ଭୁବନେଶ୍ବର: ରାଜଧାନୀରୁ ଯାଜପୁର । ସାରା ରାଜ୍ୟରେ ଚହଳ ସୃଷ୍ଟି କରିଛି ପ୍ରିୟଙ୍କା ପ୍ରିୟଦର୍ଶନୀଙ୍କ ହତ୍ୟା ଖବର । ଶବ ବ୍ୟବଚ୍ଚେଦ ପରେ ପ୍ରିୟଙ୍କାଙ୍କ ମୃତଦେହ ଗାଁରେ ପହଚିଂବା ପରେ ଅନ୍ତିମ ସଂସ୍କାର କରାଯାଇଛି । ଜୁଇରେ ଜଳିଯାଇଛି ଗୋଟେ ହସଖୁସିର ସଂସାର । ପ୍ରିୟଙ୍କା ମୃତ୍ୟୁ ପୂରା ଗାଁ ଓ ପରିବାର ଲୋକଙ୍କୁ ସ୍ତବ୍ଧ କରିଦେଇଥିବା ବେଳେ ଝିଅକୁ ହରାଇ ପୂରା ପରିବାରରେ ପଡଛି କାନ୍ଦ ବୋବାଳି । ସେପଟେ ଶବ ଗାଁରେ ପହଚିଂବା ପରେ ପରେ କମିସନରେଟ ପୁଲିସ ଯାଜପୁରରେ ପହଚିଂ ଛାନଭିନ ଆରମ୍ଭ କରିଛି । ପ୍ରିୟଙ୍କା ଓ ହତ୍ୟାକାରୀ ଜଗନ୍ନାଥଙ୍କ ମଧ୍ୟରେ କି ସଂପର୍କ ଥିଲା? ଉଭୟଙ୍କ ମଧ୍ୟରେ କି ତିକ୍ତତା ଥିଲା ଯାହା ପାଇଁ ଜଗନ୍ନାଥ ପ୍ରିୟଙ୍କାକୁ ମାରିବା ସହ ନିଜେ ଆତ୍ମହତ୍ୟା ଉଦ୍ୟମ କରିବାକୁ ମଧ୍ୟ ପଛାଇଲାନି । ସେ ନେଇ ଖୋଳତାଡ ଆରମ୍ଭ ହୋଇଥିବା ବେଳେ ସାମନାକୁ ଆସିଛି ଜଗନ୍ନାଥଙ୍କ ହତ୍ୟା ପୂର୍ବର ହ୍ୱାଟସ ଆପ ମେସେଜ ।
ମୋ ଝିଅକୁ ଯିଏ ମାରିଛି , ତାକୁ ଫାଶୀ ଦଣ୍ଡ ଦିଆଯାଉ । ପ୍ର୍ରିୟଙ୍କାଙ୍କ ମୃତ୍ୟୁକୁ ସହଜରେ ଗ୍ରହଣ କରିପାରୁନଥିବା ବେଳେ ଅଭଯୁକ୍ତକୁ ଫାଶୀ ଦଣ୍ଡ ଦିଆଯାଉ ବୋଲି ଦାବି କରିଛନ୍ତି ପରିବାର ଲୋକେ। ପ୍ର୍ରିୟଙ୍କା ଓ ତାଙ୍କ ସ୍ୱାମୀ ପରସ୍ପରକୁ ବହୁତ ଭଲ ପାଉଥିଲେ । ହସ ଖୁସିରେ ସେମାନଙ୍କ ସଂସାର ଚାଲିଥିଲା । ତେଣୁ ଅଭିଯୁକ୍ତକୁ ଫାଶୀ ଦଣ୍ଡ ଦେବାକୁ ପ୍ରିୟଙ୍କା ପରିବାର କହୁଥିବା ବେଳେ ହତ୍ୟାକାରୀ ଜଗନ୍ନାଥର ମାଆ କିନ୍ତୁ ଭିନ୍ନ ମତ କରିଛନ୍ତି । କହିଛନ୍ତି ପ୍ରିୟଙ୍କାଙ୍କ ସହ ତାଙ୍କୁ ପୁଅର ପ୍ରେମ ସଂପର୍କ ଥିଲା । ବିବାହ ପୂର୍ବରୁ ଓ ପରେ ତାଙ୍କ ପୁଅ ପ୍ରିୟଙ୍କା ସହ ବନ୍ଧୁତା ରଖିଥିବା ସେ କହିଛନ୍ତି ।
