ଭିଜିଲାନ୍ସ ବାହାର କରିବ ଭିତିରି କଥା । ପିଏସ ବିରଞ୍ଚି ସାହଙ୍କୁ ଗିରଫ ସହ ଚାକିରିରୁ ବାଧ୍ୟତାମୂଳକ ଅବସର ଦେବା ପରେ ଭିିଜିଲାନ୍ସ ରାଡାରରେ ଆସିଛି ଓଡିଶା ଷ୍ଟାଫ ସିଲେକ୍ସନ କମିଶନ ଅଫିସ । ଆଜି ଓଏସଏସସି ଅଫିସରେ ପହଞ୍ଚି ଖୋଳତାଡ ଆରମ୍ଭ କରିଛି ଭିଜିଲାନ୍ସ । ଭିଜିଲାନ୍ସର ୨ ଜଣିଆ ଟିମ୍ ଓଏସଏସସି ଅଫିସରେ ପହଞ୍ଚି କାଗଜପତ୍ର ଯାଞ୍ଚ କରିବା ସହ ଟିକିନିକି ତଥ୍ୟ ସଂଗ୍ରହ କରୁଛି । ଏହାସହ କମିଶନ ଅଧ୍ୟକ୍ଷ ଓ ସଦସ୍ୟଙ୍କୁ ପଚରାଉଚରା କରୁଛି ଭିଜିଲାନ୍ସ ।
ପୂର୍ବରୁ ଆୟବର୍ହିଭୂତ ସମ୍ପତ୍ତି ଠୁଳ ଅଭିଯୋଗରେ ଷ୍ଟାଫ ସିଲେକ୍ସନ କମିଶନ ସଦସ୍ୟଙ୍କ ପିଏସ ବିରଞ୍ଚି ସାହୁଙ୍କ ଘରେ ଭିଜିଲାନ୍ସ ରେଡ କରିବା ସହ ପୁଳା ପୁଳା ଟଙ୍କା ଓ ଦେଢ କେଜି ସୁନା ଅଳଙ୍କାର ଜବତ କରିଥିଲା । ଏହାସହ ବିରଞ୍ଚିଙ୍କ ଘରୁ ୧୨ ଲକ୍ଷ ଓ ତାଙ୍କ ସର୍ମ୍ପକୀୟଙ୍କ ଘରୁ ୧୩ ଲକ୍ଷ ଟଙ୍କା ଜବତ କରିଥିଲା । ଆଉ ଏହି ଘଟଣା ପରେ ପିଏସ ବିରଞ୍ଚିଙ୍କୁ ଗିରଫ ସହ ଚାକିରିରୁ ବାଧ୍ୟତାମୂଳକ ଅବସର ଦେଇଛନ୍ତି ସରକାର । ତେବେ କେବଳ ବିରଞ୍ଚି ନୁହଁନ୍ତି ଓଏସଏସସି ଅଫିସରେ ନିଯୁକ୍ତି ନାଁରେ ବଡଧରଣର ଦୁର୍ନୀତି ହୋଇଥିବା ଅଭିଯୋଗ ହେଉଛି । ଆଉ ଏହି ଦୁର୍ନୀତିର ମୂଳ କେଉଁଠି ତାହାକୁ ଧରିବାକୁ ଓଏସଏସସି ଅଫିସରେ ଭିଜିଲାନ୍ସର ପାଦ ପଡିଛି ।
ଓଡ଼ିଶା ଷ୍ଟାଫ୍ ସିଲେକ୍ସନ୍ କମିଶନରେ ବର୍ଷ ବର୍ଷ ଧରି ଚାଲିଛି କି ନିଯୁକ୍ତି ଦୁର୍ନୀତି ? ବିରଞ୍ଚିଙ୍କ ଘଟଣା ସାମ୍ନାକୁ ଆସିବା ପରେ ଏବେ ଏଭଳି ଚର୍ଚ୍ଚା ଜୋର ଧରିଛି । ଏପରିକି ଜଣେ ଚାକିରୀ ଆଶୟୀ ଭିଜିଲାନ୍ସରେ ପହଞ୍ଚିବା ପରେ ଏଭଳି ସନ୍ଦେହ ଆହୁରି ଘନୀଭୂତ ହୋଇଛି । ୨୦୧୧ ମସିହାରେ ଜୁନିଅର ଆସିଷ୍ଟାଣ୍ଡ ପଦବୀ ପାଇଁ କିଭଳି ଦୁର୍ନୀତି ହୋଇଥିଲା, ସେ ନେଇ ଆରଟିଆଇ ତଥ୍ୟ ଧରି ଭିଜିଲାନ୍ସ କାର୍ଯ୍ୟାଳୟରେ ଅଭିଯୋଗ କରିଛନ୍ତି ଚିନ୍ମୟ ରାଉତ । ନିର୍ଦ୍ଧାରିତ ନମ୍ବର ଠାରୁ ଅଧିକ ନମ୍ବର ରଖି ମଧ୍ୟ ସେ ଚାକିରିରୁ ବଞ୍ଚିତ ହେଇଥିବା କହିଛନ୍ତି । ନିର୍ଦ୍ଧାରିତ ନମ୍ବର ୧୭୫ ଥିବା ବେଳେ ଉକ୍ତ ପରୀକ୍ଷାର୍ଥୀ ୧୭୭. ୨୫ ନମ୍ବର ରଖିଥିଲେ । ଏହାସତ୍ତେ୍ୱ ମଧ୍ୟ ସେ ଚାକିରୀରୁ ବଞ୍ଚିତ ହୋଇଛନ୍ତି । ତେଣୁ ଓଏସଏସସିରେ ମେଧାବୀ ପରୀକ୍ଷାର୍ଥୀଙ୍କୁ ଚାକିରି ନ ଦେଇ ଲାଞ୍ଚ କାରବାର ମାଧ୍ୟମରେ ଅନ୍ୟ ପରୀକ୍ଷାର୍ଥୀଙ୍କୁ ଚାକିରି ମିଳୁଥିବା ନେଇ ସେ ଭିଜିଲାନ୍ସରେ ଅଭିଯୋଗ କରିଛନ୍ତି ।