ପ୍ରମୁଖ ଖବର

ଭୁବନେଶ୍ବର: ତଳସରା ବିଧାୟକ ଭବାନୀ ଭୋଇ ବିଜେପିର ଉପ ବାଚସ୍ପତି ପ୍ରାର୍ଥୀ
ନୂଆ ଆୟକର ବ୍ୟବସ୍ଥାରେ ବଦଳିଲା ଛାଡସୀମା, ପୁରୁଣା ବ୍ୟବସ୍ଥାରେ ଅପରିବର୍ତ୍ତିତ, ଷ୍ଟାଣ୍ଡାର୍ଡ ଡିଡକ୍ସନ ୭୫୦୦୦କୁ ବୃଦ୍ଧି
୧୫ ପ୍ରତିଶତ ସୀମା ଶୁଳ୍କ ହ୍ରାସ ନେଇ ଅର୍ଥମନ୍ତ୍ରୀଙ୍କ ଘୋଷଣା: ଶସ୍ତା ହେବ ସୁନା, ରୂପା, କ୍ୟାନ୍ସର ଔଷଧ, ମୋବାଇଲ
ଏଥର ବଜେଟ୍ ରେ ନୂଆ ଚାକିରିଆଙ୍କ ପାଇଁ ଖୁସି ଖବର, ତିନୋଟି କିସ୍ତିରେ ମିଳିବ ୧୫ ହଜାର

ଓଡ଼ିଶା ରଣନୀତି ବଦଳାଇବ ବିଜେପି

0

୨୦୨୦ ମାର୍ଚ୍ଚ ସୁଦ୍ଧା ଦଳ ସଶକ୍ତ ହେବ
କେନ୍ଦ୍ରରେ ମଧ୍ୟ ବଢିବ ଧର୍ମେନ୍ଦ୍ରଙ୍କ ପଆରା

ଭୁବନେଶ୍ୱର: ଗୁରୁବାର ପ୍ରକାଶ ପାଇଥିବା ବିଜେପୁର ରାୟକୁ ନେଇ ବିଜେଡି ଉତ୍ସବ ପାଳୁଛି । ଓଡ଼ିଶା ବିଧାନସଭା ଇତିହାସରେ କୌଣସି ପ୍ରାର୍ଥୀ ୯୭ ହଜାର ୯୯୦ ଭୋଟରେ ପୂର୍ବରୁ ବିଜୟ ଲାଭ କରିନଥିଲେ । ହେଲେ ଏହି ଖବର ବିଜେପି ଶୀର୍ଷସ୍ତରକୁ ଦୋହଲାଇ ଦେଇଛି । ଲୋକସଭା ନିର୍ବାଚନରେ ୩୮ ପ୍ରତିଶତ ଭୋଟ ପାଇଥିବା ବିଜେପି ବିଜେପୁର ଫଳାଫଳ ପରେ ରଣନୀତି ବଦଳାଇବା ସମ୍ଭାବନା ସୃଷ୍ଟି ହେଲାଣି । ଏମିତି ଯେ ନିର୍ବାଚନ ପରେ ବିଜେଡି ସହିତ ବାନ୍ଧିଥିବା ସଂପର୍କ ନେଇ ସେମାନେ ଆଉଥରେ ସମୀକ୍ଷା କରିପାରନ୍ତି । ବିଜେଡିର ଜଣେ ଶୀର୍ଷସ୍ତରର ନେତୃତ୍ୱର କଥାକୁ ଯଦି ବିଶ୍ୱାସ କରାଯାଏ, ତେବେ ଖୁବ୍‍ ଶୀଘ୍ର ବିଜେପି ଓଡ଼ିଶା ଆଭିମୁଖ୍ୟ ବଦଳାଇବ । ୨୦୨୦ ମାର୍ଚ୍ଚ ସୁଦ୍ଧା ରାଜ୍ୟରେ ପୂର୍ବସ୍ଥିତିକୁ ଦଳ ଫେରିଆସିବ । ପ୍ରମୁଖ ବିରୋଧୀ ଦଳର ଭୂମିକା ନେବ ଓ ସରକାରଙ୍କୁ ପୂର୍ବ ଭଳି ପ୍ରତି କଥାରେ ଘେରିବ । ଅନ୍ୟଥା ଓଡ଼ିଶା ଦଖଲ ସ୍ୱପ୍ନରେ ରହିଯାଇପାରେ, ଏକଥା କେନ୍ଦ୍ରୀୟ ନେତୃତ୍ୱ ହେଜିଲେଣି ।

