ଭୁବନେଶ୍ବର: ରାଗ ବ୍ରହ୍ମଚଣ୍ଡାଳ। ନିଜ ଜନ୍ମ କଲା ଛୁଆଙ୍କୁ କୂଅ ଭିତରକୁ ଫିଙ୍ଗି ମାଆର ଆତ୍ମହତ୍ୟା ଉଦ୍ୟମ। ହେଲେ ସୌଭାଗ୍ୟବଶତଃ ମାଆ ସିନା ବଂଚିଗଲା ଦୁଇ ଛୁଆ କିନ୍ତୁ ସବୁ ଦିନ ପାଇଁ ଆଖିବୁଜିଦେଲେ। ପାରିବାରିକ କଳହର କରୁଣ ପରିଣତି କେତେ ଯେ ସାଂଘାତିକ ହୋଇପାରେ, ଆକସ୍ମିକ ରାଗ ମଣିଷକୁ କେତେ କ୍ଷତି ପହଞ୍ଚାଇଥାଏ, ତାହାର ଇଏ ହେଉଛି ଆଉ ଏକ ଉଦାହରଣ।
କନ୍ଧମାଳ ଜିଲ୍ଲା ରାଇକିଆ ବ୍ଲକ ଆଲିମାହାରେ ଘଟିଛି ଏଭଳି ଅଭାବନୀୟ ଘଟଣା । ନିଜ ଛୁଆଙ୍କୁ କୂଅ ଭିତରକୁ ଫିଙ୍ଗିଦେଇଛି ମାଆ । ବ୍ୟବସାୟୀ ଏମ୍ ରାଜେଶ ପାତ୍ର ଓ ପତ୍ନୀ ଭାଗ୍ୟଲକ୍ଷ୍ମୀ ପାତ୍ରଙ୍କ ମଧ୍ୟରେ କୌଣସି କାରଣକୁ ନେଇ ଝଗଡ଼ା ହୋଇଥିଲା। ଏହା ପରେ ଭାଗ୍ୟଲକ୍ଷ୍ମୀ ରାଗି ଯାଇ ୨ ଛୁଆଙ୍କୁ ଧରି ଘରୁ ବାହାରକୁ ପଳାଇଥିଲେ।
ରାଗ ବେଳେ ମଣିଷ ଭୁଲିଯାଏ ସେ ନିଜେ କଣ କରେ। ଠିକ୍ ସେମିତି ହିଁ ହେଲା। ରାଗରେ ଅନ୍ଧ ହୋଇଯାଇଥିଲେ ଭାଗ୍ୟଲକ୍ଷ୍ମୀ। ଆଗକୁ କଣ କରିବେ, କଣ ନକରିବେ ଏକଥା ଭାବିପାରିନଥିଲେ। ନିଜର ପଡିଥିଲା ଅଲିମାରୋଡ଼୍ ନିକଟରେ ଥିବା ଏକ କୂଅ ଉପରେ। ବାସ୍। ନିଜ ଜୀବନର ଗତି ନିଜେ ବଦଳାଇଦେଲେ। ନିଜର ଭାଗ୍ୟ ରେଖାକୁ ନିଜେ କାଟି ଖିନ୍ ଭିନ୍ କରିଦେଲେ।
ଭାଗ୍ୟଲକ୍ଷ୍ମୀ ନିଜର ୯ ବର୍ଷର ପୁଅ ଓ ୫ ବର୍ଷର ଝିଅକୁ କୂଅକୁ ଠେଲି ଦେଇଥିଲେ। ୨ ପିଲାଙ୍କୁ ଉଦ୍ଧାର କରାଯାଇ ଡାକ୍ତରଖାନାରେ ଭର୍ତ୍ତି କରାଯାଇଥିଲା। ହେଲେ ସେଠାରେ ଡାକ୍ତର ସେମାନଙ୍କୁ ମୃତ ଘୋଷଣା କରିଥିଲେ। ୨ ପିଲାଙ୍କୁ କୂଅକୁ ଠେଲି ଦେବା ପରେ ସେ ନିଜେ ଆତ୍ମହତ୍ୟା ଉଦ୍ୟମ କରିଥିଲେ। । ବିଧିର ନିର୍ଦେଶ ହେଲା, ତାକୁ ତାର ଭୁଲ ଓ ଅନୁତାପରୁ ଶିକ୍ଷା ଲାଭ କରିବାକୁ ହେବ। ଏଣୁ ସେ ବଞ୍ଚିଯାଇଥିଲା।
ବାପା , ମାଆଙ୍କ ଭିତରେ ଝଗଡ଼ା ଯୋଗୁୁ ବଳିପଡିଗଲା କୁନି କୁନି ଦୁଇ ଛୁଆ । ନିଜ ସୃଷ୍ଟିକୁ ନିଜେ ଉଜାଡିଦେଲେ।