ବଲିଉଡ ସୁପରଷ୍ଟାର ଶାହାରୁଖ ଖାନ୍ଙ୍କ ପୁଅ ଆର୍ୟନ ଖାନ ଜେଲ୍ର ଚାରି କାନ୍ଥ ଭିତରେ ଅଛନ୍ତି । ଅକ୍ଟୋବର ୨ରୁ ଆର୍ୟନ ନିଜ ଘର ‘ମନ୍ନତ’ ଯାଇନାହାଁନ୍ତି । କେତେବେଳେ ଏନସିବି ତ କେତେବେଳେ ନ୍ୟାୟିକ ହେପାଜତରେ ତାଙ୍କ ସମୟ କଟୁଛି । ମନ୍ନତରେ ବିଳାସପୂର୍ଣ୍ଣ ଜୀବନ କାଟୁଥିବା ଆର୍ୟନଙ୍କୁ ଜେଲରେ ରହିବା କଷ୍ଟକର ହୋଇପଡିଛି । ଏବେ ମିଳିଥିବା ସୂଚନା ଅନୁସାରେ ଜେଲରେ ଆର୍ୟନ ଖାନ ବହି ପଢି ନିଜ ସମୟ କାଟୁଛନ୍ତି ।
ଆର୍ଥର ରୋଡ ଜେଲ ଅଧିକାରୀଙ୍କ କହିବା ଅନୁସାରେ, ଆର୍ୟନ ଖାନ ଜେଲରେ ବହି ପଢୁଥିବା ବେଳେ ସେଥିରେ ଧାର୍ମିକ ପୁସ୍ତକ ରହିଛି । ଜେଲ ଲାଇବ୍ରେରୀରୁ ଆର୍ୟନ ଖାନ୍ ୨ଟି ପୁସ୍ତକ ଆଣିଛନ୍ତି । ଗୋଟେ ହେଉଛି ଗୋଲଡେନ ଲାୟନ ଓ ଅନ୍ୟ ବହିଟି ଭଗବାନ ରାମ-ସୀତାଙ୍କ କାହାଣୀ ଉପରେ ଆଧାରିତ । ଜେଲର ଅଧିକାରୀ ମାନେ ଏହା ବି କହିଛନ୍ତି ଯେ, ଜାମିନ ଆବେଦନ ଖାରଜ ହେବା ପରେ ଆର୍ୟନ ଖାନ ଅତ୍ୟନ୍ତ ନିରାଶ ହୋଇଛନ୍ତି । ସେ ଅବସାଦରେ ଥିବାବେଳେ ସେଠାକାର ଜେଲ କତ୍ତୃପକ୍ଷ ତାଙ୍କୁ ଲାଇବ୍ରେରୀରୁ ବହି ଆଣି ପଢିବାକୁ ପରାମର୍ଶ ଦେଇଥିଲେ । ଲାଇବ୍ରେରୀରେ ବହୁତ ଧାର୍ମିକ ଓ ପ୍ରେରଣାଦାୟକ ପୁସ୍ତକ ରହିଛି ।
ଅକ୍ଟୋବର ୨ରେ ମୁମ୍ବାଇ କ୍ରୁଜରେ ଡ୍ରଗ୍ସ ପାର୍ଟିରୁ ଏନସିବି ଆର୍ୟନଙ୍କୁ ଧରିଥିଲା । ଏନସିବିକୁ ଖବର ମିଳିଥିଲା ଯେ ମୁମ୍ବାଇରୁ ଗୋଆ ଯାଉଥିବା ଜାହାଜରେ ଡ୍ରଗ୍ସ ପାର୍ଟି ହେବାର ଅଛି । ଏହା ପରେ ଯାତ୍ରୀ ବେଶରେ ଯାଇ ଛାପ ମାରିଥିଲା ଏନସିବି । ଆର୍ୟନଙ୍କୁ ପ୍ରଥମେ ଏନସିବି ଗିରଫ କରିବା ପରେ କିଛି ଦିନ ନିଜ ହେପାଜତରେ ରଖିଥିଲା । ପରେ ଜେଲ ପଠାଯାଇଥିଲା । ଆର୍ୟନଙ୍କୁ ଭେଟିବା ପାଇଁ ଜେଲକୁ ଶାହାରୁଖ ଖାନ ଯାଇଥିଲେ ।ବାପ ଓ ପୁଅଙ୍କ ମଧ୍ୟରେ ୧୫ ମିନଟ ଧରି କଥାବାର୍ତ୍ତା ହୋଇଥିଲା ।
ଆର୍ୟନ ଖାନଙ୍କ ଡ୍ରଗ୍ସ ମାମଲାରେ ଅଭିନେତ୍ରୀ ଅନନ୍ୟା ପାଣ୍ଡେ ମଧ୍ୟ ଫସିଯାଇଛନ୍ତି। ଆର୍ୟନ ଓ ଅନନ୍ୟାଙ୍କ ଚାଟ୍ ସାମନାକୁ ଆସିବା ପରେ ଏନସିବି ଅନନ୍ୟାଙ୍କୁ ଦୁଇ ଥର ଡାକି ପଚରାଉଚରା କରିଛି । ସୋମବାର ମଧ୍ୟ ପୁଣି ଥରେ ହାଜର ହେବାକୁ କୁହାଯାଇଛି । ଆର୍ୟନଙ୍କ ସହ ହୋଇଥିବା ଚାଟ୍କୁ ନେଇ ଅନନ୍ୟାଙ୍କୁ ପଚରାଉଚରା କରୁଛି ଏନସିବି ।