ମହାରାଷ୍ଟ୍ରରେ ଦେବେନ୍ଦ୍ର ମୁଖ୍ୟମନ୍ତ୍ରୀ ଭାବେ ଶପଥ ନେଲେ
୩୫ ବିଧାୟକ ଆଣିଥିବା ଅଜିତଙ୍କୁ ଉପମୁଖ୍ୟମନ୍ତ୍ରୀ ପଦବ
ଶରଦ ପାଵାର କହିଲେ, ଅଜିତଙ୍କ ନିଷ୍ପତ୍ତି ନିଜସ୍ୱ
ଗର୍ଜୁଛି ଶିବସେନା, ଏଯାଏ ମୁହଁ ଖୋଲିନାହିିଁ କଂଗ୍ରେସ
ନୂଆଦିଲ୍ଲୀ: ଶ୍ରୀ ରାମଚନ୍ଦ୍ରଙ୍କ ଭଳି ରାତି ପାହିଥିଲେ ଉଦ୍ଧବ ଠାକରେ ମହାରାଷ୍ଟ୍ର ମୁଖ୍ୟମନ୍ତ୍ରୀ ହୋଇଥାନ୍ତେ । ଏନସିପି-ଶିବସେନା-କଂଗ୍ରେସ ମେଣ୍ଟ ଚୂଡାନ୍ତ ହୋଇଥିଲା । କାହାର କେତେ ମନ୍ତ୍ରୀ ରହିବେ, ତାହା ବି । ତ୍ରେତୟା ଯୁଗ ଭଳି ରାତାରାତି ଖେଳ ଓଲଟିଗଲା । ଏମିତି ମନ୍ତ୍ରଣା କଲେ ବିଜେପି ଚାଣକ୍ୟ ଅମିତ ଶାହ ଓ ତାଙ୍କ ଟିମ୍, ସକାଳୁ ସକାଳୁ ମହାରାଷ୍ଟ୍ରରେ ବିଜେପି-ଏନସିପି ସରକାର ଶପଥ ଗ୍ରହଣ କଲେ । ଦେବେନ୍ଦ୍ର ଫନଡାଭିସ୍ ମୁଖ୍ୟମନ୍ତ୍ରୀ ଭାବେ ଶପଥ ନେଇଛନ୍ତି, ୩୫ ବିଧାୟକଙ୍କୁ ନେଇ ବିଜେପି ସହ ହାତ ମିଳାଇଥିବା ଅଜିତ ଉପମୁଖ୍ୟମନ୍ତ୍ରୀ ଭାବେ ।
ବିଶ୍ୱସ୍ତ ସୂତ୍ରରୁ ମିଳୁଥିବା ସୂଚନା ଅନୁସାରେ, ଖୁବ ଶୀଘ୍ର ଶିବସେନାର ପ୍ରାୟ ୧୯ ଜଣ ବିଧାୟକ ବିଜେପି ସରକାରକୁ ସମର୍ଥନ ଦେଇପାରନ୍ତି । ଏନସିପି ମୁଖିଆ ଶରଦ ପାଵାର କହିଛନ୍ତି, ଅଜିତଙ୍କ ନିଷ୍ପତ୍ତି ନିଜସ୍ୱ ।ବିଜେପିର ୧୦୫ ବିଧାୟକ ନିର୍ବାଚନ ଜିତିଥିଲେ, ୩୫ ଜଣ ଏନସିପି ବିଧାୟକ ମିଶାଇବା ପରେ ସଂଖ୍ୟା ୧୪୦ ଛୁଇଁଛି । ମ୍ୟାଜିକ୍ ନମ୍ୱର ଠାରୁ ଆଉ ୫ ବିଧାୟକ ନିଅଣ୍ଟଅଛନ୍ତି । ତେବେ ରାଜ୍ୟରେ ୧୨ ତାରିଖରୁ ଲାଗିଥିବା ରାଷ୍ଟ୍ରପତି ଶାସନକୁ ରାଜ୍ୟପାଳ ଉଠାଇ ନେଇଛନ୍ତି ।
ପୂର୍ବରୁ ଶରଦ ପାଵାର ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କୁ ଭେଟିବା ପରେ ଏନସିପି-ବିଜେପି ସଂପର୍କ ନେଇ ଚର୍ଚ୍ଚା ଆରମ୍ଭ ହୋଇଥିଲା । କିନ୍ତୁ ଶରଦ ନୁହେଁ, ଅଜିତ ପାଵାର ହିିଁ ଉଦ୍ଧବଙ୍କ ଶିବସେନାର ମହାରାଷ୍ଟ୍ର ଦଖଲ ସ୍ୱପ୍ନକୁ ସ୍ୱପ୍ନରେ ରଖିଦେଇଛନ୍ତି । ଶିବସେନାର ସଂଜୟ ରାଵତ କହିଥିଲେ, ଏକାଠି ବସିଥିବା ବେଳେ ରାତି ୯ଟାରେ ଅଜିତ ଉଠିଚାଲିଯାଇଥିଲେ ଓ ଫେରିନଥିଲେ । ସେତେବେଳୁ ସନ୍ଦେହ ହୋଇଥିଲା ।