ଭୁବନେଶ୍ବର: ଆଜିଠୁ ରାଜ୍ୟରେ ପୁଣି ଗଡିଛି ଘରୋଇ ବସ୍। ଗତକାଲି ବସ୍ ଚଳାଚଳ କରିବା ନେଇ ରାଜ୍ୟ ବସ୍ ମାଲିକ ସଂଘ ପକ୍ଷରୁ ସୂଚନା ଦିଆଯାଇଥିଲା। ପୁରୀ ବସଷ୍ଟାଣ୍ଡ ପରିସରରେ ଥିବା ବସ୍ ମାଲିକ ସଂଘ କାର୍ଯ୍ୟାଳୟରେ ଆୟୋଜିତ ସାମ୍ବାଦିକ ସମ୍ମିଳନୀରେ ରାଜ୍ୟ ବସ୍ ମାଲିକ ସଂଘ ସଭାପତି ଲୋକନାଥ ପାଣି ଏବଂ ସମ୍ପାଦକ ଦେବେନ୍ଦ୍ର ସାହୁ ସୂଚନା ଦେଇଥିଲେ।
ବସ୍ ଚଳାଚଳ ସମୟରେ ରାଜ୍ୟ ସରକାର ସୁରକ୍ଷା ଦେବା ପାଇଁ ମାଲିକ ସଂଘ ଦାବି କରିଛନ୍ତି। ଗତ ୮ ତାରିଖରୁ ଡ୍ରାଇଭର ମହାସଂଘ ପକ୍ଷରୁ ରାଜ୍ୟବ୍ୟାପି ବସ୍ ଚଳାଚଳ ବନ୍ଦ ରହିଥିଲା। ସେପଟେ ଗତ ୧୧ ତାରିଖରେ ଡ୍ରାଇଭର ମହାସଂଘର ସଭାପତି ବିବୃତ୍ତି ଦେଇ କହିଛନ୍ତି କୌଣସି ବସକୁ ବାଟରେ ଅଟକା ଯାଉନାହିଁ। କିନ୍ତୁ ଗତ ଗୁରୁବାର ଦିନ ସମ୍ବଲପୁର ଦେଇ ଆସୁଥିବା କେତେକ ବସକୁ ରେଢାଖୋଲ ଓ ଅନୁଗୁଳ ଆର.ଟି.ଓ. ଅଫିସ ପାଖରେ ଆକ୍ରମଣ କରି ବସ୍ ଗୁଡିକର କାଚ ଭାଙ୍ଗି ଦିଆଯାଇଥିବା ଅଭିଯୋଗ କରିଛନ୍ତି ରାଜ୍ୟ ବସ୍ ମାଲିକ ସଂଘ। ଅନ୍ୟପଟେ ଏମାନେ କିଏ ବୋଲି ରାଜ୍ୟ ବସ୍ ମାଲିକ ସଂଘ ପ୍ରଶ୍ନ କରିଛି ?
ରାଜ୍ୟ ବସ୍ ମାଲିକ ସଂଘର ସମ୍ପାଦକ ଦେବନ୍ଦ୍ରେ ସାହୁ କହିଛନ୍ତି,” କେନ୍ଦ୍ରାପଡା ରୁଟ୍ରେ ରାଜକନିକା, ଦୁହୁରିଆ ନିକଟରେ ଗାଡିକୁ ଅଟକାଇ ଛାଡୁନାହାନ୍ତି ଓ ପାରାଦୀପ ରାସ୍ତାର ଭୁତମୁଣ୍ଡାଇ, ବଲାଙ୍ଗୀର ଖଡିଆଳ ଭୁବନେଶ୍ବର ରାସ୍ତାରେ ଦଶପଲ୍ଲା ଓ ନୟାଗଡ ଠାରେ ଗାଡିକୁ ନଛାଡିବା ଓ ଭୁବନେଶ୍ବର – ପୁରୀ ରାସ୍ତାରେ ପିପିଲି ଟୋଲ ଗେଟ, ସାକ୍ଷୀଗୋପାଳ ବ୍ଲକ ଛକ ମାଳତିପାଟପୁର ଠାରେ ବସଗୁଡିକୁ ଅଟକା ଯାଉଛି। ଏହା ଦ୍ଵାରା ଯାତ୍ରୀ ପରିବହନ କ୍ଷେତ୍ରରେ ଅଚଳାବସ୍ଥା ବାରଣ ରହୁଥିବାରୁ ସାଧାରଣ ଯାତ୍ରୀ ବହୁ ହଇରାଣ ହେଉଛନ୍ତି। ଏଣୁ ଯାତ୍ରୀବାହୀ ବସ୍ ଗୁଡିକୁ କୈାଣସି ଯାଗାରେ ହଇରାଣ ନ କରି ଚଳାଚଳରେ ସୁବିଧା କରନ୍ତୁ ଏବଂ ରାଜ୍ୟ ସରକାର ଯାତ୍ରୀ ମାନଙ୍କ ସୁରକ୍ଷା ଓ ବସ୍ ଗୁଡିକରେ କାର୍ଯ୍ୟରତ କର୍ମଚାରୀଙ୍କ ସୁରକ୍ଷା ପାଇଁ ପର୍ଯ୍ୟାପ୍ତ ସୁରକ୍ଷା ବନ୍ଦୋବସ୍ତ କରନ୍ତୁ। ଯାତ୍ରୀ ପରିବହନ କ୍ଷେତ୍ରରେ ସମସ୍ତ ବସ ମାଲିକ ଓ କର୍ମଚାରୀମାନଙ୍କୁ ସମସ୍ତ ରୁଟରେ ବସ ଚଳାଚଳ ଆରମ୍ଭ କରିବା ପାଇଁ ରାଜ୍ୟ ବସ୍ ମାଲିକ ସଂଘ ପକ୍ଷରୁ ନିବେଦନ କରାଯାଇଛି।