ଅଯୋଧ୍ୟା: ଅଯୋଧ୍ୟାସ୍ଥିତ ଶ୍ରୀରାମ ଜନ୍ମଭୂମି ତୀର୍ଥ କ୍ଷେତ୍ର ଟ୍ରଷ୍ଟର ମୁଖ୍ୟ କାର୍ଯ୍ୟନିର୍ବାହୀ ଅଧିକାରୀ ପଦ ପାଇଁ ମୋଟ ୫,୨୦୦ଟି ଆବେଦନ ମିଳିଛି। ଏହି ଚୟନ ପ୍ରକ୍ରିୟା ଆସନ୍ତା ଏକ ମାସ ମଧ୍ୟରେ ସମ୍ପୂର୍ଣ୍ଣ ହେବ ବୋଲି ବୁଧବାର ଟ୍ରଷ୍ଟ ପକ୍ଷରୁ ସୂଚନା ଦିଆଯାଇଛି। ରାମ ମନ୍ଦିର ପରିସରରେ ଆୟୋଜିତ ଏକ ସ୍ୱତନ୍ତ୍ର ବୈଠକରେ ନୂତନ ସାଧାରଣ ସମ୍ପାଦକ ନିଯୁକ୍ତି, ଖାଲି ପଡ଼ିଥିବା ତିନିଟି ଟ୍ରଷ୍ଟି ପଦ ପୂରଣ ଏବଂ ପ୍ରଥମ ମୁଖ୍ୟ କାର୍ଯ୍ୟନିର୍ବାହୀ ଅଧିକାରୀ ନିଯୁକ୍ତି ସମ୍ପର୍କରେ ଆଲୋଚନା ହୋଇଥିଲା।
ଟ୍ରଷ୍ଟର ଅନ୍ତରୀଣ ସାଧାରଣ ସମ୍ପାଦକ କୃଷ୍ଣ ମୋହନ କହିଛନ୍ତି ଯେ, ମୁଖ୍ୟ କାର୍ଯ୍ୟନିର୍ବାହୀ ଅଧିକାରୀ ପଦ ପାଇଁ ବିପୁଳ ସଂଖ୍ୟାରେ ଆବେଦନ ଆସିଥିବାରୁ ଚୟନ ପ୍ରକ୍ରିୟାକୁ ଆଉ ଚାରି ସପ୍ତାହ ବଢ଼ାଇବାକୁ ବୋର୍ଡ ନିଷ୍ପତ୍ତି ନେଇଛି। ଦାନ ଅର୍ଥ ହଡ଼ପ ଅଭିଯୋଗକୁ ନେଇ ବିଭିନ୍ନ ଚର୍ଚ୍ଚା ସତ୍ତ୍ୱେ ଭକ୍ତମାନଙ୍କ ଆସ୍ଥା ଅଟୁଟ ରହିଛି ଏବଂ ମନ୍ଦିରକୁ ଆସୁଥିବା ଭକ୍ତଙ୍କ ସଂଖ୍ୟାରେ କୌଣସି ହ୍ରାସ ଘଟିନାହିଁ ବୋଲି ସେ କହିଛନ୍ତି। ଟ୍ରଷ୍ଟର କୋଷାଧ୍ୟକ୍ଷ ଗୋବିନ୍ଦ ଦେବ ଗିରି କହିଛନ୍ତି ଯେ, ମନ୍ଦିରର ଧାର୍ମିକ ଆଚାର-ବିଚାର ଓ ପରମ୍ପରାକୁ ସଠିକ୍ ଭାବେ ପାଳନ କରିବା ପାଇଁ ଏକ ୯ ସଦସ୍ୟ ବିଶିଷ୍ଟ ଧାର୍ମିକ କମିଟି ପୁନର୍ଗଠନ କରାଯାଇଛି। ଏଥିରେ ଅଯୋଧ୍ୟାର ୫ ଜଣ ସନ୍ଥ ଏବଂ ଅନ୍ୟ ମନ୍ଦିର ଟ୍ରଷ୍ଟର ୪ ଜଣ ସଦସ୍ୟ ରହିବେ।
ସେ ଆହୁରି କହିଛନ୍ତି ଯେ, ରାମ ମନ୍ଦିର ଟ୍ରଷ୍ଟ ଦ୍ୱାରା ପ୍ରମାଣିତ ଏକ ସ୍ଥାୟୀ ପ୍ରଶିକ୍ଷଣ ପ୍ରତିଷ୍ଠାନ ସ୍ଥାପନ କରାଯିବ, ଯେଉଁଠାରେ ପୂଜକମାନଙ୍କୁ ଧାର୍ମିକ ଆଚାର ଓ ପୂଜା ପଦ୍ଧତି ସମ୍ପର୍କରେ ତାଲିମ ଦିଆଯିବ। ଏହି ପ୍ରଶିକ୍ଷିତ ପୂଜକମାନେ ରାମ ମନ୍ଦିର ସମେତ ୧୪ଟି ମନ୍ଦିରରେ ସେବା ଦେବେ। ଦାନ ଅର୍ଥ ହଡ଼ପ ଅଭିଯୋଗର ତଦନ୍ତ ସମ୍ପର୍କରେ ଟ୍ରଷ୍ଟ କହିଛି ଯେ, ଏହି ମାମଲାର ତଦନ୍ତ କରୁଥିବା ସ୍ୱତନ୍ତ୍ର ତଦନ୍ତକାରୀ ଦଳ ର ଚୂଡ଼ାନ୍ତ ରିପୋର୍ଟ ଏପର୍ଯ୍ୟନ୍ତ ମିଳିନଥିବାରୁ ବୈଠକରେ ଏ ବିଷୟରେ କୌଣସି ଆଲୋଚନା ହୋଇନଥିଲା।