ରାଉରକେଲା/ଭୁବନେଶ୍ବର: ସ୍ପେନ ବିପକ୍ଷରେ ଏକ ବଡ଼ ବିଜୟ(୨-୦)ରୁ ଭାରତ ବିଶ୍ବକପ୍ ହକି (ପୁରୁଷ) ଅଭିଯାନ ଆରମ୍ଭ କରିଛି। ଓଡ଼ିଶା ଖେଳାଳି ଯୁବକ ଅମିତ ରୋହିତ ପ୍ରଥମ ଗୋଲ୍ ଦେଇଥିଲେ। ଏଥିସହିତ ରାଉରକେଲା ର ନୂଆ ଷ୍ଟାଡ଼ିୟମର ପ୍ରଥମ ମ୍ୟାଚ୍ରେ ଭାରତ ନିଜ ନାମରେ ନୂଆ ରେକର୍ଡ ହିଁ ଯୋଡ଼ିଲା
ସୂଚନାନୁଯାୟୀ; ପୁରୁଷ ହକି ବିଶ୍ବକପ୍-୨୦୨୩ରେ ଭାରତ ବିଜୟରୁ ନିଜର ଅଭିଯାନ ଆରମ୍ଭ କରିଛି। ଉଦ୍ଘାଟନୀ ଦିବସର ଚତୁର୍ଥ ମ୍ୟାଚ୍ରେ ଶୁକ୍ରବାର ଟିମ୍ ଇଣ୍ଡିଆ ୨-୦ରେ ସ୍ପେନ୍କୁ ପରାସ୍ତ କରିଛି। ରାଉରକେଲାରେ ନବନିର୍ମିତ ବିର୍ସା ମୁଣ୍ଡା ଷ୍ଟାଡିୟମ୍ରେ ଭାରତୀୟ ଟିମ୍ରେ ଖେଳାଳିମାନେ ଆରମ୍ଭରୁ ସ୍ପେନ୍ ଉପରେ ଆଧିପତ୍ୟ ଜାରି ରଖିଥିଲେ। ଦର୍ଶକମାନେ ମଧ୍ୟ ଖେଳାଳିଙ୍କୁ ସମର୍ଥନ ଯୋଗାଇଥିଲେ। ଓଡ଼ିଆ ପୁଅ ଅମିତ ରୋହିଦାସ ପ୍ରଥମ ଗୋଲ୍ ଦେଇ ଭାରତକୁ ଅଗ୍ରଣୀ କରାଇଥିଲେ। ଉପଅଧିନାୟକ ରୋହିଦାସ ଖେଳର ୧୨ ମିନିଟରେ ଅମିତ ଏକ ପେନାଲ୍ଟି ଗୋଲ୍ ଦେଇଥିଲେ। ୨୬ ମିନିଟରେ ହାର୍ଦ୍ଦିକ ସିଂହ ଅନ୍ୟ ଏକ ଗୋଲ୍ ଦେଇଥିଲେ।
ଆଜି ଭୁବନେଶ୍ବର କଳିଙ୍ଗ ଷ୍ଟାଡିୟମ ଓ ବିର୍ସା ମୁଣ୍ଡା ଷ୍ଟାଡିୟମରେ ମୋଟ ୪ଟି ମ୍ୟାଚ ଖେଳାଯାଇଥିଲା। ଉଭୟ ସ୍ଥାନରେ ହଜାର ହଜାର ଦର୍ଶକଙ୍କ ଭିଡ ପରିଲକ୍ଷିତ ହୋଇଥିଲା। ରାଉରକେଲାରେ ପ୍ରଥମ ଥର ବିଶ୍ବକପର ମ୍ୟାଚଗୁଡ଼ିକ ଖେଳାଯାଉଥିବାରୁ ସ୍ଥାନୀୟ ଲୋକେ ଅଧିକ ଉତ୍ସାହିତ ଦେଖାଯାଇଥିଲେ। ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ, ହକି ଇଣ୍ଡିଆର ସଭାପତି ଦିଲୀପ ତିର୍କୀ, ୫ଟି ସଚିବ ଭିକେ ପାଣ୍ଡିଆନଙ୍କ ସମେତ ପ୍ରଶାସନିକ ଅଧିକାରୀ ମଧ୍ୟ ମ୍ୟାଚ ଦେଖିବାକୁ ପହଞ୍ଚି ଥିଲେ।
