ରେଢ଼ାଖୋଲ: ସମ୍ବଲପୁର ଜିଲ୍ଲା ରେଢ଼ାଖୋଲ ବନଖଣ୍ଡ ଅନ୍ତର୍ଗତ ବଡବାହାଳ ରେଞ୍ଜର ସାନ ନୂଆପଡା ଗାଁ ନିକଟରେ ବଣୁଆ ହାତୀ ଆକ୍ରମଣରେ ଜଣେ ଯୁବକଙ୍କ ମୃତ୍ୟୁ ଘଟିଥିବା ଘଟଣା ଅଞ୍ଚଳରେ ଚାଞ୍ଚଲ୍ୟ ସୃଷ୍ଟି କରିଛି। ମୃତ ଯୁବକ ହେଲେ ଅନୁଗୁଳ ଜିଲ୍ଲା କିଶୋରନଗର ବ୍ଲକ ଟାପୁରସିଙ୍ଗା ଗାଁର ନରେନ୍ଦ୍ର ପ୍ରଧାନ। ବୁଧବାର ସକାଳେ ସାନ ନୂଆପଡା ଗ୍ରାମବାସୀମାନେ ପୀଢ ନିକଟରେ ନରେନ୍ଦ୍ରଙ୍କ ମୃତଦେହ ପଡ଼ିଥିବା ଦେଖି ପୁଲିସ ଓ ବନବିଭାଗକୁ ଖବର ଦେଇଥିଲେ। ମୃତଦେହ ନିକଟରେ ହାତୀର ପାଦଚିହ୍ନ ଓ ଘଟଣାସ୍ଥଳର ପରିସ୍ଥିତି ଦେଖି ହାତୀ ଆକ୍ରମଣରେ ତାଙ୍କର ମୃତ୍ୟୁ ହୋଇଥିବା ସନ୍ଦେହ କରାଯାଉଛି।
ସୂଚନା ଅନୁଯାୟୀ, ଗତ କିଛି ଦିନ ଧରି ଏକ ଆକ୍ରମଣାତ୍ମକ ଗୋଠଛଡ଼ା ଦନ୍ତା ହାତୀ ସମଗ୍ର ଅଞ୍ଚଳରେ ବୁଲି ଉପଦ୍ରବ ଚଳାଇଥିଲା। ମଣିଷଙ୍କୁ ଦେଖିଲେ ହାତୀଟି ଆକ୍ରମଣ କରିବାକୁ ଗୋଡ଼ାଉଥିବା ଅଭିଯୋଗ ରହିଛି। ଗତ ରାତିରେ ମଧ୍ୟ ହାତୀଟି ସାନ ନୂଆପଡା, ବଡ କସିବାହାଳ ଓ ଆଖପାଖ ଅଞ୍ଚଳରେ ବୁଲି ଆତଙ୍କ ସୃଷ୍ଟି କରୁଥିଲା। ସ୍ଥାନୀୟ ଲୋକଙ୍କ ଅନୁଯାୟୀ, ନରେନ୍ଦ୍ର କୌଣସି କାମ ସାରି ରାତିରେ ଘରକୁ ଫେରୁଥିବା ବେଳେ ହାତୀ ସାମ୍ନାରେ ପଡ଼ିଯାଇଥିଲେ ଏବଂ ଦନ୍ତା ହାତୀ ତାଙ୍କୁ କଚାଡ଼ି ହତ୍ୟା କରିଥାଇପାରେ। ଘଟଣା ପରେ ଅଞ୍ଚଳରେ ଉତ୍ତେଜନା ଦେଖାଦେଇଥିବା ବେଳେ ରେଢ଼ାଖୋଲ ପୁଲିସ ଓ ବନବିଭାଗର ଅଧିକାରୀମାନେ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛନ୍ତି। ଆକ୍ରମଣାତ୍ମକ ହାତୀକୁ ନିୟନ୍ତ୍ରଣ କରିବା ସହ ଗ୍ରାମବାସୀଙ୍କ ସୁରକ୍ଷା ପାଇଁ ତୁରନ୍ତ ପଦକ୍ଷେପ ନେବାକୁ ଦାବି ଜୋର ଧରିଛି।