ବିଜେପିର ଦିଲ୍ଲୀ ସୂତ୍ରକୁ ସୂଚାଉଛି, ଉପ ନିର୍ବାଚନ ଓ ସଦ୍ୟ ସମାପ୍ତ ଦୁଇଟି ବିଧାନସଭା ନିର୍ବାଚନ ଫଳାଫଳ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଓ ରାଷ୍ଟ୍ରୀୟ ସଭାପତି ଅମିତ ଶାହଙ୍କୁ ଆଦୌ ଖୁସି କରିନାହିଁ । ଏଣୁ ସେମାନେ ଖୁବ୍‍ ଶୀଘ୍ର ସାଂଗଠନିକ ସ୍ତରରେ କସରତ ଆରମ୍ଭ କରିବାକୁ ଚିନ୍ତା କରୁଛନ୍ତି । ଓଡ଼ିଶା କ୍ଷେତ୍ରରେ ବିଜେପି ଭିନ୍ନ ଏକ ଆଭିମୁଖ୍ୟ ଗ୍ରହଣ କରି ସୁଯୋଗ ଅପେକ୍ଷାରେ ଥିଲା । ମାତ୍ର ଉପନିର୍ବାଚନରେ ପାଖାପାଖି ୧୫ ହଜାର ଭୋଟ କମିଯିବା ଏକ ସଙ୍ଗିନ୍‍ ଘଟଣା । ଗୋଟିଏ ପଟେ କଂଗ୍ରେସ ସଂଗଠନ ଭୁଶୁଡିବାକୁ ବସିଥିବା ବେଳେ ଅନ୍ୟପଟରେ ଯଦି ବିଜେପି ଦୁର୍ବଳ ସ୍ଥିତିକୁ ଚାଲିଆସେ, ତେବେ ବିଜେଡି ବିରୋଧୀ ଭୋଟ ଭିନ୍ନ ଏକ ସମୀକରଣ ସୃଷ୍ଟି କରିବ । ଆଉ ତାହାଯଦି ଆଞ୍ଚଳିକ ଦଳ ଗଠନ ପାଇଁ ସୁଯୋଗ ସୃଷ୍ଟି କରେ, ତେବେ ହରିୟାନା ଭଳି ପରିସ୍ଥିତି ହୋଇପାରେ । ଏଣୁ ବିଜେଡିକୁ ଆଉ ସୁଯୋଗ ନ ଦେଇ ୨୦୨୦ ସୁଦ୍ଧା ଦଳ ଓଡ଼ିଶାରେ ପୁରୁଣା ସ୍ଥିତିକୁ ଫେରିଆସିବା ଲାଗି ଚିନ୍ତା ଆରମ୍ଭ କରିଛି । ଆସନ୍ତା ସଭାପତି ନିର୍ବାଚନକୁ ସେହି ଧାରାରେ ଦଳ ଆଗେଇ ନେବାର ସମ୍ଭାବନା ଅଧିକ ।

