ମାସ ପୂର୍ବରୁ ମୁମ୍ବାଇର ସାକିନାକାକୁ ସିଫ୍ଟ ହୋଇଥିଲେ । ଅଭିଯୁକ୍ତ ଓ ତା ସାଙ୍ଗମାନେ ମିଶି ଯୁବତୀଙ୍କୁ ହଇରାଣ କରୁଥିବାର ଅଭିଯୋଗ କରିଥିଲେ ।ଅଭିଯୁକ୍ତ ଜଣକ ଲଗାତର ପୀଡିତାଙ୍କ ପିଛା କରିବା ସହ ଯୁବତୀଙ୍କୁ ଆଇଟମ୍ କହି ସମ୍ବୋଧନ କରୁଥିଲେ । ଏହାପରେ ଯୁବତୀ ଜଣକ ପୋଲିସରେ ଅଭିଯୋଗ କରିଥିଲେ । ନାବାଳିକା ଜଣକ ସ୍କୁଲରୁ ଫେରୁଥିବା ବେଳେ ଅଭିଯୁକ୍ତ ଜଣକ ନାବାଳିକାର କେଶ ଭିଡିବା ସହିତ ନାବାଳିକାକୁ ‘ଆଇଟମ’ ବୋଲି ସମ୍ବୋଧନ କରିଥିଲେ ।
ସେପଟେ ଅଭିଯୁକ୍ତଙ୍କ ଓକିଲ ଏହି ଘଟଣାକୁ ମିଥ୍ୟା ବୋଲି ଦର୍ଶାଇଥିଲେ । ସେ କହିଥିଲେ ଯେ ପୀଡିତା ଓ ଅଭିଯୁକ୍ତ ପରସ୍ପରକୁ ଜାଣିଛନ୍ତି । କିନ୍ତୁ ପୀଡିତାଙ୍କ ମାତା ପିତା ସେମାନଙ୍କ ସମ୍ପର୍କରେ ଖୁସି ନଥିବାରୁ ଏଭଳି ଅଭିଯୋଗ କରିଛନ୍ତି । ତେବେ ଏହି ଘଟଣାରେ କୋର୍ଟ ଯୁବତୀଙ୍କ ସପକ୍ଷରେ କହିଛନ୍ତି । କୋର୍ଟ କହିଛନ୍ତି ଯୁବତୀଙ୍କ ସହ ଆରୋପୀଙ୍କର କୌଣସି ପରିଚୟ ନାହିଁ । ଅଭିଯୁକ୍ତ ଯାହା ବି କରିଛନ୍ତି ତାହା ସମ୍ପର୍ଣ୍ଣ ଅନୁଚିତ । ଜଜ୍ କହିଛନ୍ତି ଯେ ଦୋଷୀ ଜାଣିଶୁଣି ଏହି ପୀଡିତାଙ୍କ କେଶ ଟାଣିବା ସହିତ ତାଙ୍କୁ ‘ଆଇଟମ’ ବୋଲି କହିଥିଲେ । କୋର୍ଟ ତାଙ୍କୁ ଅଇପିସିର ଧାରା ୩୫୪ ଏବଂ ପୋକ୍ସୋ ଆକ୍ଟ ଆଧାରରେ ଦୋଷୀ ସାବ୍ୟସ୍ତ କରିଛନ୍ତି ।