ବଲାଙ୍ଗିରରେ ୧୨୧.୮୦ କୋଟି ଟଙ୍କାର ୩ ଲିଫ୍ଟ ସେଚନ ପ୍ରକଳ୍ପକୁ କ୍ୟାବିନେଟ୍ ମଞ୍ଜୁରି
ବଲାଙ୍ଗିର: ରାଜ୍ୟ କ୍ୟାବିନେଟ୍ ବଲାଙ୍ଗିର ଜିଲ୍ଲାରେ ‘ପାର୍ବତୀ ଗିରି ମେଗା ଲିଫ୍ଟ ଇରିଗେସନ୍ ସ୍କିମ୍’ର କ୍ଲଷ୍ଟର-୩୬ ଅଧୀନରେ ୩ଟି ଲିଫ୍ଟ ସେଚନ ପ୍ରକଳ୍ପ କାର୍ଯ୍ୟକାରୀ କରିବା ପାଇଁ ସର୍ବନିମ୍ନ ଆର୍ଥିକ ଦରପତ୍ରକୁ ଅନୁମୋଦନ କରିଛି। ଏହି ପ୍ରକଳ୍ପର କାର୍ଯ୍ୟନିର୍ବାହ ପାଇଁ ୧୨୧ କୋଟି ୮୦ ଲକ୍ଷ ୭୮ ହଜାର ୬୬୧ ଟଙ୍କା ବ୍ୟୟ ହେବ। ଏହା ସହ ୧୫ ବର୍ଷର ପରିଚାଳନା ଓ ରକ୍ଷଣାବେକ୍ଷଣ (ଓ ଆଣ୍ଡ ଏମ୍) ଖର୍ଚ୍ଚ ବାବଦକୁ ୯ କୋଟି ୭୪ ଲକ୍ଷ ୪୬ ହଜାର ୨୯୩ ଟଙ୍କା ମଞ୍ଜୁର କରାଯାଇଛି।
ପ୍ରକଳ୍ପଟିକୁ ୩୬ ମାସ ମଧ୍ୟରେ ସମ୍ପୂର୍ଣ୍ଣ କରିବାର ଲକ୍ଷ୍ୟ ଧାର୍ଯ୍ୟ କରାଯାଇଛି। ଏହା ଅଧୀନରେ ତେଲ ନଦୀ ଓ ଉନ୍ଦର ନଦୀରୁ ପାଥର୍ଲା ଆଇଏସ୍ଏସ୍ ଇନ୍ଟେକ୍ ବ୍ୟବସ୍ଥା ମାଧ୍ୟମରେ ଜଳ ଉଠାଯାଇ ଚାପଯୁକ୍ତ ବଣ୍ଟନ ପ୍ରଣାଳୀ ଜରିଆରେ ଚାଷଜମିକୁ ପହଞ୍ଚାଯିବ। ଏହାଦ୍ୱାରା ବଲାଙ୍ଗିର ଜିଲ୍ଲାରେ ପ୍ରାୟ ୪,୩୩୦ ହେକ୍ଟର ଅତିରିକ୍ତ ଜମିକୁ ସେଚନ ସୁବିଧା ମିଳିବ।
୧୦,୭୫୯.୨୦ କୋଟି ଟଙ୍କା ବ୍ୟୟରେ ପ୍ରସ୍ତୁତ ‘ପାର୍ବତୀ ଗିରି ମେଗା ଲିଫ୍ଟ ଇରିଗେସନ୍ ସ୍କିମ୍’ର ଲକ୍ଷ୍ୟ ହେଉଛି ରାଜ୍ୟର ୨ ଲକ୍ଷ ୬୩ ହଜାର ୮୦୧ ହେକ୍ଟର ଉଚ୍ଚଭୂମି ଚାଷଜମିକୁ ଖରିଫ ଋତୁରେ ସହାୟକ ସେଚନ ସୁବିଧା ପ୍ରଦାନ କରିବା। ଭୌଗୋଳିକ ପ୍ରତିବନ୍ଧକତା ଯୋଗୁଁ ଏହି ଅଞ୍ଚଳଗୁଡ଼ିକ ସାଧାରଣ ପ୍ରବାହ ଭିତ୍ତିକ ସେଚନ ବ୍ୟବସ୍ଥାରୁ ବଞ୍ଚିତ ଥିଲେ।
ପ୍ରକଳ୍ପ ସମ୍ପୂର୍ଣ୍ଣ ହେଲେ ବଲାଙ୍ଗିର ଜିଲ୍ଲାର ୨୫ଟି ଗାଁର ଚାଷୀମାନେ ସିଧାସଳଖ ଭାବେ ଉପକୃତ ହେବେ। ମାଇକ୍ରୋ ଇରିଗେସନ୍ ବ୍ୟବସ୍ଥା ସହ ସୁସଙ୍ଗତ ଥିବାରୁ ଚାଷୀମାନଙ୍କୁ ଅଧିକ ଜଳ ଆବଶ୍ୟକ କରୁଥିବା ଧାନ ଚାଷ ପରିବର୍ତ୍ତେ ନଗଦ ଫସଲ ଚାଷ ଦିଗରେ ଉତ୍ସାହିତ କରାଯିବ।
ସରକାରଙ୍କ ମତାନୁସାରେ, ଏହି ପ୍ରକଳ୍ପ ଉଚ୍ଚଭୂମି ଅଞ୍ଚଳର ଚାଷୀମାନଙ୍କୁ ନିଶ୍ଚିତ ସେଚନ ସୁବିଧା ଯୋଗାଇବା ସହ ଫସଲ ବିବିଧୀକରଣକୁ ପ୍ରୋତ୍ସାହନ ଦେବ ଏବଂ ସେମାନଙ୍କ ଆର୍ଥିକ ଓ ସାମାଜିକ ସ୍ଥିତିରେ ଉନ୍ନତି ଆଣିବ।