ଭୁବନେଶ୍ବର: ରାଜ୍ୟରେ ଯେତେ ଲୋକ ସଂକ୍ରମିତ ହୋଇଛନ୍ତି, ସେମାନଙ୍କ ମଧ୍ୟରୁ ୮୦ ପ୍ରତିଶତଙ୍କ ଠାରେ କରୋନା ନେଇ କୁହାଯାଉଥିବା କୌଣସି ଲକ୍ଷଣ ନାହିଁ। ଆଜି ଜାତୀୟ ସ୍ବାସ୍ଥ୍ୟ ମିସନ ନିର୍ଦେଶିକା ଶାଳିନୀ ପଣ୍ଡିତ ଏଭଳି ସୂଚନା ଦେଇଛନ୍ତି। ଆଜି ଗଣମାଧ୍ୟମକୁ ଶ୍ରୀମତୀ ପଣ୍ଡିତ କହିଥିଲେ ଯେ ଏଭଳି ସଂକ୍ରମିତଙ୍କୁ ଚିହ୍ନଟ ଫଳରେ ଅନ୍ୟମାନଙ୍କୁ ବ୍ୟାପିବା ରୋକାଯାଇପାରୁଛି। ଆଗକୁ ଅଧିକରୁ ଅଧିକ ସ୍ବାବ ସଂଗ୍ରହ ପାଇଁ ବିଭିନ୍ନ ସ୍କୁଲରେ କ୍ୟାମ୍ପ କରାଯିବ ବୋଲି ମଧ୍ୟ ସେ ସୂଚନା ଦେଇଥିଲେ। ଯଦିଓ ବୃଦ୍ଧ ଓ ବୃଦ୍ଧା ସବୁଠାରୁ ଅଧିକ ସମ୍ବେଦନଶୀଳ ବୋଲି କରୋନା କ୍ଷେତ୍ରରେ କୁହାଯାଉଛି, ଓଡ଼ିଶା କ୍ଷେତ୍ରରେ ଏହି ହାର ମାତ୍ର ୮ ପ୍ରତିଶତ ରହିଛି। ଏହା ଏକ ଭଲ ଖବର।
ସେହିଭଳି କୋଭିଡ୍ ମୁଖପାତ୍ର ସୁବ୍ରତ ବାଗଚୀ କହିଥିଲେ, ଯେ କୌଣସି ମଣିଷ ଯଦି କାଶେ, ତେବେ ତାର କଣିକା ୧୯ ଫୁଟ ପର୍ଯ୍ୟନ୍ତ ଯାଇପାରେ। ଆଉ ଛିଙ୍କ କ୍ଷେତ୍ରରେ ଏହା ୨୯ ଫୁଟ ପର୍ଯ୍ୟନ୍ତ ଗତି କରିବା ସମ୍ଭାବନା ରହିଛି। ଏଣୁ ପ୍ରତି ଲୋକେ ଏନେଇ ସଚେତନ ରହିବାକୁ ସେ ପରାମର୍ଶ ଦେଇଥିଲେ।