ଭୁବନେଶ୍ୱର: ରାଜ୍ୟ ସରକାରଙ୍କ ଗଣମାଧ୍ୟମ ଉପଦେଷ୍ଟା ଭାବେ ମାନସ ରଂଜନ ମଙ୍ଗରାଜ ଆଦି ଦାୟିତ୍ୱ ଗ୍ରହଣ କରିଛନ୍ତି। ଆଜି ପୂର୍ବାହ୍ନରେ ଶ୍ରୀ ମଙ୍ଗରାଜ ରାଜ୍ୟ ସରକାରଙ୍କ ଲୋକସଂପର୍କ ନିର୍ଦେଶାଳୟରେ ବିଧିବଦ୍ଧ ଭାବେ ଦାୟିତ୍ୱ ନେଇଥିଲେ । ଏହି ଅବସରରେ ଶ୍ରୀ ମଙ୍ଗରାଜ ଓ ଲୋକସଂପର୍କ ନିର୍ଦେଶକ କୃପାସିନ୍ଧୁ ମିଶ୍ରଙ୍କ ମଧ୍ୟରେ ଲୋକସଂପର୍କ ବିଭାଗର ଉନ୍ନତି ସଂପର୍କରେ ଆଲୋଚନା ହୋଇଛି । କେବଳ ସେତିକି ନୁହେଁ, ରାଜ୍ୟ ସରକାରଙ୍କ ଉତ୍କଳ ପ୍ରସଙ୍ଗ ଓ ଓଡ଼ିଶା ରିଭ୍ୟୁର ସଂପାଦକ ଲେନିନ୍ ମହାନ୍ତିଙ୍କ ସହିତ ମଧ୍ୟ ଶ୍ରୀ ମଙ୍ଗରାଜ ଉଭୟ ପତି୍ରକା କିଭଳି ଅଧିକ ଲୋକାଭିମୁଖୀ ହୋଇପାରିବ ସେ ନେଇ ଆଲୋଚନା କରିିଥିଲେ ।
ଓଡ଼ିଆ ଦୈନିକ ସମ୍ୱାଦରୁ କ୍ୟାରିଅର ଆରମ୍ଭ କରିଥିବା ଶ୍ରୀ ମଙ୍ଗରାଜଙ୍କର ଗଣମାଧ୍ୟମରେ ଦୀର୍ଘ ଅଭିଜ୍ଞତା ରହିଛି । ସେ ବିଜେଡିର ମିଡିଆ ସଂଯୋଜକ ଭାବେ ମଧ୍ୟ ପୂର୍ବରୁ କାର୍ଯ୍ୟ କରୁଥିଲେ । ପରେ ରାଜ୍ୟ ସରକାର ତାଙ୍କୁ ରାଷ୍ଟ୍ରମନ୍ତ୍ରୀ ପାହ୍ୟା ପ୍ରଦାନ କରିବା ସହିତ ଗଣମାଧ୍ୟମ ଉପଦେଷ୍ଟା ଭାବେ ନିଯୁକ୍ତି ଦେଇଥିଲେ । ଲୋକସଂପର୍କ ବିଭାଗରେ ସେ ନିଜର ଅଫିସ କରିବେ ।
ଉଲ୍ଲେଖଯୋଗ୍ୟ, ପୂର୍ବରୁ କେନ୍ଦ୍ର ସରକାରରେ ଗଣମାଧ୍ୟମ ଉପଦେଷ୍ଟା ନିଯୁକ୍ତି ପାଉଥିଲେ । ଓଡ଼ିଶାରେ ଏଥର ପ୍ରଥମ ଥର ପାଇଁ ସରକାର ଏଭଳି ପଦବି ସୃଷ୍ଟି କରିଛନ୍ତି ଓ ଶ୍ରୀ ମଙ୍ଗରାଜ ପ୍ରଥମ ଉପଦେଷ୍ଟା ଭାବେ ଦାୟିତ୍ୱ ଗ୍ରହଣ କରିଛନ୍ତି । ସରକାରଙ୍କ ବିଭିନ୍ନ ଯୋଜନା କିଭଳି ଲୋକାଭିମୁଖୀ ହେବ, ଗଣମାଧ୍ୟମର ବିକାଶ ଆଦି ସଂପର୍କରେ ସେ ପରାମର୍ଶ ଦେବେ ।