ଚୀନରେ ପୁଣି ଥରେ କରୋନା ସଂକ୍ରମଣ ବଢିବା ଆରମ୍ଭ ହୋଇଛି । ଗତ କିଛି ଦିନଧରି ଲଗାତର ସଂକ୍ରମଣ ମାମଲା ବୃଦ୍ଧି ପାଉଥିବାର ଦେଖିବାକୁ ମିଳିଛି । ନୂଆ ମାମଲା ସାମନାକୁ ଆସୁଥିବାରୁ ଚୀନ ସରକାର ପୁଣି କଠୋର ପଦକ୍ଷେପ ନେଇଛନ୍ତି। ବିମାନ ବାତିଲ କରିଦିଆଯାଇଛି । କିଛି ଯାଗାରେ ସ୍କୁଲ ବନ୍ଦ କରିଦିଆଯିବା ସହ ସଂକ୍ରମଣ ଅଧିକ ବୃଦ୍ଧି ପାଉଥିବା ଜାଗାରେ ଲକଡାଉନ ଘୋଷଣା କରାଯାଇଛି ।
ମିଳିଥିବା ସୂଚନା ଅନୁସାରେ, ଚୀନର ଉତ୍ତର ଓ ଉତ୍ତର-ପଶ୍ଚିମ ସହରରେ ସଂକ୍ରମଣ ବ୍ୟାପୁଛି । କିଛି ବାହାରୁ ଆସୁଥିବା ଯାତ୍ରୀଙ୍କ ପାଇଁ ଏହି ସଂକ୍ରମଣ ବଢୁଥିବା କୁହାଯାଉଛି । ତେଣୁ ପ୍ରଶାସନ ପଦକ୍ଷେପ ନେବା ଆରମ୍ଭ କରିଦେଇଛନ୍ତି । ଅଧିକରୁ ଅଧିକ କରୋନା ନମୂନା ପରୀକ୍ଷା କରାଯାଉଛି । ପର୍ଯ୍ୟଟନ ସ୍ଥଳୀ ଗୁଡିକ ମଧ୍ୟ ବନ୍ଦ କରିଦିଆଯାଇଛି । ଚୀନର ଲାନଜୋନ ଅଞ୍ଚଳରେ ଲୋକଙ୍କୁ ଆବଶ୍ୟକ ନଥିଲେ ଘରୁ ବାହାରିବାକୁ ମନା କରାଯାଇଛି । ଯଦି କିଛି ଜରୁରୀ କାମ ନାହିଁ ତାହେଲେ ଘରେ ରହିବାକୁ ନିବେଦନ କରାଯାଇଛି ।
ସୂଚନା ଅନୁସାରେ, ଲାନଜୋନ ଓ ସିଆନ ଅଞ୍ଚଳରେ ୬୦ ପ୍ରତିଶତ ବିମାନ ଉଡାଣ ବାତିଲ କରାଯାଇଛି । କୁହାଯାଉଛି ଯେ, ମଙ୍ଗୋଲିଆ ଅଞ୍ଚଳରେ କରୋନାର ନୂଆ ମାମଲା ବଢୁଥିବା ଯୋଗୁଁ କୋଇଲା ଆମଦାନୀ ପ୍ରଭାବିତ ହୋଇପାରେ । ଚୀନ ନିଜ ଦେଶରେ ଗୋଟିଏ ବି କରୋନା ସକ୍ରିୟ ମାମଲା ଚାହୁଁନଥିବା ବେଳେ କଠୋରୁ କେଠୋରରୁ ପଦକ୍ଷେପ ନେଉଛନ୍ତି । ତେଣୁ ଜଣେ ବି କରୋନା ସଂକ୍ରମିତ ଚିହ୍ନଟ ହେବା ପରେ ଚୀନରେ ଆତଙ୍କିତ ହେବା ଭଳି ପରିସ୍ଥିତି ସୃଷ୍ଟି ହେଉଛି ।