ନୂଆଦିଲ୍ଲୀ: ଇରାନ ଓ ଆମେରିକା ମଧ୍ୟରେ ଚାଲିଥିବା ଯୁଦ୍ଧର ପ୍ରଭାବ ଏବେ ଇନ୍ଧନ ଦର ଉପରେ ମଧ୍ୟ ପଡ଼ିବାରେ ଲାଗିଛି। ଦେଶରେ ମହଙ୍ଗା ମାଡ଼ ମଧ୍ୟରେ ଇନ୍ଦ୍ରପ୍ରସ୍ଥ ଗ୍ୟାସ୍ ଲିମିଟେଡ୍ (ଆଇଜିଏଲ) ପୁଣିଥରେ ସିଏନଜି ଦର ବଢ଼ାଇଛି। ଦିଲ୍ଲୀରେ ସିଏନଜି ଦର କିଲୋଗ୍ରାମ ପିଛା ୩ ଟଙ୍କା ୮୯ ପଇସା ବୃଦ୍ଧି ପାଇଛି।
ଚଳିତ ବର୍ଷ ଏହା ପ୍ରଥମ ସିଏନଜି ଦର ବୃଦ୍ଧି ନୁହେଁ। ଗତ ୪ ମାସ ମଧ୍ୟରେ ଦିଲ୍ଲୀ-ଏନସିଆର ଅଞ୍ଚଳରେ ସିଏନଜି ଦର ପ୍ରାୟ ୧୦ ଟଙ୍କା ପ୍ରତି କିଲୋଗ୍ରାମ ବଢ଼ିସାରିଛି। ଏହି ଅବଧିରେ ମୋଟ ୫ ଥର ଦର ବୃଦ୍ଧି କରାଯାଇଥିବା ଜଣାପଡ଼ିଛି। ଯୁଦ୍ଧ ଆରମ୍ଭ ପରେ ମେ’ ୧୫ ତାରିଖରେ ପ୍ରଥମଥର ପାଇଁ ସିଏନଜି ଦର ବଢ଼ିଥିଲା। ସେତେବେଳେ ଆଇଜିଏଲ କିଲୋଗ୍ରାମ ପିଛା ୨ ଟଙ୍କା ବୃଦ୍ଧି କରିଥିଲା। ଏହାପରେ ମେ’ ୧୭, ୨୩ ଏବଂ ୨୬ ତାରିଖରେ ପର୍ଯ୍ୟାୟକ୍ରମେ ଦର ବଢ଼ାଯାଇଥିଲା।
ବିଶେଷକରି ମେ’ ୧୭ରୁ ୨୬ ମଧ୍ୟରେ ମାତ୍ର ୧୦ ଦିନରେ ସିଏନଜି ଦର କିଲୋଗ୍ରାମ ପିଛା ୬ ଟଙ୍କା ବୃଦ୍ଧି ପାଇଥିଲା। ବାରମ୍ବାର ଦର ବୃଦ୍ଧି ଯୋଗୁ ଦିଲ୍ଲୀ-ଏନସିଆରରେ ସିଏନଜି ଗାଡ଼ି ଚଳାଉଥିବା ଲୋକଙ୍କ ମାସିକ ଖର୍ଚ୍ଚ ବଢ଼ିଛି। ଏହାର ପରୋକ୍ଷ ପ୍ରଭାବ ପରିବହନ ଖର୍ଚ୍ଚ ଓ ସାଧାରଣ ଲୋକଙ୍କ ଉପରେ ମଧ୍ୟ ପଡ଼ିବାର ଆଶଙ୍କା ରହିଛି।