ଉଲ୍ଲେଖଯୋଗ୍ୟ, ବିଜେଡି ସହିତ ମେଣ୍ଟ ଭାଙ୍ଗିବା ପରେ ଓଡ଼ିଶା ବିଜେପିକୁ ଏତେ ବାଟ ଆଣିବା ପଛରେ ପ୍ରାରମ୍ଭିକ ପର୍ଯ୍ୟାୟରେ ବିଜୟ ମହାପାତ୍ର ଓ ପରବର୍ତୀ ସମୟରେ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ଭୂମିକା ଉଲ୍ଲେଖନୀୟ ରହିଛି । ସଂପ୍ରତି କେନ୍ଦ୍ର ସରକାରରେ ଶ୍ରୀ ପ୍ରଧାନ ଉଲ୍ଲେଖନୀୟ ସ୍ଥାନରେ ଅଛନ୍ତି । ତାଙ୍କୁ ଦୁଇ ଦୁଇଟି ଗୁରୁତ୍ୱପୂର୍ଣ୍ଣ ଦାୟିତ୍ୱ ଦିଆଯାଇଛି । କେବଳ ସେତିକି ନୁହେଁ, ଉଭୟ ପ୍ରଧାନମନ୍ତ୍ରୀ ଓ ରାଷ୍ଟ୍ରୀୟ ସଭାପତିଙ୍କ ଅତି ନିକଟତମ ଏକଥା ଯେ କେହି ସ୍ୱୀକାର କରିବେ । ଶ୍ରୀ ପ୍ରଧାନଙ୍କ ଭୂମିକା ଜାତୀୟ ରାଜନୀତିରେ ଖୁବ୍‍ ଶୀଘ୍ର ଆହୁରି ବଢିବ । ଏମିତି ଯେ କେନ୍ଦ୍ରୀୟ ବିଜେପିର ତୃତୀୟ ସ୍ଥାନରେ ପହଞ୍ଚିବାକୁ ସମ୍ଭାବନାକୁ ଏଡାଇ ଦିଆଯାଇନପାରେ । ଏପରିସ୍ଥଳେ ଓଡ଼ିଶାରେ ପ୍ରଭାବୀ ସଂଗଠନ କରିବା ଏକ ବଡ଼ ପ୍ରଶ୍ନ ଭାବେ ଉଭା ହୋଇଛି । ଏଣୁ ଶ୍ରୀ ପ୍ରଧାନଙ୍କୁ ବିଶ୍ୱାସକୁ ନେଇ ବିଜେପି ଆଗକୁ ସଂଗଠନ ବଢାଇବ ଓ ତାଙ୍କ ସହିତ ଯୋଗାଯୋଗ ଆଧାରରେ ହିଁ ରଣନୀତି ନିର୍ଧାରଣ ହେବ ବୋଲି ସୂଚନା ମିଳିଛି । ବିଜୟ ମହାପାତ୍ରଙ୍କୁ ରାଜ୍ୟ ସଭାପତି କରିବା ଲାଗି ଗୋଟିଏ ପକ୍ଷ ଚାହୁଁଥିଲେ ହେଁ, ଦଳ ତାଙ୍କୁ ଏହି ଦାୟିତ୍ୱ ନ ଦେଇ ଅନ୍ୟ ଏକ ଗୁରୁତ୍ୱପୂର୍ଣ୍ଣ ସ୍ଥାନରେ ରଖିବା ସହିତ ସଂଗଠନ ଅଭିବୃଦ୍ଧି ପ୍ରକ୍ରିୟାରେ ଅସ୍ତ୍ର କରିପାରେ ବୋଲି ସୂଚନା ମିଳୁଛି । ଖୁବ୍‍ ଶୀଘ୍ର ଯଦି କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଓ ବିଜୟ ମହାପାତ୍ରଙ୍କ ମଧ୍ୟରେ ବୈଠକ ହୁଏ, ତେବେ ଏଥିରେ ଆଶ୍ଚର୍ଯ୍ୟ ହେବାର କିଛି ନାହିଁ ବୋଲି ଏହି ସୂତ୍ରରୁ ପ୍ରକାଶ ।

Leave A Reply

Your email address will not be published.