କଟକ: ପଞ୍ଚଭୂତରେ ଲୀନ ହେଲେ ଓଡିଆ ଚଳଚ୍ଚିତ୍ର ଜଗତର ବାଦଶାହା ମିହିର ଦାସ। କଟକ ସତୀଚୌରା ଶ୍ମଶାନରେ ରାଷ୍ଟ୍ରୀୟ ମର୍ଯ୍ୟାଦା ସହ ତାଙ୍କ ଶେଷକୃତ ସମ୍ପନ୍ନ ହୋଇଛି। ବଡ଼ ପୁଅ ଅମ୍ଲାନ ଦାସ ତାଙ୍କୁ ମୁଖାଗ୍ନି ଦେଇଛନ୍ତି। ରାଜ୍ୟ ସରକାରଙ୍କ ପକ୍ଷରୁ ଗାର୍ଡ ଅଫ ଅନର ଦିଆଯାଇଥିଲା। ମିହିର ଭାଇ ଅମର ରହେ ନାରାରେ ପୂରା କଟକ ପ୍ରକମ୍ପିତ ହେଉଥିଲା। ଶହ ଶହ ଲୋକଙ୍କ ଆଖିରୁ ଲୁହ ଝରୁଥିଲା। ମହାନାୟକ ମିହିରଙ୍କ ଅନ୍ତିମ ବିଦାୟ ଦେବା ପାଇଁ କଳାକାରଙ୍କଠୁ ଆରମ୍ଭ କରି ହଜାର ହଜାର ଲୋକ କେଉଁଠୁ ଛୁଟିଆସିଥିଲେ।
କଟକ ସିଡିଏ ୮ ସ୍ଥିତ ବାସଭବନରୁ ଶୋଭାଯାତ୍ରା ବାହାରିବା ପରେ ତାଙ୍କର ଶେଷ ଦର୍ଶନ ପାଇଁ ଲୋକାରଣ୍ୟ ହୋଇପଡିଥିଲା ସ୍ଥାନୀୟ ଅଞ୍ଚଳ। ସିଡିଏର ସମସ୍ତ ଅଞ୍ଚଳ ପରିକ୍ରମା କରି କ୍ୟାଣ୍ଟେନମେଣ୍ଟ ରୋଡ ସ୍ଥିତ ରାମଗଡ଼ ଜନ୍ମସ୍ଥାନକୁ ନିଆଯାଇଥିଲା ମିହିର ଦାସଙ୍କ ପାର୍ଥିବ ଶରୀର। ଏହା ପରେ ସତୀଚଉରାରେ ତାଙ୍କର ଅନ୍ତେଷ୍ଟି କ୍ରିୟା ହୋଇଛି। ଝିପି ଝିପି ବର୍ଷା ସତ୍ୱେ ଅନେକ ଲୋକ ମିହିର ଦାସଙ୍କ ଶେଷ ଦର୍ଶନ ପାଇଁ ରାସ୍ତା କଡ଼ରେ ଭିଡ ଜମାଇଥିଲେ।
ଓଡିଆ ଫିଲ୍ମ ଇଣ୍ଡଷ୍ଟ୍ରିର ବର୍ଷିୟାନ କଳାକାର ମିହିର ଦାସଙ୍କ ପରଲୋକ ପରେ ତାଙ୍କୁ ମରଣୋତ୍ତର ସମ୍ମାନ ଦେବାକୁ ଦାବି କରିଛନ୍ତି ଅଭିନେତା ଶ୍ରୀତମ ଦାସ।ତା ସହିତ କଟକର ସହରର ଏକ ରାସ୍ତାକୁ ତାଙ୍କ ନାଁରେ ନାମିତ କରିବାକୁ ଦାବି କରିଛନ୍ତି। ଶ୍ରୀତମ କହିଛନ୍ତି, ମିହିର ଏମିତି ଜଣେ କଳାକାର ଥିଲେ, ଯାହାକୁସମସ୍ତେ ମନେ ରଖିବେ। ସେ ଜଣେ ଭଲ ମଣିଷ ବି ଥିଲେ । ଅଭିନେତା ସିଦ୍ଧାନ୍ତ ମହାପାତ୍ର କହିଛନ୍ତି , ଆଜି ମିହିରଙ୍କୁ ଦେଖିବାକୁ ଯେତିକି ଲୋକ ଏକାଠି ହୋଇଛନ୍ତି ତାହା ହିଁ ତାଙ୍କ ପାଇଁ ବଡ଼ ସମ୍ମାନ। ଜଣେ କଳାକାର କେବେ ତାକୁ ଅଲଗା କିଛି ସମ୍ମାନ ଦିଆଯାଉ ବୋଲି କହେନି। ସବୁବେଳେ ସେ ସମସ୍ତଙ୍କ ଭଲ ପାଇବା ଖୋଜିଥାଏ।
ଗତକାଲି କଟକର ଏକ ଘରୋଇ ହସ୍ପିଟାଲରେ ମିହିର ଦାସଙ୍କ ପରଲୋକ ହୋଇଥିଲା। ଦୀର୍ଘଦିନ ଧରି କୀଡନି ରୋଗରେ ଆକ୍ରାନ୍ତ ହେବା ପରେ ଗୁରୁତର ହୋଇପଡିଥିଲେ ମିହିର। ଏକାଧିକ ଅଙ୍ଗ ତାଙ୍କର ଅକାମୀ ହୋଇଯାଇଥିଲା। ମାସେରୁ ଅଧିକ ସମୟ ଆଇସିୟୁରେ ରହିବା ପରେ ଗତକାଲି ସେ ଶେଷ ନିଶ୍ୱାସ ତ୍ୟାଗ କରିଥିଲେ।
କେବେ ନାୟକ ତ କେବେ ଖଳନାୟକ, କେବେ ହାସ୍ୟ ଅଭିନେତା ପୁଣି କେବେ ଚରିତ୍ର ଅଭିନେତା ଭାବେ ସେ ଅନେକଙ୍କ ପାଇଁ ସାଜିଥାନ୍ତି ଉଦାହରଣ ସବୁଥିରେ ଫିଟ ଆଉ ହିଟ। ସବୁଥିରେ ସେ ଥିଲେ ମାହିର। ସୂର୍ଯ୍ୟର ଅନ୍ୟ ନାମ ମିହିର। ଆଜି ଚଳଚ୍ଚିତ୍ର ଜଗତକୁ ଅନ୍ଧକାର ଭିତରେ ଛାଡିକି ଚାଲିଯାଇଛନ୍ତି।ହେଲେ ତାଙ୍କ ଅଭିନୟର ଛାପ ସଦାସର୍ବଦା ଆମକୁ ଆଲୋକିତ କରୁଥିବ। ବିଦାୟ ମିହିର ଦାସ।