ପଞ୍ଚାୟତ ନିର୍ବାଚନ ସମ୍ପର୍କିତ ଖବର ସଂଗ୍ରହ କରିବାକୁ ଯାଇଥିବା ସାମ୍ବାଦିକଙ୍କୁ ଆକ୍ରମଣ ଘଟଣାରେ କାର୍ଯ୍ୟାନୁଷ୍ଠାନ । ପୁରୀ କଣାସରେ ସାମ୍ବାଦିକଙ୍କୁ ଆକ୍ରମଣ ଘଟଣାରେ ପୁଲିସ ୮ ଜଣଙ୍କୁ ଗିରଫ କରିଛି । ଅଭିଯୋଗ ଆଧାରରେ ବିଭିନ୍ନ ସ୍ଥାନରେ ଚଢାଉ କରି ପୁଲିସ ଏମାନଙ୍କୁ ଗିରଫ କରିଛି । ଗିରଫ ଆକ୍ରମଣକାରୀ ହେଲେ ସତ୍ୟପ୍ରୀୟ ମହାରଣା,ବିଜୟ ସ୍ୱାଇଁ, ସୁବାସ ମାଝି, ଉତ୍ତମ ଭୁଜବଳ, ନିକୁଞ୍ଜ ସ୍ୱାଇଁ, ଅଜୟ ବରିଶଲ, ବିଦ୍ୟାଧର ସ୍ୱାଇଁ ଓ ବ୍ରଜବନ୍ଧୁ ସ୍ୱାଇଁ । ଘଟଣାରେ ସମ୍ପୃକ୍ତ ଅନ୍ୟ ଅଭିଯୁକ୍ତଙ୍କୁ ଗିରଫ ପାଇଁ ଚଢାଉ ଜାରି ରଖିଛି ପୁଲିସ । ଅଭିଯୁକ୍ତଙ୍କ ନିକଟରୁ ଗୋଟିଏ ମୋବାଇଲ ଫୋନ, ୨ଟି ବୁମ୍,ଲାଇଭ ଟେଲିକାଷ୍ଟ ଉପକରଣ ଓ ତାର ବଣ୍ଡଲ ଜବତ କରାଯାଇଛି ।
ଗତକାଲି ପଞ୍ଚାୟତ ନିର୍ବାଚନର ପ୍ରଥମ ପର୍ଯ୍ୟାୟ ମତଦାନ ଚାଲିଥିବା ବେଳେ ନ୍ୟୁଜ ୧୮ ଓ ନ୍ୟୁଜ ୭ରେ ସାମ୍ବାଦିକ ଓ କ୍ୟାରୋମ୍ୟାନ ଆକ୍ରମଣର ଶିକାର ହୋଇଥିଲେ । କ୍ୟାମେରା ସହ ମୋବାଇଲ ଓ ଲାଇଭ ଭିଜୁଆଲ ପ୍ରସାରଣ ସରଞ୍ଜାମକୁ ଆକ୍ରମଣକାରୀ ଛଡାଇନେଇଥିଲେ । ଦୁର୍ବୃତ୍ତ ଙ୍କ ଆକ୍ରମଣରେ ଗୁରୁତର ଆହତ ହୋଇଥିଲେ ନ୍ୟୁଜ ସେଭେନ ପ୍ରତିନିଧି ସରୋଜ ମଲ୍ଲିକ ଓ କ୍ୟାମେରା ପର୍ସନ ରବିଶଙ୍କର । ନ୍ୟୁଜ ୧୮ର ସୁମନ୍ତ ସୁନ୍ଦରାୟ, କ୍ୟାମେରା ମ୍ୟାନ ଚିତନ ସ୍ୱାଇଁ ମଧ୍ୟ ଆହତ ହୋଇଥିଲେ । ଅଭିଯୋଗ ପରେ ପୁଲିସ ୮ ଜଣଙ୍କୁ ଗିରଫ କରିଛି ।