ସଂସଦରେ ହୀରାକୁଦ ନଦୀବନ୍ଧ ପ୍ରସଙ୍ଗ ଉଠାଇଲେ ବରଗଡ଼ ସାଂସଦ ସୁରେଶ ପୂଜାରୀ
ନୂଆଦିଲ୍ଲୀ: ସ୍ୱାଧୀନତା ପରେ ପରେ ବନ୍ୟା ରୁ ରାଜ୍ୟବାସୀ ଙ୍କୁ ସୁରକ୍ଷା ଦେବା ସଙ୍ଗେ ସଙ୍ଗେ ବିଜୁଳି ଉତ୍ପାଦନ, ଜଳସେଚନ ଓ ପାନୀୟଜଳ ଯୋଗାଣ ଭଳି ଅନେକ ଗୁରୁତ୍ୱପୂର୍ଣ୍ଣ ବିଷୟ କୁ ଧ୍ୟାନରେ ରଖି ହୀରାକୁଦ ଠାରେ ମହାନଦୀ ଉପରେ ନିର୍ମାଣ କରାଯାଇଥିଲା ଏଇତିହାସିକ ହୀରାକୁଦ ନଦୀବନ୍ଧ । କିନ୍ତୁ ନିର୍ମାଣର ସାତ ଦଶନ୍ଧି ପରେ ମଧ୍ୟ ଯୋଜନା ବର୍ତମାନ ନିଜର ମୂଳ ଲକ୍ଷରୁ ବହୁ ଦୂରରେ । ରାଜ୍ୟ ରେ ଶାସନ କରିଆସିଥିବା ଭିନ୍ନ ଭିନ୍ନ ସରକାର ଙ୍କର ଅବହେଳା ଯୋଗୁଁ ସେଇ ଆଶୀର୍ବାଦ ଏବେ ଅଭିଶାପ ରେ ପଲଟିବାକୁ ବସିଲାଣି ।
ଆଜି ସଂସଦ ରେ ଡ୍ୟାମ ସୁରକ୍ଷା ବିଲ – ୨୦୧୯ ଆଲୋଚନା ରେ ଭାଗ ନେଇ ହୀରାକୁଦ ନଦୀବନ୍ଧ ର ବିଭିନ୍ନ ସମସ୍ୟା ଏବଂ ସେଗୁଡିକର ଶୀଘ୍ର ଓ ସ୍ଥାୟୀ ସମାଧାନ ପାଇଁ ଦାବି କରିଛନ୍ତି ବରଗଡ଼ ସାଂସଦ ଶ୍ରୀଯୁକ୍ତ ସୁରେଶ ପୂଜାରୀ । ଶ୍ରୀଯୁକ୍ତ ପୂଜାରୀ ଭାଗ ନେଇ ତାଙ୍କର ବକ୍ତବ୍ୟ ରେ କହିଛନ୍ତି ଯେ ହୀରାକୁଦ ନଦୀବନ୍ଧ ନିର୍ମାଣ ର ୭୦ ବର୍ଷ ପରେ ମଧ୍ୟ ବିସ୍ଥାପିତ ହୋଇଥିବା ପଚିଶ ହଜାର ରୁ ଉର୍ଦ୍ଧ୍ବ ପରିବାର ଙ୍କୁ ଉଚିତ ନ୍ୟାୟ ଓ କ୍ଷତିପୂରଣ ପ୍ରାପ୍ୟ ଏଯାଏଁ ମିଳି ପାରି ନାହିଁ । ଯେଉଁ ପିଢ଼ି ବିସ୍ଥାପିତ ହୋଇଥିଲେ ତାଙ୍କର ତୃତୀୟ ପିଢ଼ି ମଧ୍ୟ ଆଜି ପର୍ଯ୍ୟନ୍ତ ସେଇ ବିସ୍ଥାପନ ର କଷ୍ଟ ଭୋଗୁଛନ୍ତି । ଠିକ ସମୟରେ ମରାମତି ଓ ରକ୍ଷଣାବେକ୍ଷଣ ଅଭାବ ଯୋଗୁଁ ବନ୍ଧରେ ବଡ଼ ବଡ଼ ଫାଟ ସବୁ ଦେଖାଗଲାଣି । ବନ୍ଧ ଟି ବର୍ତ୍ତମାନ ସମ୍ପୂର୍ଣ୍ଣ ରୂପରେ ଅସୁରକ୍ଷିତ, କୌଣସି ସମୟରେ ଭୁଶୁଡି ପଡିବାର ସମ୍ଭାବନା ଦେଖାଦେଲାଣି । ଅଞ୍ଚଳବାସୀ ସେଥିପାଇଁ ସବୁବେଳେ ଭୟଭୀତ । ହୀରାକୁଦ ଜଳଭଣ୍ଡାରର ଚତୁର୍ପର୍ଶ୍ଵରେ ଗଢି ଉଠିଥିବା ସମସ୍ତ ଛୋଟ ବଡ କଳକାରଖାନା ଜଳଭଣ୍ଡାର ରୁ ଜଳ ନେଉଛନ୍ତି ଓ କାରଖାନା ଗୁଡିକରୁ ନିଷ୍କାସିତ ସମସ୍ତ ଦୂଷିତପାଣି ଓ ବର୍ଜ୍ୟବସ୍ତୁ ପୁଣି ଆସି ଜଳଭଣ୍ଡାର ରେ ମିଶୁଛି । ଯାହାଫଳରେ ଜଳ କେବଳ ଦୂଷିତ ହେଉଛି ତାହା ନୁହେଁ, କାରଖାନାର କ୍ୟାମିକାଲ ମିଶା ଦୂଷିତ ପାଣି ଯୋଗୁଁ ବିଷାକ୍ତ ହୋଇଗଲାଣି । ଯାହା ଫଳରେ ଲୋକେ କ୍ୟାନ୍ସର ଭଳି ଗୁରୁତର ରୋଗର ଶିକାର ହେଉଛନ୍ତି । ଜଳଭଣ୍ଡାର ରେ ବର୍ତ୍ତମାନ ୩୫% ରୁ ଅଧିକ ଭାଗ ପଟୁ ମାଟିରେ ଭର୍ତ୍ତି ହୋଇଗଲାଣି । ଯାହା ଫଳରେ ଜଳଭଣ୍ଡାର ର ଜଳଧାରଣ କ୍ଷମତା ଦିନକୁ ଦିନ ହ୍ରାସ ପାଉଛି । ତା ସଙ୍ଗେ ସଙ୍ଗେ ବନ୍ଧ ଉପରେ ଅତ୍ୟଧିକ ଚାପ ସୃଷ୍ଟି ହେଉଛି । ଏଣୁ ବିଭାଗୀୟ ମନ୍ତ୍ରୀ ଏଥି ପ୍ରତି ଦୃଷ୍ଟି ଦିଅନ୍ତୁ ଓ ରାଜ୍ୟ ସରକାର ଙ୍କୁ ଏହି ସମସ୍ତ ସମସ୍ୟା ର ଶୀଘ୍ର ଓ ସ୍ଥାୟୀ ସମାଧାନ ପାଇଁ ନିର୍ଦେଶ ଦିଅନ୍ତୁ ।
ଶ୍ରୀଯୁକ୍ତ ପୂଜାରୀଙ୍କ ପ୍ରସଙ୍ଗ ର ଉତ୍ତର ରେ କେନ୍ଦ୍ର ଜଳସମ୍ପଦ ମନ୍ତ୍ରୀ ହୀରାକୁଦ ନଦୀବନ୍ଧ ର ପୁନରୁଦ୍ଧାର ମରାମତି ଓ ପୁରୁଣା ଗେଟ ଗୁଡିକର ମରାମତି ପାଇଁ ୬୦୦ କୋଟି ଟଙ୍କା ଦେବା ପାଇଁ ଘୋଷଣା କରିଛନ୍ତି ବୋଲି ବିଜେପିର କ୍ଷେତ୍ରିୟ ଗଣମାଧ୍ୟମ ସଂଯୋଜକ ମାନସ ରଞ୍ଜନ ବକ୍ସି ଗଣମାଧ୍ୟମ କୁ ସୂଚନା ଦେଇଛନ୍ତି ।