- ୬୭ ବର୍ଷ ପରେ ଗାଧୋଇବା ହେଲା କାଳ
- ଗାଧୋଇବା ଡର ନେଇଗଲା ଜୀବନ
- ଚାଲିଗଲେ ବିଶ୍ୱର ସବୁଠୁ ଅପରିଷ୍କାର ବ୍ୟକ୍ତି
- ୯୪ ବର୍ଷ ବୟସରେ ଆଖି ବୁଜିଲେ ଆମୁ ହାଜି
ଇରାନ; ଇରାନର ଆମୁ ହାଜି ଏମିତି ଜଣେ ବ୍ୟକ୍ତି, ଯିଏକି ୧୦ କିମ୍ବା ୧୫ ଦିନ ଯାଏଁ ନୁହେଁ ବରଂ ୬୭ ବର୍ଷ ଧରି ଗାଧୋଇନଥିଲେ । ତାଙ୍କୁ ଦୁନିଆର ସବୁଠାରୁ ଅପରିଷ୍କାର ବ୍ୟକ୍ତି ବୋଲି କୁହାଯାଏ । କାରଣ ସେ ୬୭ ବର୍ଷ ଧରି ଗାଧୋଇନଥିଲେ । ତାଙ୍କୁ ଦେଖି ଲାଗୁଥିଲା, ଯେପରି ତାଙ୍କର ଅବସ୍ଥା ଅତି ଖରାପ । କିନ୍ତୁ ତାହା ନୁହେଁ । ବାସ୍ତବରେ ଆମୁ ହାଜି ପାଣିକୁ ଡରୁଥିଲେ । ପାଣି ତାଙ୍କ ଭିତରେ ଏମିତି ଏକ ଅଜବ ଭୟ ସୃଷ୍ଟି କରିଥିଲା ଯେ, ସେ ଭାବିଥିଲେ ଯଦି କେବେ ଭୁଲରେ ଗାଧୋଇ ପଡ଼ିବେ, ତେବେ ତାଙ୍କ ସ୍ୱାସ୍ଥ୍ୟାବସ୍ଥା ଖରାପ ହୋଇଯିବ । ଆଉ ଏବେ ତାଙ୍କର ସେହି ଡର ତାଙ୍କୁ ମୃତ୍ୟୁର ଦ୍ବାରଦେଶକୁ ଠେଲିଦେଇଛି ।
ଦକ୍ଷିଣ ଫାର୍ସ ପ୍ରଦେଶର ଡେହାଗ ଗ୍ରାମରେ ତାଙ୍କର ୯୪ ବର୍ଷ ବୟସରେ ମୃତ୍ୟୁ ହୋଇଛି । ଆଉ ତାଙ୍କର ମୃତ୍ୟୁର କାରଣ ଭୟ ବୋଲି କୁହାଯାଉଛି । ବିଚିତ୍ର ଥିଲା ଆମୁ ହାଜିଙ୍କ ଜୀବନ । ଏକ ରିପୋର୍ଟ ମୁତାବକ, ଆମୁ ହାଜି ଅବିବାହିତ ଥିଲେ । ଅସୁସ୍ଥ ତଥା ରୋଗାକ୍ରାନ୍ତ ହୋଇଯିବା ଡରରେ ଗାଧୋଇବାଠୁ ସେ ଦୂରେଇ ରହୁଥିଲେ । କିଛି ମାସ ତଳେ ଗ୍ରାମବାସୀ ତାଙ୍କୁ ଜୋରଜବରଦସ୍ତି ଧରିବା ସହ ଗାଧୋଇବା ପାଇଁ ବାଥରୁମକୁ ନେଇଯାଇଥିଲେ । ସେହି ସମୟରେ ଅନେକ ଫଟୋ ମଧ୍ୟ ଭାଇରାଲ୍ ହୋଇଥିଲା ।
ତେବେ ୬୭ ବର୍ଷରେ ପ୍ରଥମଥର ଗାଧୋଇବା ପରେ ତାଙ୍କର ସ୍ୱାସ୍ଥ୍ୟାବସ୍ଥା ଅଚାନକ ଖରାପ ହୋଇଯାଇଥିଲା ଏବଂ କିଛି ଦିନ ତଳେ ତାଙ୍କର ମୃତ୍ୟୁ ଘଟିଥିଲା । ଗଣମାଧ୍ୟମ ରିପୋର୍ଟ ଅନୁସାରେ, ଆମୁ ହାଜି ପଶୁ ମାଂସ ଖାଇବାକୁ ପସନ୍ଦ କରୁଥିଲେ । ଏହାବ୍ୟତୀତ ପଶୁଙ୍କ ଶୁଖିଲା ମଳକୁ ଏକ ପାଇପରେ ଭର୍ତ୍ତି କରି ସିଗାରେଟ୍ ଭଳି ଟାଣୁଥିବା ଦେଖିବାକୁ ମିଳିଛି । ଏହାଛଡ଼ା ଆମୁ ଏକ ସାଥୀରେ ୫ ସିଗାଗେଟ୍ ଜାଳି ପିଉଥିଲେ । ଇରାନୀ ମିଡିଆ ଅନୁସାରେ, ୨୦୧୩ରେ ଅମୌ ହାଜୀଙ୍କ ଜୀବନକୁ ନେଇ ‘ଦ ଷ୍ଟ୍ରେଞ୍ଜ୍ ଲାଇଫ୍ ଅଫ୍ ଆମୁ ହାଜି’ ନାମକ କ୍ଷୁଦ୍ର ପ୍ରାମାଣିକ ଚଳଚ୍ଚିତ୍ର ମଧ୍ୟ ତିଆରି ହୋଇଥିଲା।