ଏହି ଷ୍ଟାଡିୟମରେ ଆୟୋଜିତ ପ୍ରଥମ ଅନ୍ତର୍ଜାତୀୟ ମ୍ୟାଚକୁ ନିଜର ନାଁରେ ରେକର୍ଡ କରିଛି। ଇଂଲଣ୍ଡ ଟିମ୍ ହକି ବିଶ୍ବକପ୍ର ତୃତୀୟ ମ୍ୟାଚ୍ରେ ଶୁକ୍ରବାର ୱେଲ୍ସକୁ ୫-୦ ଗୋଲରେ ପରାସ୍ତ କରିଥିଲା। ଇଂଲଣ୍ଡର ଖେଳାଳିମାନେ ଆରମ୍ଭରୁ ହିଁ ଲଢୁଆ ମନୋଭାବ ନେଇ ଖେଳିଥିଲେ। ଗୋଟିଏ ମିନିଟ୍ ପୂର୍ବରୁ ପାର୍କ ନିକୋଲାସ ଫିଲ୍ଡ ଗୋଲ୍ ଦେଇଥିଲେ। ଅନସେଲ ଲିଆମ୍ ୨୭ ଓ ୩୭ ମିନିଟରେ ପେନାଲ୍ଟି ଗୋଲ ଗୋଲ ଦେଇଥିଲେ। ସେହିପରି ୪୧ ମିନିଟରେ ରୋପେର ଫିଲ ଫିଲ୍ଡ ଗୋଲ ଦେଇଥିଲେ। ଶେଷ ମୁହୂର୍ତ୍ତରେ ଇଂଲଣ୍ଡର ବନ୍ଦୁରକ ନିକୋଲାସ ୫୭ ମିନିଟରେ ଏକ ଫିଲ୍ଡ ଗୋଲ୍ ଦେଇଥିଲେ।
ଭୁବନେଶ୍ବର କଳିଙ୍ଗ ଷ୍ଟାଡିୟମରେ ଖେଳାଯାଇଥିବା ମ୍ୟାଚରେ ଫ୍ରାନ୍ସକୁ ୮ଟି ଗୋଲ୍ରେ ପରାସ୍ତ କରି ଅଷ୍ଟ୍ରେଲିଆ ଚଳିତ ବିଶ୍ବକପରେ ବିଜୟ ଅଭିଯାନ ଆରମ୍ଭ କରିଥିଲା। ବିଶ୍ୱକପ ଇତିହାସରେ ୩ ଥର ଚାମ୍ପିଅନ ହୋଇସାରିଥିବା ଅଷ୍ଟ୍ରେଲିଆ ଦଳ ଆଜି ଫ୍ରାନ୍ସ ବିପକ୍ଷରେ ଏକତରଫା ବିଜୟ ହାସଲ କରିଥିଲା। କଙ୍ଗାରୁ ଦଳର ଖେଳାଳିମାନେ ଆରମ୍ଭରୁ ଆକ୍ରମଣାତ୍ମକ ଶୈଳୀରେ ମ୍ୟାଚ୍ ଖେଳିଥିଲେ। ଟିମ୍ ପ୍ରଥମ ହାଫ୍ରେ ଗୋଟିଏ ଗୋଲ୍ ଦେଇଥିଲା। ଅଷ୍ଟ୍ରେଲିଆର ଖେଳାଳିମାନେ ଦ୍ବିତୀୟ ଓ ତୃତୀୟ ହାଫ୍ରେ ଯଥାକ୍ରମେ ୩-୩ ଗୋଲ୍ ଦେଇଥିଲେ। ସେହିପରି ଶେଷ ହାଫ୍ରେ କଙ୍ଗାରୁ ଦଳ ଫ୍ରାନ୍ସ ବିପକ୍ଷରେ ଗୋଟିଏ ଗୋଲ ଦେଇଥିଲା। ଅଷ୍ଟ୍ରେଲିଆ ପାଇଁ କ୍ରାଇଗ ଟମ୍ ଓ ହାଏୱାର୍ଡ ଜେରେମି ସର୍ବାଧିକ ୩-୩ ଗୋଲ ଦେଇଥିଲେ। ଟମ୍ ୮, ୩୧ ଓ ୪୪ ମିନିଟରେ ଫିଲ୍ଡ ଗୋଲ୍ ଦେଇଥିଲା ବେଳେ ଜେରେମି ୨୬, ୨୮ ଓ ୩୮ ମିନିଟରେ ପେନାଲ୍ଟି ଗୋଲ ମାରିଥିଲେ। ସେହିପରି ୨୬ ମିନିଟରେ ଓଗିଲିଭ ଫ୍ଲାଇନ୍ ଓ ୫୩ ମିନିଟରେ ୱିକ୍ହାମ୍ ଟମ୍ ଗୋଟିଏ ଲେଖାଏଁ ଗୋଲ୍ ଦେଇଥିଲେ।
ସେପଟେ ପୁରୁଷ ହକି ବିଶ୍ବକପର ୧୫ତମ ସଂସ୍କରଣ ପ୍ରଥମ ମ୍ୟାଚରେ ଆଜେଣ୍ଟିନା ୧-୦ ଗୋଲ୍ରେ ଦକ୍ଷିଣ ଆଫ୍ରିକାକୁ ପରାସ୍ତ କରିଥିଲା। ଉଭୟ ଆର୍ଜେଣ୍ଟିନା ଓ ଦକ୍ଷିଣ ଆଫ୍ରିକା ମଧ୍ୟରେ କଡ଼ା ଟକର ଦେଖିବାକୁ ମିଳିଥିଲା। ତୃତୀୟ ହାଫରେ ଆଜେଣ୍ଟିନା ଦଳ ସାଉଥ ଆଫ୍ରିକାକୁ ଗୋଟିଏ ଗୋଲ୍ ଦେଇଥିଲା।