ନୂଆଦିଲ୍ଲୀ: ଋଣ ନେଉଥିବା କିମ୍ବା ଋଣ ଉପରେ ଇଏମଆଇଦେଉଥିବା ଲୋକଙ୍କ ପାଇଁ ଏକ ବଡ଼ ଆଶ୍ୱସ୍ତି ଖବର। ଭାରତୀୟ ରିଜର୍ଭ ବ୍ୟାଙ୍କ(ଆରବିଆଇ ) ତୃତୀୟ ଥର ପାଇଁ ରେପୋ ରେଟ ହ୍ରାସ କରିଛି। ଭାରତୀୟ ରିଜର୍ଭ ବ୍ୟାଙ୍କ ଶୁକ୍ରବାର ବଜାର ଆଶାଠାରୁ ଅଧିକ ରେପୋ ରେଟ୍ ହ୍ରାସ କରିଛି। ଜୁନ ୪ ତାରିଖରେ ଆରମ୍ଭ ହୋଇଥିବା ଆରବିଆଇର ମୁଦ୍ରା ନୀତି କମିଟି (MPC)ର ଦୁଇ ଦିନିଆ ବୈଠକ ପରେ, ଗଭର୍ନର ସଞ୍ଜୟ ମାଲାହୋତ୍ରା ୫୦ ବେସିସ ପଏଣ୍ଟ ଅର୍ଥାତ୍ ୦.୫୦ ପ୍ରତିଶତର ଏକ ବଡ଼ ହ୍ରାସ ଘୋଷଣା କରିଛନ୍ତି। ଏହା ପରେ, ଏବେ ରେପୋ ରେଟ୍ ୫.୫ ପ୍ରତିଶତକୁ ହ୍ରାସ ପାଇଛି।
ଗତ ଛଅ ମାସରେ ଆରବିଆଇ ଦ୍ୱାରା ରେପୋ ହାରରେ ଏହା ଲଗାତାର ତୃତୀୟ ହ୍ରାସ। ଚଳିତବର୍ଷ ଆରମ୍ଭରେ ଫେବୃଆରୀରେ ୨୫ ବେସିସ ପଏଣ୍ଟ ଏବଂ ତା’ପରେ ପୁଣି ଏପ୍ରିଲରେ ୨୫ ବେସିସ ପଏଣ୍ଟ ହ୍ରାସ କରାଯାଇଥିଲା। ଯାହା ପରେ ରେପୋ ରେଟ୍ ୬ ପ୍ରତିଶତକୁ ହ୍ରାସ ପାଇଥିଲା।
କେନ୍ଦ୍ରୀୟ ବ୍ୟାଙ୍କର ଏହି ନିଷ୍ପତ୍ତି ପରେ, କାର-ଘର ସମେତ ସମସ୍ତ ପ୍ରକାରର ଋଣ ଶସ୍ତା ହେବ। ଆରବିଆଇ ଗଭର୍ନର ସଞ୍ଜୟ ମାଲହୋତ୍ରା ରେପୋ ରେଟ୍ ହ୍ରାସ କରି କହିଛନ୍ତି, ତାଙ୍କର ପଦକ୍ଷେପ ଦେଶ ଭିତରେ ନିବେଶକମାନଙ୍କୁ ପର୍ଯ୍ୟାପ୍ତ ସୁଯୋଗ ଦେବ। ବିଶ୍ୱ ଅଭିବୃଦ୍ଧିର ମନ୍ଥର ଗତି ମଧ୍ୟରେ ଭାରତୀୟ ଅର୍ଥନୀତି ମଜଭୁତ ହେବ। ଏହା ସହିତ, ଘରୋଇ ଚାହିଦା ଆହୁରି ମଜଭୁତ ହେବ।
ସେ କହିଛନ୍ତି, ମୁଦ୍ରା ନୀତି ବୈଠକ ସମୟରେ, SDF ହାର ୫.୭୫ ପ୍ରତିଶତରୁ ୫.୨୫ ପ୍ରତିଶତକୁ ହ୍ରାସ କରାଯାଇଛି। ସେହି ସମୟରେ, MSF ହାର ମଧ୍ୟ ୬.୨୫ ପ୍ରତିଶତରୁ ୫.୭୫ ପ୍ରତିଶତକୁ ହ୍ରାସ କରାଯାଇଛି। ଏହା ସହିତ, ଆରବିଆଇ ଗଭର୍ନର ନଗଦ ସଂରକ୍ଷଣ ଅନୁପାତ ଅର୍ଥାତ୍ CRRକୁ ୧୦୦ ବେସିସ ପଏଣ୍ଟ ଚାରି ପ୍ରତିଶତରୁ ୩ ପ୍ରତିଶତକୁ ହ୍ରାସ କରିଛନ୍ତି।