- ଶେଷରେ ‘ହାତ’ ନିଷ୍ପତ୍ତି ନେଲା, ରାସ୍ତାକୁ ଓହ୍ଲାଇବ, ତୈଳଦର ବୃଦ୍ଧି ପ୍ରତିବାଦ କରିବ
- ୧୩ ପେଟ୍ରୋଲ ପମ୍ପ ବନ୍ଦ କରିବାକୁ ନବ ନିର୍ମାଣ ଛାତ୍ର ଯୁବ ଛାତ୍ର ସଂଗଠନର ଘୋଷଣା
ଭୁବନେଶ୍ବର: ତୈଳ ଦର ବୃଦ୍ଧିକୁ ନେଇ ତେଜିଲା ବିରୋଧ । ରାଜରାସ୍ତାକୁ ଓହ୍ଲାଇବ କଂଗ୍ରେସ । ତୈଳଦର ବୃଦ୍ଧି ସହ ଅତ୍ୟାବଶ୍ୟକ ସାମଗ୍ରୀ ଦର ମଧ୍ୟ ଢେର ବଢିଛି । ଯାହା ଫଳରେ ମଧ୍ୟବିତ୍ତ ଶ୍ରେଣୀର ଲୋକମାନେ ବେଶ ପ୍ରଭାବିତ ହେଉଛନ୍ତି । ଏହାର ପ୍ରତିବାଦରେ ଆସନ୍ତା ୭ର ୧୭ ତାରିଖ ଯାଏ ରାଜ୍ୟବ୍ୟାପୀ ଆନ୍ଦୋଳନ କରିବ କଂଗ୍ରେସ । ବ୍ଲକ ସ୍ତରରୁ ଆରମ୍ଭ କରି ଜିଲ୍ଲା ସ୍ତରରେ ଏବଂ ରାଜଧାନୀ ଭୁବନେଶ୍ୱରରେ କଂଗ୍ରେସ ପକ୍ଷରୁ ପ୍ରତିବାଦ କରାଯିବ । ତୈଳ ଦର ଲଗାତର ବୃଦ୍ଧି ଫଳରେ ଲୋକଙ୍କ ମଧ୍ୟରେ ଅସନ୍ତୋଷ ଦାନା ବାନ୍ଧୁଛି । ପେଟ୍ରୋଲ ଓ ଡିଜେଲ ଦର ସେଂଚୁରୀ ମାରିଥିବା ବେଳେ ସାଧାରଣ ଜନତାଙ୍କ ପକେଟ ଉପରେ ଏହା ବଡ ପ୍ରଭାବ ପକାଉଛି ।
୭ ତାରିଖରେ ରାଜ୍ୟର ପ୍ରତ୍ୟେକ ବ୍ଲକ ଆଗରେ ତୈଳ ଦର ବୃଦ୍ଧି ସହ ଅତ୍ୟାବଶ୍ୟକ ସାମଗ୍ରୀ ଦର ବୃଦ୍ଧି ନେଇ ପ୍ରତିବାଦ କରିବ କଂଗ୍ରେସ । ୯ ତାରିଖରେ ଜିଲା ସ୍ତରରେ ଏବଂ ଭୁବନେଶ୍ୱରରେ ୧୪ ତାରିଖରେ ପ୍ରତିବାଦ କରାଯିବ । ୧୫ ତାରିଖରେ ପେଟ୍ରୋଲ ନ କିଣିବା ପାଇଁ ଜନସାଧାରଣଙ୍କୁ ନିବେଦନ କରିବ କଂଗ୍ରେସ । ସେହିପରି ୧୭ ତାରିଖ ଦିନ ପ୍ରତି ପେଟ୍ରୋଲ ପମ୍ପ ସାମ୍ନାରେ ଦସ୍ତଖତ ଅଭିଯାନ କରାଯିବ । ଦେଶରେ ବଢୁଥିବା ତେଲ ଦରକୁ ନେଇ କେନ୍ଦ୍ର ସରକାରଙ୍କୁ ସମାଲୋଚନା କରିଛନ୍ତି ପିସିସି ସଭାପତି ନିରଂଜନ ପଟ୍ଟନାୟକ ।
ସେହିପରି ନବ ନିର୍ମାଣ ଯୁବ ଛାତ୍ର ସଂଗଠନ ପକ୍ଷରୁ ପେଟ୍ରୋଲ ଦର ବୃଦ୍ଧି ପ୍ରତିବାଦରେ ଆସନ୍ତା ୬ରୁ ସାଇକେଲ ରାଲି କରାଯାଇ ସମସ୍ତଙ୍କୁ ସଚେତନ କରାଯିବ । ଏବଂ ୧୩ ତାରିଖରେ ପେଟ୍ରୋଲ ପମ୍ପ ଗୁଡିକ ବନ୍ଦ କରିବା ପାଇଁ ଡାକରା ଦିଆଯାଇଛି । ସକାଳ ୬ରୁ ସନ୍ଧ୍ୟା ୬ ଯାଏ ପେଟ୍ରୋଲ ପମ୍ପ ବନ୍ଦ ଡାକରା ଦିଆଯାଇଛି । ଦର ନ କମିଲେ ପେଟ୍ରୋଲ ପମ୍ପଠୁ ରାଜରାସ୍ତା ପର୍ଯ୍ୟନ୍ତ ସବୁଆଡେ ବିରୋଧ କରାଯିବ ବୋଲି ସଂଗଠନ ପକ୍ଷରୁ କୁହାଯାଇଛି ।