ପଶ୍ଚିମବଙ୍ଗ ବିଧାନସଭା ନିର୍ବାଚନ ଫଳାଫଳକୁ ନେଇ ରାଜ୍ୟରେ ରାଜନୀତିକ ତର୍କବିତର୍କ ଜୋର ଧରିଛି। ନିର୍ବାଚନରେ ବ୍ୟାପକ ଅନିୟମିତତା ହୋଇଥିବା ଅଭିଯୋଗ କରି ତୃଣମୂଳ କଂଗ୍ରେସ (ଟିଏମସି) ଆଇନୀ ପଦକ୍ଷେପ ନେବାକୁ ପ୍ରସ୍ତୁତ ହୋଇଛି। ଦଳ ପକ୍ଷରୁ କୁହାଯାଇଛି ଯେ ଏହି ମାମଲାକୁ ନେଇ ଖୁବଶୀଘ୍ର ସୁପ୍ରିମକୋର୍ଟର ଦ୍ବାରସ୍ଥ ହେବେ। ଟିଏମସି ସୁପ୍ରିମୋ ଓ ମୁଖ୍ୟମନ୍ତ୍ରୀ ମମତା ବାନାର୍ଜୀ ସିଧାସଳଖ ଭାବେ ବିଜେପି ଏବଂ ଭାରତର ନିର୍ବାଚନ ଆୟୋଗ (ଇସିଆଇ) ଉପରେ ଅଭିଯୋଗ ଆଣିଛନ୍ତି। ସେ କହିଛନ୍ତି ଯେ ନିର୍ବାଚନ ପ୍ରକ୍ରିୟାରେ ଗୁରୁତର ଅନିୟମିତତା ହୋଇଛି ଏବଂ ଏହା ଲୋକତନ୍ତ୍ର ପାଇଁ ଚିନ୍ତାଜନକ। ଏହି ଅଭିଯୋଗକୁ ନେଇ ସେ ଅଦାଲତରେ ଲଢେଇ କରିବେ ବୋଲି ଘୋଷଣା କରିଛନ୍ତି।
ମମତା ଆହୁରି କହିଛନ୍ତି ଯେ ଆବଶ୍ୟକ ପଡ଼ିଲେ ସେ ନିଜର ପୂର୍ବ ଆଇନ ପେସାକୁ ଫେରି ଏହି ଲଢେଇକୁ ଆଗକୁ ନେବେ। ବିଜେପି ଜାଲିଆତି କରି ନିର୍ବାଚନରେ ବିଜୟୀ ହୋଇଥିବା ଅଭିଯୋଗ କରି ସେ କହିଛନ୍ତି ଯେ ଲୋକତନ୍ତ୍ରକୁ ବଞ୍ଚାଇବା ପାଇଁ ଏହି ଲଢେଇ ଜାରି ରହିବ।
ତେବେ ବିଜେପି ଟିଏମସିର ସମସ୍ତ ଅଭିଯୋଗକୁ ଖଣ୍ଡନ କରିଛି। ଦଳ ପକ୍ଷରୁ କୁହାଯାଇଛି ଯେ ଜନତାଙ୍କ ସମର୍ଥନରେ ବିଜେପି ବିଜୟ ହାସଲ କରିଛି ଏବଂ ଟିଏମସି ପରାଜୟକୁ ମାନିପାରୁ ନାହିଁ। ଏହି ପ୍ରସଙ୍ଗକୁ ନେଇ ପଶ୍ଚିମବଙ୍ଗର ରାଜନୀତି ଆଗାମୀ ଦିନରେ ଆହୁରି ତୀବ୍ର ହେବା ସ୍ପଷ୍ଟ ହୋଇଛି।