ତେବେ ଅଭିଯୁକ୍ତ ଜଗନ୍ନାଥ ପ୍ରଧାନ ଆଇସିୟୁରେ ଭର୍ତ୍ତି ହୋଇ ଚିକିତ୍ସିତ ହେଉଥିବା ବେଳେ ତାକୁ ପଚରାଉଚରା କରିବା ସମ୍ଭବପର ହେଉନାହିଁ । ସେପଟେ ହତ୍ୟା ପୂର୍ବରୁ ଜଗନ୍ନାଥ ପ୍ରଧାନ ତାଙ୍କ ପରିବାର ଲୋକଙ୍କୁ ଏକ ହ୍ୱାଟସଆପ ମେସେଜ ଲେଖିଥିଲା । ଯାହା ଏବେ ସାମନାକୁ ଆସିଛି । ଜଗନ୍ନାଥ ଲେଖିଥିଲା , ଯାହାକୁ ଭଲ ପାଉଥିଲି ସେ ମୋତେ ବର୍ବାଦ କରିଦେଲା । ଆଉ ମୋର ବଂଚିବାକୁ ଇଚ୍ଚା ନାହଁ । ଭାଇ ଓ ଭାଉଜଙ୍କୁ ବି ଲେଖିଥିଲା ମେସେଜ । ଏମିତି ଭାଉଜ ଭାଗ୍ୟରେ ଥିଲେ ମିଳନ୍ତି, କିନ୍ତୁ ମୁଁ ହତଭାଗା । ସମସ୍ତଙ୍କ କ୍ଷମା ମାଗିବା ସହ ମୋ ପାଖରେ କିଛି ରାସ୍ତା ନାହିଁ, ମନ ଦୁଃଖ କରିବନି ବୋଲି ସେ ତାର ଅନ୍ତିମ ମେସେଜ ଲେଖିଥିଲା । ବାପା, ବୋଉ ତୁମକୁ ଲାଗିଲେ । ତାଙ୍କ ବୁଝାଇଦେବ । ମୋ ବାଇକ କିଛି କିସ୍ତି ବାକି ଅଛି ସବୁ ଭାଇ ମିଶି ମୁକାଳାଇଦେବ । ସମସ୍ତଙ୍କ ଠାରୁ ମୁଁ ବିଦାୟ ନେଉଛ, ଗୁଡ ବାୟ । ଏହା ଥିଲା ଜଗନ୍ନାଥର ଶେଷ ହ୍ୱାଟସ ଆପ ଚାଟିଂ ।
ହତ୍ୟା ଘଟଣା ଉପରୁ ପରଦା ଉଠାଇବା ପାଇଁ ଏକ ସ୍ୱତନ୍ତ୍ର ଟିମ ଗଠନ ହୋଇଥିବା ବେଳେ ଯାଜପୁର ଯାଇ କମିସନରେଟ ପୁଲିସ ଉଭୟଙ୍କ ପରିବାରଲୋକଙ୍କୁ ପଚରାଉଚରା ଆରମ୍ଭ କରିଛି । । ତେବେ ଏହା ଏକ ଯୋଜନାବଦ୍ଧ ହତ୍ୟାକାଣ୍ଡ ବୋଲି ଡିସିପି ଉମାଶଙ୍କର ଦାସ କହିଛନ୍ତି । ଜଗନ୍ନାଥ ସୁସ୍ଥ ହେବା ପରେ ହିଁ ତାକୁ ହେପାଜତକୁ ନେଇ ପ୍ରିୟଙ୍କା ଓ ତା ମଧ୍ୟର ଥିବା ସଂପର୍କକୁ ନେଇ ପଚରାଉଚରା କରାଯିବ । ଏବଂ କାହିଁକି ସେ ପ୍ରିୟଙ୍କାକୁ ହତ୍ୟା କଲା ତାର ଗୁମର ଫିଟିବ ।