ବିହାର: ବିହାରରେ ଗୁରୁବାର ଭବ୍ୟ ଆୟୋଜନ ମଧ୍ୟରେ ମନ୍ତ୍ରିମଣ୍ଡଳର ବିସ୍ତାର କରାଯାଇଛି। ମୁଖ୍ୟମନ୍ତ୍ରୀ ସମ୍ରାଟ ଚୌଧୁରୀଙ୍କ ନେତୃତ୍ୱରେ ହୋଇଥିବା ଏହି ଶପଥ ଗ୍ରହଣ ସମାରୋହରେ ଅନେକ ବିଧାୟକ ମନ୍ତ୍ରୀ ଭାବେ ଶପଥ ନେଇଛନ୍ତି। ପୂର୍ବତନ ମୁଖ୍ୟମନ୍ତ୍ରୀ ନୀତିଶ କୁମାରଙ୍କ ପୁଅ ନିଶାନ୍ତ କୁମାରଙ୍କ ମନ୍ତ୍ରିମଣ୍ଡଳରେ ଏଣ୍ଟ୍ରି ସବୁଠାରୁ ଅଧିକ ଚର୍ଚ୍ଚାରେ ରହିଛି।
ଗାନ୍ଧୀ ମୈଦାନରେ ଆୟୋଜିତ ଏହି କାର୍ଯ୍ୟକ୍ରମରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଏବଂ ଗୃହମନ୍ତ୍ରୀ ଅମିତ ଶାହ ସହ ବିଜେପିର ଅନେକ ବରିଷ୍ଠ ନେତା ଉପସ୍ଥିତ ଥିଲେ। ରାଜ୍ୟପାଳ ସୟଦ ଆତା ହସନୈନଙ୍କ ଅନୁମତି ପରେ ଶପଥ ଗ୍ରହଣ ସମାରୋହର ଆନୁଷ୍ଠାନିକ ସମାପ୍ତି ହୋଇଥିଲା।
ନୂତନ ମନ୍ତ୍ରିମଣ୍ଡଳରେ ସୁନୀଲ କୁମାର, ଶ୍ରେୟସୀ ସିଂହ, ମହମ୍ମଦ ଜମା ଖାନ, ନନ୍ଦ କିଶୋର ପ୍ରସାଦ, ଶୈଳେନ୍ଦ୍ର, ପ୍ରମୋଦ କୁମାର, ଶ୍ୱେତା ଗୁପ୍ତା, ମିଥିଳେଶ ତିୱାରୀ, ସଞ୍ଜୟ କୁମାର ସିଂହ ଓ ଦୀପକ ପ୍ରକାଶଙ୍କୁ ସ୍ଥାନ ମିଳିଛି। ଏହା ସହ ରତ୍ନେଶ ସଦା, ଶୀଲା କୁମାରୀ ମଣ୍ଡଳ, କେଦାର ପ୍ରସାଦ ଗୁପ୍ତା ଓ ଲଖେନ୍ଦ୍ର ରୋଶନ ମଧ୍ୟ ମନ୍ତ୍ରୀ ଭାବେ ଶପଥ ନେଇଛନ୍ତି।
ସମାରୋହରେ ବିଜୟ ସିହ୍ନା, ଲେଶି ସିଂହ, ଶ୍ରବଣ କୁମାର ଓ ଦିଲୀପ ଜୟସୱାଲଙ୍କ ଭଳି ବରିଷ୍ଠ ନେତାମାନେ ମଧ୍ୟ ଶପଥ ଗ୍ରହଣ କରିଥିଲେ। ଅନୁଭବୀ ଓ ନୂଆ ମୁହଁଙ୍କୁ ମିଶାଇ ଗଠିତ ଏହି ମନ୍ତ୍ରିମଣ୍ଡଳକୁ ନେଇ ବିହାରର ରାଜନୀତିରେ ନୂଆ ସମୀକରଣ ସୃଷ୍ଟି ହେବ ବୋଲି ଚର୍ଚ୍ଚା ହେଉଛି।