କୋଲକତା: ପ୍ରସିଦ୍ଧ ବାଂଲାଦେଶୀ ଲେଖିକା ଓ କବୟିତ୍ରୀ ତସଲିମା ନସ୍ରିନ ପ୍ରାୟ ୧୯ ବର୍ଷ ପରେ କୋଲକାତା ଆସୁଛନ୍ତି। ୨୦୦୭ ମସିହାରେ ତାଙ୍କ ବିବାଦୀୟ ପୁସ୍ତକ ‘ଦ୍ୱିଖଣ୍ଡିତ’କୁ କେନ୍ଦ୍ର କରି କୋଲକାତାରେ ହିଂସାତ୍ମକ ପରିସ୍ଥିତି ସୃଷ୍ଟି ହେବା ପରେ ସେ ସହର ଛାଡ଼ିଥିଲେ। ବର୍ତ୍ତମାନ ସେ ଆସନ୍ତା ଅଗଷ୍ଟ ୧ରେ କୋଲକାତାର ରବୀନ୍ଦ୍ର ସଦନରେ ଆୟୋଜିତ ଏକ ସାଂସ୍କୃତିକ କାର୍ଯ୍ୟକ୍ରମରେ ଯୋଗଦେବେ। ‘ସେକ୍ୟୁଲାର ମିଶନ’ ସମେତ ବିଭିନ୍ନ ସାଂସ୍କୃତିକ ସଂଗଠନଙ୍କ ମିଳିତ ଆୟୋଜନରେ ହେବାକୁ ଥିବା ଏହି କାର୍ଯ୍ୟକ୍ରମରେ ତସଲିମା ନସ୍ରିନଙ୍କ ଉପନ୍ୟାସ, ଗଳ୍ପ ଓ କବିତାକୁ କେନ୍ଦ୍ର କରି ଆଲୋଚନା ହେବ। ଆୟୋଜକମାନେ ପଶ୍ଚିମବଙ୍ଗ ବିଧାନସଭାର ବିରୋଧୀ ଦଳନେତା ସୁଭେନ୍ଦୁ ଅଧିକାରୀଙ୍କୁ ମଧ୍ୟ ଆମନ୍ତ୍ରଣ କରିଥିବା ବେଳେ ସେ ଯୋଗଦେବାକୁ ସମ୍ମତି ଜଣାଇଥିବା ସୂଚନା ମିଳିଛି।
ଆୟୋଜକ ମୋହିତ ରାୟ କହିଛନ୍ତି, ତସଲିମା ନସ୍ରିନଙ୍କ ସୁରକ୍ଷାକୁ ଦୃଷ୍ଟିରେ ରଖି ରାଜ୍ୟ ପୁଲିସ ପକ୍ଷରୁ କଡ଼ା ସୁରକ୍ଷା ବ୍ୟବସ୍ଥାର ଆଶ୍ୱାସନ ଦିଆଯାଇଛି। ସେ ଏହା ମଧ୍ୟ ସ୍ପଷ୍ଟ କରିଛନ୍ତି ଯେ କାର୍ଯ୍ୟକ୍ରମରେ କୌଣସି ରାଜନୀତିକ ଉଦ୍ଦେଶ୍ୟ ନାହିଁ। ଅନ୍ୟପଟେ, ଏହି ଘଟଣାକୁ ନେଇ ବିବାଦ ମଧ୍ୟ ଦେଖାଦେଇଛି। ଅଲ୍ ଇଣ୍ଡିଆ ସେକ୍ୟୁଲାର ଫ୍ରଣ୍ଟ ବିଧାୟକ ନୌଶାଦ ସିଦ୍ଦିକୀ ତସଲିମାଙ୍କ ଗସ୍ତକୁ ନେଇ ପ୍ରଶ୍ନ ଉଠାଇଛନ୍ତି। ସେ ଅଭିଯୋଗ କରିଛନ୍ତି ଯେ ଲୋକଙ୍କ ଦୃଷ୍ଟି ଅନ୍ୟ ପ୍ରସଙ୍ଗରୁ ହଟାଇବା ପାଇଁ ଏହି ପଦକ୍ଷେପ ନିଆଯାଉଛି।
ଉଲ୍ଲେଖଯୋଗ୍ୟ, ୨୦୦୭ ମସିହାରେ ତସଲିମା ନସ୍ରିନଙ୍କ ‘ଦ୍ୱିଖଣ୍ଡିତ’ ପୁସ୍ତକକୁ ନେଇ କୋଲକାତାର କିଛି ଅଞ୍ଚଳରେ ବ୍ୟାପକ ହିଂସାକାଣ୍ଡ ଘଟିଥିଲା। ପରିସ୍ଥିତି ଏତେ ଉତ୍ତେଜନାପୂର୍ଣ୍ଣ ହୋଇପଡ଼ିଥିଲା ଯେ ସେତେବେଳେ ସେନା ମୁତୟନ କରିବାକୁ ପଡ଼ିଥିଲା। ବାମ ସରକାର ଏହି ପୁସ୍ତକର ପ୍ରଚାର ଉପରେ ନିଷେଧାଜ୍ଞା ଲାଗୁ କରିଥିଲେ ଏବଂ ତସଲିମାଙ୍କୁ କୋଲକାତା ଛାଡ଼ିବାକୁ ପଡ଼ିଥିଲା। ଏହା ପରେ ଦୀର୍ଘ ସମୟ ଧରି ସେ କୋଲକାତାରୁ ଦୂରେ ରହିଥିଲେ। ଏବେ ୧୯ ବର୍ଷ ପରେ ତାଙ୍କର ଏହି ପ୍ରତ୍ୟାବର୍ତ୍ତନ ପଶ୍ଚିମବଙ୍ଗର ସାଂସ୍କୃତିକ ଓ ସାମାଜିକ ମହଲରେ ନୂଆ ଚର୍ଚ୍ଚାର ବିଷୟ ପାଲଟିଛି।