ନୂଆଦିଲ୍ଲୀ: ଶିକ୍ଷକ ଦିବସ ଅବସରରେ ସେପ୍ଟେମ୍ବର ୫ରେ ରାଷ୍ଟ୍ରପତି ଦ୍ରୌପଦୀ ମୁର୍ମୁ ଉଚ୍ଚଶିକ୍ଷା ଅନୁଷ୍ଠାନ ଓ ପଲିଟେକ୍ନିକ୍ର ୨୧ ଜଣ ଶିକ୍ଷକଙ୍କୁ ଜାତୀୟ ଶିକ୍ଷକ ପୁରସ୍କାର ପ୍ରଦାନ କରିବେ। ଏନେଇ ସୋମବାର ଶିକ୍ଷା ମନ୍ତ୍ରଣାଳୟ ପକ୍ଷରୁ ସୂଚନା ଦିଆଯାଇଛି।
ଚଳିତବର୍ଷ କେନ୍ଦ୍ରୀୟ ଉଚ୍ଚଶିକ୍ଷା ଅନୁଷ୍ଠାନର ୧୨ ଜଣ ଶିକ୍ଷକ ଏହି ସମ୍ମାନ ପାଇଁ ମନୋନୀତ ହୋଇଛନ୍ତି। ସେହିପରି ବିଶ୍ୱବିଦ୍ୟାଳୟ ସମେତ ରାଜ୍ୟସ୍ତରୀୟ ଉଚ୍ଚଶିକ୍ଷା ଅନୁଷ୍ଠାନର ୫ ଜଣ ଏବଂ ପଲିଟେକ୍ନିକ୍ର ୪ ଜଣ ଶିକ୍ଷକଙ୍କୁ ମଧ୍ୟ ପୁରସ୍କୃତ କରାଯିବ। ରାଜ୍ୟସ୍ତରୀୟ ଅନୁଷ୍ଠାନର ମନୋନୀତ ୫ ଜଣଙ୍କ ମଧ୍ୟରେ ୩ଟି ସରକାରୀ ଓ ୨ଟି ଘରୋଇ କଲେଜର ଶିକ୍ଷକ ରହିଛନ୍ତି। ପଲିଟେକ୍ନିକ୍ ବର୍ଗରେ ୨ଟି ସରକାରୀ ଓ ୨ଟି ଘରୋଇ ଅନୁଷ୍ଠାନର ଶିକ୍ଷକ ମନୋନୀତ ହୋଇଛନ୍ତି।
୨୦୨୬ ପାଇଁ ଜାତୀୟ ଶିକ୍ଷକ ପୁରସ୍କାର ନିମନ୍ତେ ଅନଲାଇନ୍ ମାଧ୍ୟମରେ ରାଷ୍ଟ୍ରୀୟ ପୁରସ୍କାର ପୋର୍ଟାଲରେ ଆବେଦନ ଗ୍ରହଣ କରାଯାଇଥିଲା। ମେ’ ୨୬ରୁ ଜୁଲାଇ ୨୦ ପର୍ଯ୍ୟନ୍ତ ନାମାଙ୍କନ ପ୍ରକ୍ରିୟା ଚାଲିଥିଲା। ଏଥିରେ ନିଜେ ନିଜକୁ, ଅନୁଷ୍ଠାନ ଏବଂ ସହକର୍ମୀଙ୍କ ମାଧ୍ୟମରେ ନାମାଙ୍କନ କରିବାର ସୁଯୋଗ ରହିଥିଲା।
ଶିକ୍ଷାଦାନର ଗୁଣବତ୍ତା, ଶିକ୍ଷଣ ପ୍ରକ୍ରିୟାର ପ୍ରଭାବ, ସାମାଜିକ ପହଞ୍ଚ, ଗବେଷଣା ଓ ନୂତନତ୍ୱ, ପ୍ରାୟୋଜିତ ଗବେଷଣା, ଅଧ୍ୟାପକ ବିକାଶ କାର୍ଯ୍ୟକ୍ରମ ଓ ପରାମର୍ଶଦାନ ଭଳି ବିଭିନ୍ନ ମାନଦଣ୍ଡ ଆଧାରରେ ଶିକ୍ଷକଙ୍କୁ ଚୟନ କରାଯାଇଛି।
ପୁରସ୍କାର ପାଇଁ ଚୟନ ପ୍ରକ୍ରିୟା ଦୁଇଟି ପର୍ଯ୍ୟାୟରେ ହୋଇଛି। ପ୍ରଥମେ ସର୍ଚ୍ଚ-କମ୍-ସ୍କ୍ରିନିଂ କମିଟି ନାମାଙ୍କନଗୁଡ଼ିକର ପ୍ରାଥମିକ ଯାଞ୍ଚ କରିଥିଲା। ପରେ ଜୁରି କମିଟି ଚୂଡ଼ାନ୍ତ ମନୋନୟନ କରିଛି। ୨୦୨୩ରେ ଜାତୀୟ ଶିକ୍ଷକ ପୁରସ୍କାରର ପରିସର ବଢ଼ାଇ ଉଚ୍ଚଶିକ୍ଷା ଅନୁଷ୍ଠାନ ଓ ପଲିଟେକ୍ନିକ୍କୁ ସାମିଲ କରାଯାଇଥିଲା। ଏହା ପୂର୍ବରୁ ଏହି ପୁରସ୍କାର କେବଳ ସ୍କୁଲ ଶିକ୍ଷକଙ୍କୁ ଦିଆଯାଉଥିଲା। ଜାତୀୟ ଶିକ୍ଷା ନୀତି-୨୦୨୦ରେ ଶିକ୍ଷା କ୍ଷେତ୍ରରେ ଉତ୍କର୍ଷର ପରିବେଶ ସୃଷ୍ଟି ପାଇଁ ପ୍ରୋତ୍ସାହନ ଓ ସ୍ୱୀକୃତିକୁ ଗୁରୁତ୍ୱ ଦିଆଯାଇଥିବାରୁ ଏହି ପରିସର ବଢ଼ାଯାଇଛି।