ଧର୍ମେନ୍ଦ୍ର ପ୍ରଧାନଙ୍କ ଇସ୍ତଫା ଦାବି
ନୂଆ ଦିଲ୍ଲୀ: ଦିଲ୍ଲୀର ଯନ୍ତର ମନ୍ତର ଆଜି ଦେଖିଲା ଏକ ବଡ଼ ଗଣ-ଆନ୍ଦୋଳନ। ଅନଲାଇନ୍ ଆନ୍ଦୋଳନରୁ ଉଦ୍ଭବ ହୋଇଥିବା କକ୍ରୋଚ୍ ଜନତା ପାର୍ଟି ହଜାର ହଜାର ଯୁବ, ଛାତ୍ରଛାତ୍ରୀ ଓ ଚାକିରି ଆଶାୟୀଙ୍କ ସହିତ ଯନ୍ତରମନ୍ତରରେ ପ୍ରଥମ ବଡ଼ ରାସ୍ତା ପ୍ରତିବାଦ କରିଛି। ପ୍ରତିବାଦକାରୀମାନେ କେନ୍ଦ୍ର ଶିକ୍ଷାମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ଇସ୍ତଫା ଦାବି କରି ବିଶାଳ ନାରାବାଜି କରିଛନ୍ତି। ସେମାନଙ୍କ ଅଭିଯୋଗ ହେଉଛି ଦେଶର ଶିକ୍ଷା ବ୍ୟବସ୍ଥାରେ ବଢ଼ୁଥିବା ପରୀକ୍ଷା ଅନିୟମିତତା, ପେପର୍ ଲିକ୍ ଘଟଣା ଓ ନିଯୁକ୍ତି ପ୍ରକ୍ରିୟାର ଅସ୍ପଷ୍ଟତା ଯୁବପିଢ଼ିଙ୍କ ଭବିଷ୍ୟତକୁ ସଙ୍କଟରେ ପକାଉଛି।
ସିଜେପି ପ୍ରତିଷ୍ଠାତା ଅଭିଜିତ ଦିପକେ ପ୍ରତିବାଦ ସ୍ଥଳରେ କହିଛନ୍ତି ଯେ ଏହି ଆନ୍ଦୋଳନ ହିଂସାମୁକ୍ତ ରହିବ, କିନ୍ତୁ ଏହାକୁ ଦେଶବ୍ୟାପୀ ଆକାର ଦିଆଯିବ। ସେ କହିଛନ୍ତି, “ଏହା କେବଳ ଟ୍ରେଲର୍, ପରେ ପୂରା ଫିଲ୍ମ ଆସିବ।” ପ୍ରତିବାଦ ସ୍ଥଳରେ “ପୋଷ୍ଟ ଡିଲିଟ୍ ହୋଇପାରେ, କିନ୍ତୁ ଆମେ ନୁହେଁ” ଭଳି ସ୍ଲୋଗାନ୍ ଶୁଣିବାକୁ ମିଳିଛି। ଯୁବମାନେ ସୋସିଆଲ୍ ମିଡିଆ ନିୟନ୍ତ୍ରଣ ଓ ସିଷ୍ଟମିକ୍ ଅସନ୍ତୋଷକୁ ନେଇ ତୀବ୍ର ପ୍ରତିକ୍ରିୟା ଜଣାଇଛନ୍ତି। ପୋଲିସ ପକ୍ଷରୁ ଯନ୍ତରମନ୍ତର ଅଞ୍ଚଳରେ ହାଇ-ଆଲର୍ଟ ଘୋଷଣା କରାଯାଇ ବାରିକେଡ୍ ଲଗାଯାଇଥିଲା। ଭିଡ଼ ନିୟନ୍ତ୍ରଣ ପାଇଁ ଅତିରିକ୍ତ ବଳ ମୁତୟନ କରାଯାଇଥିବା ବେଳେ କିଛି ଲୋକଙ୍କୁ ଅଟକ ରଖାଯାଇଥିବା ଖବର ମିଳିଛି।
ସିଜେପି ଘୋଷଣା କରିଛି ଯେ ଆଜି ଅପରାହ୍ନ ୫ଟା ପର୍ଯ୍ୟନ୍ତ ପ୍ରତିବାଦ ଚାଲିବ। ଯଦି ଦାବି ପୂରଣ ନ ହୁଏ, ତେବେ ଆଗାମୀ ଦିନରେ ଆନ୍ଦୋଳନ ଆଉ ତୀବ୍ର ହେବ ଏବଂ ଜୁନ ୨୩ରେ ରାମଲୀଳା ମୈଦାନରେ ବଡ଼ ସମାବେଶ ଆୟୋଜନ କରାଯିବ ବୋଲି ସଙ୍କେତ ମିଳିଛି। ପରୀକ୍ଷା ଦୁର୍ନୀତି, ପେପର୍ ଲିକ୍ ଓ ଛାତ୍ର ଆତ୍ମହତ୍ୟା ଭଳି ଗୁରୁତର ଅଭିଯୋଗ ମଧ୍ୟ ଆନ୍ଦୋଳନର ମୂଳ କାରଣ ଭାବେ ଉଠିଛି। ଏହାକୁ ନେଇ ରାଜନୈତିକ ମହଲରେ ମଧ୍ୟ ଚର୍ଚ୍ଚା ବଢ଼ିଛି, ଯେଉଁଠାରେ କିଛି ଦଳ ଆନ୍ଦୋଳନକୁ ସମର୍ଥନ ଦେଉଥିବା ବେଳେ ଶାସକ ଦଳ ଏହାକୁ ରାଜନୈତିକ ଉଦ୍ଦେଶ୍ୟପୂର୍ଣ୍ଣ ବୋଲି ମତ ଦେଇଛି।